Si, hopi biaha testigonan di Jehova ta yuda ora tin un desaster natural. Nos ta yuda tanto esnan cu ta Testigo como esnan cu no ta Testigo. Esey ta na harmonia cu loke Bijbel ta instrui nos na Galationan 6:10, cu ta bisa: “Laga nos haci loke ta bon pa cu tur hende, pero specialmente pa cu nos rumannan den fe.” Ademas, nos ta purba di duna e victimanan consuelo y ayudo emocional cu na e momento ey nan tin mas mester di dje.—2 Corintionan 1:3, 4.

 Despues di un desaster natural, e ancianonan di e congregacionnan den e area afecta ta haci esfuerso pa localisa cada miembro di nan congregacion pa haci sigur cu nan ta sano y salvo y tambe pa haya sa si nan tin mester di ayudo. E ora ey e ancianonan ta informa e sucursal local di testigonan di Jehova di e situacion y di e ayudo cu a ser duna te na e momento ey.

 Si e congregacionnan local no por duna e yudansa necesario, e Cuerpo Gobernante di testigonan di Jehova ta haci areglo pa duna e yudansa necesario. Na e mesun manera e cristiannan di prome siglo a yuda e rumannan ora tabatin scarsedad di cuminda. (1 Corintionan 16:1-4) E sucursal local ta nombra comitenan pa yuda ora di desaster natural pa organisa y dirigi e trabou. Testigonan di Jehova cu ta bin di otro pais boluntariamente ta duna di nan tempo y recurso pa yuda.—Proverbionan 17:17.

 Un di e maneranan cu nos ta uza e donacionnan cu sucursal di testigonan di Jehova ta haya ta pa yuda e victimanan di desaster natural. (Echonan 11:27-30; 2 Corintionan 8:13-15) Como cu e trabou ta ser haci pa boluntarionan, e fondo pa yuda ora di desaster natural ta bay completamente pa yuda e victimanan. Nos ta uza tur donacion na un manera responsabel.—2 Corintionan 8:20.