1 Timoteo 2:1-15
2 Na promé lugá anto, mi ta urgi tur kreyente pa ofresé súplika, orashon, petishon i gradisimentu na Dios pa tur sorto di hende,
2 pa reinan i tur esnan ku ta den puesto haltu,* a fin ku nos por sigui hiba un bida trankil i ketu ku pleno deboshon na Dios i seriedat.
3 Esei ta bon i agradabel den bista di nos Salbador, Dios,
4 kende su boluntat ta pa tur sorto di hende ser salbá i yega na un konosementu eksakto di e bèrdat.
5 Pasobra ta ún Dios tin, i ún mediador entre Dios i hende, Kristu Hesus. Esaki ta e hende
6 ku a duna su mes komo un reskate korespondiente pa tur hende; lo duna testimonio di esaki na su debido tempu.
7 Pa motibu di e testimonio akí mi a keda nombrá komo predikadó i apòstel, esta, un maestro di e nashonnan pa siña nan tokante fe i bèrdat. Ta bèrdat mi ta papia, mi no ta gaña.
8 P’esei mi ta deseá pa tur kaminda ku boso reuní huntu e hòmbernan ta santu i pa nan hisa nan mannan den orashon, sin rabia i sin debate.
9 Asina tambe, mi ta deseá pa e bunitesa di hende muhé no ta den formanan spesial di flègtumentu di kabei ni den kos di oro òf pèrla òf paña masha karu, sino mas bien, den bistí na òrdu,* ku modestia i sano huisio,
10 sí, manera ta pas pa hende muhé ku ta bisa ku nan ta deboto na Dios, esta, pa medio di bon obra.
11 Laga hende muhé keda ketu ora nan ta ser siñá, ku pleno sumishon.
12 Mi no ta permití hende muhé duna siñansa ni ehersé outoridat riba hende hòmber; ma nan tin ku keda ketu.
13 Pasobra Dios a forma Adam promé, despues Eva.
14 Ademas, Adam no a ser gañá, pero ta e muhé a ser kompletamente gañá i a kibra lei di Dios.
15 Sinembargo, hende muhé lo keda protehá* pa medio di hañamentu di yu, basta nan sigui den fe, amor i santidat huntu ku sano huisio.
Nota
^ Òf: “ku tin outoridat.”
^ Òf: “digno di rèspèt.”
^ Evidentemente, esaki ke men ku nan spiritualidat lo keda protehá òf konserbá.
