1 Tesalonisensenan 4:1-18
4 Finalmente, rumannan, meskos ku boso a risibí instrukshon for di nos tokante kon boso mester kana pa agradá Dios—manera de echo boso ta kanando—nos ta pidi boso i ta hasi un apelashon na boso den nòmber di Señor Hesus pa sigui hasi esei mas plenamente,
2 ya ku boso sa di e instrukshonnan* ku nos a duna boso den nòmber di Señor Hesus.
3 Pasobra esaki ta e boluntat di Dios: pa boso ta santu i pa boso apstené di fornikashon.*
4 Kada un di boso mester sa kon pa dominá su mes kurpa* den santidat i onor,
5 no ku deseo seksual golos, manera ta e kaso ku e nashonnan ku no konosé Dios.
6 Ningun hende no mester yega asina leu di perhudiká i trapa derecho di su ruman den e asuntu akí, pasobra Yehova ta duna kastigu pa tur e kosnan akí, manera nos a bisa boso kaba i a splika boso bon kla.
7 Pasobra Dios no a yama nos pa hiba un bida impuru, sino pa nos ta santu.
8 Pues anto, esun ku rechasá e siñansa akí, no ta hende e ta rechasá sino Dios, kende ta duna boso su spiritu santu.
9 Sinembargo, pa loke ta amor fraternal, nos no tin nodi di skirbi boso, pasobra Dios mes a siña boso pa stima otro.
10 De echo, boso ta hasiendo esei kaba ku tur e rumannan den henter Masedonia. Pero nos ta urgi boso, rumannan, pa sigui hasi esei mas plenamente.
11 Pone komo meta pa hiba un bida trankil, okupá boso ku boso mes asuntunan i traha ku boso man, manera nos a instruí boso,
12 pa boso por hiba un bida desente den bista di hende di pafó,* i sin tin nesesidat di nada.
13 Ademas, rumannan, nos no ke pa boso ta den ignoransia pa loke ta esnan ku a bai sosegá, pa boso no ta tristu manera e hendenan ku no tin speransa.
14 Si nos tin fe ku Hesus a muri i lanta for di morto, nos tin fe tambe ku Dios lo lanta esnan ku a bai sosegá den union ku Hesus i trese nan huntu kuné.
15 Loke nos ta bisa boso awor ta segun e palabra di Yehova: nos ku lo ta na bida durante e presensia di Señor sigur lo no lanta promé ku esnan ku a bai sosegá;
16 pasobra Señor mes lo baha for di shelu ku un yamada di outoridat, ku stèm di arkangel i ku zonido di e tròmpèt di Dios, i esnan ku ta morto den union ku Kristu lo lanta promé.
17 Despues, nos ku lo ta na bida lo ser hibá huntu ku nan den nubia pa kontra ku Señor den laira; i asina nos lo ta semper huntu ku Señor.
18 Pues, sigui konsolá otro ku e palabranan akí.
Nota
^ Òf: “òrdunan.”
^ Wak Apèndiks 4.
^ Òf: “tuma poseshon di su mes wea.”
^ Òf: “hende ku no ta parti di e kongregashon kristian.”
