Despues cu Zarina a batisa na Rusia como un testigo di Jehova, el a bolbe na su pais natal den Asia Central, determina pa siña su dos yiu muhernan e berdad tocante Bijbel. Debi na su situacion financiero, e mester a biba den un apartamento di un camber hunto cu su mayornan, su ruman homber y su cuña. E mayornan di Zarina a tah’e pa no siña su yiunan tocante Bijbel. Nan a bisa e nietanan tambe pa no papia cu nan mama tocante Bijbel.

 Zarina a pensa profundamente con pa yuda su yiunan siña tocante Jehova. (Proverbionan 1:8) El a haci oracion ferviente na Jehova y a pidie guia y sabiduria. Despues Zarina a haci conforme su oracion y ora e tabata bay cana cu su yiunan, e tabata papia cu nan tocante e maraviyanan di creacion. E paseonan cortico ey a yuda su yiunan haya interes den e Creador.

 Despues, Zarina a pensa un manera pa sigui lanta e interes ey den su yiunan uzando e buki Kico Bijbel Ta Siña Realmente? a E tabata skirbi algun paragraf y pregunta di e buki over, palabra pa palabra, riba varios pida papel. Ademas, Zarina tabata pone algun frase acerca pa yuda su yiu muhernan compronde e informacion mas mihor. Despues e tabata sconde e papelnan hunto cu un potlood bou di e wasmashin den baño. Ora e yiu muhernan tabata den baño, nan tabata lesa e paragrafnan y skirbi nan contestanan.

 Uzando e metodo aki, Zarina a logra studia dos capitulo di e buki Bijbel Ta Siña cu su dos yiunan prome cu nan a logra haya un otro caminda pa biba. Ey, e por a siña su yiunan libremente. Tur dos yiu muher a batisa na october 2016 y nan tabata contento cu nan mama a uza sabiduria y discernimento pa educa nan den sentido spiritual.