Tin hende cu ta tarda pa siña di nan foutnan. Ami tabata un persona asina. Mi a nace y crece na Barcelona, e di dos stad mas grandi na Spaña. Nos tabata biba na Somorrostro, un bario cu tabata situa canto di lama. Na Somorrostro tabatin hopi crimen y bendemento di droga.

 Mi mayornan tabatin nuebe yiu, y ami tabata esun mayo. Como cu nos tabata hopi pober, mi tata a manda mi traha na un club di tennis pa piki bala riba cancha durante wega. Mi tabatin dies aña y tabata traha dies ora pa dia. Pesey, mi no por a bay scol manera otro mucha di mi edad. Ora mi tabatin 14 aña, mi a cuminsa traha cu mashin na un luga di hero.

 Na aña 1975, nan a yama mi pa drenta servicio militar, cu e tempo ey tabata obligatorio na Spaña. Mi kier a cuminsa un bida di aventura. Pues, mi a inscribi mi mes como boluntario pa join un grupo militar Spaño na Melilla, un teritorio Spaño situa na Noord Africa. For di e tempo ey, mi a cay den e mundo baho di droga y alcohol.

 Despues cu mi a sali di e grupo militar, mi a bay Barcelona bek y a lanta un gang. Nos tabata horta tur loke nos por a haya, y despues nos tabata bende nan pa por haya placa pa cumpra droga. Mi a cuminsa uza LSD y anfetamina (un droga cu ta duna hende energia y excitacion), y mi a cuminsa hiba un bida inmoral, di bebemento y di wega di placa. E estilo di bida ey a pone mi bira mas y mas violento. Semper mi tabatin un cuchiu, hacha of machete cu mi y nunca mi tabatin miedo di uz’e si tabata parce necesario.

 Un biaha ami y mi gang a horta un auto, y polis a cuminsa persigui nos. Tabata manera un pelicula. Despues cu nos a core un 30 kilometer, polis a cuminsa tira riba nos. Finalmente, nos a boks y nos tur a baha na awa. Ta di compronde cu ora mi tata a haya sa kico a pasa, el saca mi for di cas.

 E siguiente cinco añanan, mi tabata biba riba caya. Mi a drumi dilanti porta di edificio, den truck, riba banki den parke y den santana. Pa un tempo mi a hasta biba den un cueba. Pa mi, bida no tabatin proposito, no tabata haci diferencia si mi tabata bibo of morto. Mi ta corda con, ora mi tabata droga, mi tabata corta mi pols y mi brasanan. Y te dia di awe mi tin e cicatriznan.

 Tempo cu mi tabatin 28 aña, mi mama a bin busca mi y a pidi mi pa bin cas bek. Mi a primintie cu lo mi drecha mi bida. Pero a tuma mi basta tempo pa cumpli cu e promesa ey.

 Un atardi, dos testigo di Jehova a yama na nos cas. Mientras cu mi tabata scucha nan, mi tata tabata grita di paden pa mi cera e porta den nan cara. Nunca mi tabata gusta pa hende bisa mi kico pa haci, pesey mi no a worry cu ne. E Testigonan a ofrece mi tres buki chikito y mi a acepta nan mesora. Mi a puntra nan unda nan reunionnan tabata. Poco dia despues, mi tabata para dilanti Salon di Reino.

 Prome cos cu mi a ripara tabata con nechi tur hende tabata bisti. Mi mes tabatin cabey largo, un barba descuida y paña slordig bisti. Tabata parce cu mi no tabata pertenece eynan. Pues, mi a keda pafo. Pero mi a keda sorprendi ora mi a mira Juan, un ex-miembro di mi gang, bisti na bachi. Despues mi a haya sa cu ta apenas un aña prome el a bira testigo di Jehova. E echo cu Juan tabata eynan a duna mi curashi pa drenta y asisti na e reunion. For di e tempo ey padilanti, mi bida a cuminsa cambia.

 Mi a acepta un estudio di Bijbel y den poco tempo mi a bin realisa cu si mi kier a haya Dios su aprobacion mi mester a cambia mi actitud agresivo y mi estilo di bida inmoral. No tabata facil pa haci e cambionan ey. Mi a siña cu pa mi agrada Dios, mi mester a “transforma [mi] mes door di renoba [mi] mente.” (Romanonan 12:2) E misericordia di Dios a conmove mi. Mi a sinti cu a pesar di tur e foutnan cu mi a haci, Dios kier a duna mi un chens pa cambia mi bida. Loke mi a siña tocante Jehova Dios tabatin un efecto profundo riba mi. Mi a bin compronde cu tin un Creador y cu e ta interesa den mi.​—1 Pedro 5:6, 7.

 Esey a motiva mi pa cuminsa haci cambio den mi bida. Por ehempel, ora cu nos a yega na e tema di tabaco den mi estudio di Bijbel, mi a bisa mi mes cu si Jehova kier pa mi keda limpi y puro den tur sentido, mi tin cu stop di huma. (2 Corintionan 7:1) Y ta esey mi a haci!

 Ademas, mi mester a stop di uza y bende droga. Esey a tuma un tiki mas tempo y esfuerso. Pa mi por a logra haci esey, mi tabata sa cu mi mester a stop di anda cu mi amigonan di antes. Nan influencia a stroba mi di haci progreso spiritual. Cu tempo, mi a cuminsa depende mas riba Dios y acepta e yudansa di mi amigonan nobo den congregacion. Nan amor y interes den mi ta algo cu nunca mi a yega di experencia. Despues di algun luna, mi a logra stop di uza droga completamente y a “bisti e personalidad nobo”, loke a yuda mi haya e aprobacion di Dios. (Efesionan 4:24) Na augustus 1985, mi a batisa como testigo di Jehova.

 Bijbel a cambia mi bida completamente. El a libra mi di un estilo di bida cu tabata caba cu mi curpa y mi dignidad. En realidad, mas cu 30 di mi amigonan di antes a muri na un edad hopi jong di AIDS of otro malezanan relaciona cu uzo di droga. Mi ta hopi contento cu e principionan di Bijbel a yuda mi evita e consecuencianan desastroso ey.

 E cuchiu- y hachanan cu mi tabata cana cu ne tempo cu mi tabata un hoben violento ya ta cos di pasado. Nunca mi a pensa cu na luga di e armanan ey lo mi cana cu un Bijbel pa yuda hende. Awe, ami cu mi casa ta dedica hopi di nos tempo den e trabou di predica.

 Aunke mi mayornan nunca a bira testigo di Jehova, nan a reconoce cu mi estudio di Bijbel a yuda mi hopi. Mi tata a hasta defende e Testigonan dilanti di tur su coleganan. El a realisa cu mi religion nobo a trece un cambio grandi den mi bida y a yuda mi hopi. Semper mi mama tabata bisa cu mare mi a cuminsa studia Bijbel mas prome. Mi ta completamente di acuerdo cu ne!

 Tur e cosnan cu mi a pasa aden a yuda mi realisa cu no tin sentido pa busca felicidad den droga of otro bicio. Awor mi ta realmente feliz pasobra mi por yuda otro hende siña conoce e berdadnan di Bijbel, berdadnan cu a salba mi bida.