2 Huan 1:1-13
1 Esaki ta un karta di ami, e ansiano,* na e señora skohí* i na su yunan. Di bèrdat mi ta stima boso, i no ami so, sino tambe tur esnan ku a siña konosé e bèrdat.
2 Nos ta stima boso pa motibu di e bèrdat ku ta keda den nos kurason i ku lo keda ku nos pa semper.
3 Anto nos lo tin bondat inmeresí, miserikòrdia i pas di Dios, e Tata, i di Hesukristu, Yu di e Tata, huntu ku bèrdat i amor.
4 Mi ta masha kontentu, pasobra mi a haña sa ku algun di bo yunan ta kana den e bèrdat, di akuerdo ku e mandamentu ku nos a risibí di e Tata.
5 Pues, awor mi ta pidi bo, señora, pa laga nos stima otro (no ta un mandamentu nobo mi ta skirbi bo, sino un ku nos tabatin for di kuminsamentu).
6 I esaki ta loke amor ta nifiká: nos ta sigui kana di akuerdo ku su mandamentunan. Esaki ta e mandamentu, manera boso a tende na kuminsamentu: boso mester sigui kana den amor.
7 Pasobra hopi gañadó a presentá den mundu; nan ta personanan ku no ta rekonosé ku Hesukristu a bini komo hende. Esun ku ta hasi esei ta e gañadó i e antikristu.*
8 Tene kuidou pa boso no pèrdè e kosnan ku nos a traha duru pa alkansá, ma sòru pa boso risibí e rekompensa kompleto.
9 Ken ku ta bai mas ayá di e siñansa di Kristu i no ta keda den dje, no tin e aprobashon di Dios. Esun ku sí ta keda den e siñansa akí ta esun ku tin e aprobashon di tantu e Tata komo e Yu.
10 Si un hende ta bini serka boso i no ta trese e siñansa akí, no risibié nunka den boso kas ni kumind’é.
11 Pasobra esun ku kumind’é ta kómplise den su maldat.
12 Aunke mi tin hopi kos di konta boso, mi no ke pone nan den un karta; mas bien, mi ta spera di bini serka boso i papia ku boso kara kara, pa boso goso por ta kompleto.
13 E yunan di bo ruman muhé, esun skohí, ta manda kumindamentu pa bo.
Nota
^ Òf: “hòmber di edat.”
^ “E señora skohí” por ta referí na un señora individual òf na un kongregashon kristian den promé siglo.
^ Wak “antikristu” den Apèndiks 16.
