Mi a nace na Montreal, e stad di mas grandi den e provincia di Canada, Quebec. Ami y mi tres rumannan a lanta cu nos mayornan amoroso den e bario agradabel Rosemont. Nos a disfruta di un bida trankil cu otro.

 Como mucha mi tabata gusta lesa Bijbel. Mi ta corda, ora mi tabatin 12 aña, con mi tabata gusta lesa for di Testament Nobo tocante Hesus su bida. Su amor y compasion pa otro hende a conmove mi, y mi tabata kier ta manera e. Lamentablemente, segun cu mi a crece, mi a cuminsa anda cu hende cu tabatin mal influencia riba mi, y mi a perde e interes ey.

 Mi tata tabata toca saxofon, y mi a hereda no solamente su saxofon, sino tambe su amor pa musica. Esey a bira e cos di mas importante den mi bida. Mi tabata gusta musica asina tanto cu no a dura mucho cu mi a siña toca guitara. Cu tempo, ami cu algun amigo a forma un banda di rock, y nos tabata toca na diferente show. Algun productor bon conoci den e mundo di musica a acerca mi y a duna mi un bon oferta. Mi a firma un contract cu un compania grandi cu ta produci musica. Mi musica a bira masha popular y bo por a tende mi canticanan hopi biaha na radio na Quebec.

 A parce cu mi tabatin tur loke mi tabata desea. Mi tabata jong, famoso y tabata gana hopi placa haciendo loke mi tabata gusta. Den dia mi tabata bay gym, duna entrevista, bay sesion caminda mi tabata parti firma y aparece na television. Anochi mi tabata toca y bay fiesta. For di un edad jong, mi tabata bebe alcohol pa mi por a trata cu e presion di toca dilanti un publico grandi. Despues, mi a cuminsa uza droga tambe. Ademas, mi tabata hiba un bida inmoral sin importa e consecuencianan.

 Algun hende tabata envidia mi estilo di bida, pasobra mi tabata parce di ta feliz. Pero mi tabata sinti un bashi inmenso di paden, specialmente ora mi tabata mi so. Mi tabata deprimi y angustia. Pio ainda, ora mi a yega e punto mas exitoso di mi carera, dos di mi productornan a muri di AIDS. Mi a keda den shock! Aunke mi tabata gusta musica, mi tabata odia e estilo di bida cu esaki a trece cu ne.

 A pesar di mi exito, mi tabata sa cu cos ta hopi malo den mundo. Con por ta cu tin asina tanto inhusticia? Mi tabata puntra mi mes dicon Dios no ta haci nada. De echo, hopi bes mi tabata pidi Dios duna mi contesta riba mi preguntanan. Un biaha, tempo cu nos no tabatin gira, mi a cuminsa lesa Bijbel atrobe. Aunke mi no a compronde mayoria di loke mi tabata lesa, mi a conclui cu e fin di mundo mester ta cerca.

 Lesando Bijbel, mi a topa cu un pasashi caminda Hesus a yuna den desierto pa 40 dia. (Mateo 4:1, 2) Mi a pensa cu si mi haci mescos, podise Dios por a revela su mes na mi, pues mi a pone un fecha pa mi cuminsa yuna. Dos siman prome cu mi a cuminsa, dos testigo di Jehova a bati na mi porta y mesora mi a invita nan paden. Mi a wak un di nan, cu yama Jacques, stret den su cara y a puntr’e: “Con nos por sa cu nos ta bibando den e ultimo dianan?” Pa contesta mi, el a habri su Bijbel y a lesa 2 Timoteo 3:1-5. Mi a bombardia nan cu hopi pregunta mas. Y mi a keda impresiona cu nan contestanan; nan tabata logico, comprendibel y semper basa riba Bijbel. Despues di un par di bishita, mi a realisa cu no tabata necesario pa yuna.

 Mi a cuminsa studia Bijbel regularmente cu e Testigonan. Cu tempo, mi a corta mi cabey largo y mi a cuminsa bishita tur e reunionnan na Salon di Reino. E caluroso bon bini cu mi a ricibi na e reunionnan a convence mi cu porfin mi a haya e berdad.

 Claro cu pa mi aplica loke mi a siña for di Bijbel, mi mester a haci cambio grandi den mi bida. Di prome, mi mester a stop di uza droga y di hiba un bida inmoral. Tambe, mi mester a cambia mi actitud egoista y mustra mas consideracion na otronan. Como mayor soltero, mi mester a siña con pa percura pa e necesidadnan spiritual y emocional di mi dos yiunan. Pues, m’a bandona mi carera musical y a bay traha na un fabrica cu no tabata paga masha.

 No tabata facil pa haci tur e cambionan aki. Ora mi a cuminsa stop di uza droga, mi tabata sufri di e efectonan cu hende ta sinti ora cu e curpa ta pidi droga, y mi a haya algun recaida. (Romanonan 7:19, 21-24) Un di e desafionan mas grandi tabata pa laga mi bida inmoral atras. Ademas, mi trabou nobo tabata laga mi hopi cansa y e tiki cen cu mi tabata gana a desanima mi. Tabata tuma mi tres luna pa gana mes tanto cen cu mi tabata gana den dos ora como musico.

 Cu oracion, mi a logra persevera y haci e cambionan dificil aki. Ademas, pa mi tabata masha importante pa lesa Bijbel regularmente. Tabatin algun texto cu a anima mi masha. Un di nan tabata 2 Corintionan 7:1, cu ta urgi nos pa “limpia nos mes di tur impureza di carni y di spirito.” Un otro texto cu a convence mi cu mi por a stop cu mi bicionan ta Filipensenan 4:13, cu ta bisa: “Pa tur cos mi tin forsa pa medio di esun cu ta duna mi poder.” Jehova Dios a contesta mi oracionnan y a yuda mi compronde y aplica principio di Bijbel. Esaki a motiva mi pa dedica mi bida na dje. (1 Pedro 4:1, 2) Na aña 1997, mi a batisa como testigo di Jehova.

 Mi ta convenci cu si mi a sigui cu mi bida di antes, lo mi no ta na bida awe. Pero en bes di esey, awor mi ta disfruta di un bida feliz. Mi dushi esposa Elvie ta un gran bendicion. Hunto nos ta predica 70 ora pa luna y ta disfruta di siña hende e berdad tocante Bijbel. Esey ta duna mi hopi goso y satisfaccion. Mi ta masha agradecido cu Jehova a hala mi cerca dje.​—Juan 6:​44