Mi a nace na San Juan Chancalaito, un pueblito den e estado Chiapas, Mexico. Mi famia ta pertenece na e tribu Chol, un grupo etnico di descendiente Maya. Ami ta e di cinco di 12 yiu. Tempo mi tabata mucha, ami y mi rumannan a studia Bijbel cu e testigonan di Jehova. Lamentablemente, mi no a aplica e consehonan di Bijbel durante mi hubentud.

 Ora cu mi tabatin 13 aña, ya caba mi tabata uza droga y horta. Cu e edad ey mi a bay for di cas y a keda bay sin rumbo di un luga pa otro. Cu mi 16 aña mi a cuminsa traha na un plantacion di marihuana. Mi a traha eynan casi un aña. Un anochi nos tabata transportando un carga grandi di marihuana riba boto y algun homber bon arma di un cartel rival a ataca nos. Pa mi por a scapa e tironan di scopet, mi a bula na awa y a duik leu te na otro banda di e riu. Despues, mi a huy bay Merca.

 Na Merca mi a sigui transporta droga y a haya mi den mas problema. Cu mi 19 aña, mi a ser aresta y a bay cera pa motibo di atraco y intento di asesinato. Den prizon mi a join un gang y a comete mas acto di violencia. Pa e motibo aki, e autoridadnan a traslada mi na un prizon di maximo siguridad na Lewisburg, Pennsylvania.

 Den e prizon na Lewisburg, mi conducta a bay di malo pa pio. Como cu mi tabatin algun tatuahe di gang caba, tabata facil pa mi join e mesun gang den e prizon aki. Mi a bira hasta mas agresivo y tabata envolvi den un pelea tras di otro. Un biaha mi tabata envolvi den un pelea di gang den cura di prizon. Nos a bringa ferozmente cu otro uzando bate di baseball y ekipo di hisa peso. E wardadornan di preso mester a uza gas lacrimogeno pa para e pelea. Despues di esaki, e autoridadnan di prizon a pone mi den un seccion special pa prizonero peligroso. Mi tabata masha agresivo y tabata papia hopi palabra ofensivo. Mi tabata bati hende pa cualkier cos chikito. De echo, mi tabata disfruta di esaki. Mi no tabatin cunes cu mi comportacion.

 Den e seccion di maximo siguridad aki, mi tabata pasa gran parti di dia den mi cel. Pues, pa mi mata tempo mi a cuminsa lesa Bijbel. Despues un di e wardadornan di preso a duna mi e buki “Bo por biba pa semper den Paradijs riba tera.”  a Segun cu mi tabata lesa e buki aki, cu tabata un yudansa pa studia Bijbel, mi a corda hopi cos cu mi a siña tempo cu mi tabata mucha y tabata studia Bijbel cu e Testigonan. Despues mi a reflexiona riba mi bida y a realisa con malo mi bida tabata debi na mi caracter agresivo. Ademas, mi a corda riba mi famia. Como cu dos di mi ruman muhernan a bira testigo di Jehova, mi a pensa: Nan si ta bay biba pa semper. Anto mi a puntra mi mes: Dicon ami no por? Tabata na e momento ey cu mi a tuma e decision firme pa haci cambio.

 Pero, mi tabata sa cu mi tabatin mester di yudansa pa mi por a haci cambio. Pues, e prome cos cu mi a haci ta resa na Jehova Dios y rog’e pa yudansa. Despues, mi a skirbi un carta na e sucursal di testigonan di Jehova na Merca pa pidi un estudio di Bijbel. E sucursal a regla pa un congregacion den cercania tuma contacto cu mi. E tempo ey, mi tabata mag di haya bishita di famia so. Pesey, un testigo di Jehova di e congregacion a cuminsa manda mi carta di animacion y literatura biblico via post. Esey a fortalece mi determinacion pa haci cambio.

 Mi a dal un paso grandi ora mi a dicidi di bandona e gang cu mi tabata pertenece na dje pa hopi aña. E lider di e gang tabata cera den e mesun seccion cu mi, pues mi a acerc’e durante un di nos pausanan y a bis’e cu mi kier bira un testigo di Jehova. Pa mi sorpresa el a bisa: “Si ta cos serio bo ta papia, hacie. Mi no por stroba Dios. Pero si ta djis sali bo kier sali for di e gang, bo sa kico ta e consecuencia.”

 Durante e siguiente dos añanan, e personal di prizon a ripara cambio den mi personalidad. Esaki a pone cu nan a cuminsa tene mas consideracion cu mi. Por ehempel, e wardadornan di preso a stop di bui mi man ora nan tabata saca mi for di cel pa hiba mi baño. Un di nan a hasta anima mi pa sigui haci e cambionan cu mi tabata haciendo. Ademas, durante mi ultimo aña di encarcelacion, e autoridadnan di prizon a traslada mi pa un seccion di siguridad minimo situa den cercania di e prizon principal. Na 2004, despues di tabata cera pa dies aña, nan a laga mi bay y a deporta mi. Nan a hinca mi den un bus di prizon rumbo pa Mexico.

 Manera mi a yega Mexico, mi a busca un Salon di Reino di testigonan di Jehova. Mi a bay mi prome reunion bisti cu uniform di prizon, e unico paña decente cu mi tabatin. A pesar di mi apariencia, e rumannan a duna mi un caluroso bon bini. Ora mi a mira con bon nan a trata mi, mi a sinti cu mi tabata entre cristiannan berdadero. (Juan 13:35) Na e reunion ey, e ancianonan di congregacion a haci areglo pa mi haya un estudio di Bijbel. Despues di un aña, dia 3 september 2005, mi a batisa como testigo di Jehova.

 Na januari 2007, mi a cuminsa den e trabou di tempo completo, dedicando 70 ora tur luna na siña hende Bijbel. Na 2011, mi a gradua na e Scol Biblico pa Ruman Homber Soltero (awe yama Scol pa Predicador di Reino). E scol aki a yuda mi masha bon pa mi cumpli cu mi responsabilidadnan den congregacion.

 Na 2013 mi a casa cu mi kerida esposa, Pilar. Cu un smile riba su cara e ta bisa cu ta dificil pa e kere e cosnan cu mi ta cont’e di mi pasado. Nunca mas mi a bolbe na mi comportacion di pasado. Tanto ami como mi casa ta convenci cu e persona cu mi ta awe ta un ehempel bibo cu Bijbel tin poder pa cambia bida di hende.​—Romanonan 12:2.

 Mi ta sinti cu e palabranan di Hesus na Lucas 19:10 ta aplica na mi. Eynan e ta bisa: “[Mi] a bin pa busca y salba esnan cu ta perdi.” Mi no ta sinti mi perdi mas. Ni mi no ta cana haci hende daño mas. Danki na Bijbel, mi bida tin berdadero proposito. Mi ta na paz cu otro hende y mas cu tur cos, mi tin un bon relacion cu mi Creador, Jehova.