Mi a lanta na Tampere, un bario trankil y berde, na Finlandia. Mi famia no tabata masha religioso, pero bon educacion y bon manera di trata hende tabata importante pa nan. Mi mama ta di Alemania, y tempo mi tabata chikito mi a yega di bishita West Alemania, caminda mi wela y welo tabata biba.

 Semper mi a gusta deporte. For di chikito, mi a practica tur tipo di deporte. Pero ora mi tabatin rond di 14 aña, mi a dicidi di concentra riba tennis. Cu 16 aña, mi tabata train dos te tres biaha pa dia: dos training tabata les profesional, y anochi mi tabata train riba mi mes. Mi tabata fascina cu e diferente aspectonan di e wega. Tennis tabata un manera pa mi desafia mi mes, tanto mentalmente como fisicamente. Aunke mi tabata gusta sali cu mi amigonan y dal un cerbes de bes en cuando, nunca mi no a haya mi den problema pa motibo di droga of alcohol. Mi bida tabata draai rond di tennis; esey tabata mi prioridad.

 Mi a cuminsa participa den e torneonan di ATP cu mi 17 aña. a Mi a gana varios torneo y a bira famoso den mi pais. Cu 22 aña mi tabata entre e 50 mihor tenistanan na mundo.

 Pa hopi aña, mi a biaha rond mundo hungando tennis profesional. M’a mira luganan fascinante, pero tambe mi a realisa cu tabatin hopi problema na mundo, manera droga, criminalidad y contaminacion di e medioambiente. Por ehempel, ora nos tabata na Merca, nan tabata bisa nos pa no bay na cierto partinan di algun stad, pasobra nan ta hopi peligroso. Tur esey a haci mi tristo. Ademas, maske mi tabata haci algo cu mi ta stima, na final di dia mi tabata sinti un bashi.

 Mi enamorada, Sanna, a cuminsa studia Bijbel cu testigonan di Jehova. M’a keda asombra di mira cu e tabata gusta cos religioso, pero mi no tabatin nada contra pa e studia. Nos a casa na 1990, y e siguiente aña el a batisa como testigo di Jehova. Mi no tabata considera mi mes un persona religioso, aunke mi tabata kere den Dios si. Mi ta corda cu mi wela Aleman tabata lesa Bijbel hopi, y el a hasta siña mi haci oracion.

 Un dia, un pareha testigo di Jehova a invita ami cu Sanna na nan cas. Kari, e esposo, a mustra mi e profecia di Bijbel tocante “e ultimo dianan.” (2 Timoteo 3:1-5) Esey a impresiona mi, pasobra awor m’a compronde dicon tin asina tanto cos malo ta pasa rond mundo. E dia ey nos no a papia mucho mas tocante religion. Pero despues di esey, mi a cuminsa combersa regularmente cu Kari tocante Bijbel. Tur loke mi tabata siña tabata zona logico. Como cu mi tabatin un bida druk y tabata biaha hopi, nos no por a papia regularmente, pero Kari no a entrega. E preguntanan cu mi tabata haci durante nos periodo di estudio, e tabata contesta via carta. Mi a ripara cu Bijbel tabata contesta tur pregunta profundo di bida na un manera masha logico. Pocopoco mi a cuminsa compronde e tema principal di Bijbel, esta, cu e Reino di Dios lo percura pa Dios su proposito cumpli. Un otro cos cu tabatin un impacto grandi riba mi tabata ora m’a siña e nomber di Dios, Jehova, y a mira tur loke el a haci pa nos. (Salmo 83:18, NW) Loke a impresiona mi mas tanto tabata e sacrificio di rescate; esey no tabata djis un formalidad legal, sino un expresion di Dios su amor. (Juan 3:16) M’a siña tambe cu mi por ta amigo di Dios y biba pa semper den un paradijs caminda tin paz. (Santiago 4:8) M’a cuminsa puntra mi mes: Con ami por demostra mi gratitud?

 Mi a sinta pensa kico mi tabata haciendo cu mi bida. Mi a siña den Bijbel cu e felicidad di mas grandi ta bin di duna, y mi tabatin masha gana di papia cu otro hende tocante mi creencia. (Echonan 20:35) Como atleta profesional, mi tabata pasa un 200 dia pa aña leu for di cas, participando den torneo. Henter e bida di mi famia tabata draai rond di ami: mi training, mi rutina, mi carera. Mi a realisa cu mi tabatin cu haci cambio.

 Mi tabata sa cu masha poco hende lo por a compronde mi decision di stop cu un carera deportivo prometedor pa motibo religioso. Pero e oportunidad di siña conoce Jehova mihor y haya bida eterno tabata hopi mas importante pa mi cu cualkier premio cu mi por a gana den e mundo di tennis; pues, tabata facil pa mi dicidi. Mi tabata determina pa no worry cu loke hende bisa, ya cu esaki tabata mi decision. Un texto di Bijbel cu a yuda mi resisti e presion tabata Salmo 118:6, cu ta bisa: “SEÑOR ta cu mi; lo mi no tin miedo; kico hende por haci mi?”

 Rond di e tempo ey, mi a haya un oferta masha bon mes cerca algun sponsor, un oferta cu lo a permiti mi hunga tennis profesional y biba sin niun preocupacion pa hopi aña. Pero ya mi a tuma mi decision caba, pues mi a nenga e oferta. Cu tempo, mi a stop di participa den e torneonan di ATP. Mi a sigui studia Bijbel, y dia 2 di juli 1994 mi a batisa como testigo di Jehova.

 Den mi caso, no ta un tragedia personal a pone mi pensa riba Dios. Ni tampoco mi no a considera mi mes un persona cu tabata busca e berdad. Mi tabata haya cu mi bida ta bon y cu mi no tabata falta nada. Pero diripiente, mi a descubri cu bida tin un proposito. Ta comosifuera e berdad di Bijbel tabata warda pa mi hay’e. Awor mi bida ta hopi mas mihor di loke mi por a imagina! Nos famia ta mas uni cu nunca. Y mi ta masha contento cu mi tres yiu hombernan a sigui den mi pasonan, no como deportista, sino como cristian.

 Ainda mi ta gusta hunga tennis. A traves di añanan, mi a logra gana mi pan di cada dia cu actividadnan relaciona cu tennis. Mi a traha como entrenado y manager di un club di tennis. Pero mi bida no ta draai rond di deporte mas. Antes, mi tabata train hopi ora tur siman pa bira un mihor hungado di tennis, un campeon. Awor, como un predicador full-time, mi ta gusta uza mi tempo pa yuda otro hende siña y aplica e principionan di Bijbel cu a cambia mi bida. Mi felicidad di mas grandi ta ora mi ta duna prioridad na mi relacion cu Jehova Dios y ora mi ta conta otro hende tocante e speransa di un futuro maraviyoso.—1 Timoteo 6:19.