Romanonan 10:1-21
10 Rumannan, en realidat, loke mi ta deseá di kurason i ta supliká Dios ta pa e israelitanan haña salbashon.
2 Mi ta duna testimonio ku nan tin zelo pa sirbi Dios, ma no segun konosementu eksakto;
3 pasobra komo ku nan no sa a base di kiko Dios ta konsiderá un hende hustu, nan ta trata di demostrá na nan manera ku nan ta hustu i no ta trata di kumpli ku e normanan di hustisia di Dios.
4 Kristu ta fin di Lei, di manera ku tur hende ku pone fe den dje por haña hustisia.
5 Pues, Moises ta skirbi ku e hende ku a kumpli ku e rekisitonan hustu di Lei lo biba pa medio di hustisia.
6 Pero e Skritura ta bisa relashoná ku e hustisia ku ta bini di fe: “No bisa den bo kurason: ‘Ken lo subi na shelu?,’ esta, pa buska Kristu bini abou kuné;
7 òf: ‘Ken lo baha den abismo?,’ esta, pa buska Kristu bini ariba kuné for di morto.”
8 Ma kiko e Skritura ta bisa? “E palabra ta serka bo, den bo mes boka i den bo mes kurason,” esta, e “palabra” di fe, ku nos ta prediká.
9 Pues, si bo ta deklará públikamente e ‘palabra den bo mes boka,’ esta, ku Hesus ta Señor, i den bo kurason bo tin fe ku Dios a lant’é for di morto, lo bo ser salbá.
10 Pasobra den bo kurason bo mester tin fe pa haña un posishon hustu dilanti di Dios, ma ku bo boka bo ta hasi deklarashon públiko di bo fe pa haña salbashon.
11 Pues e Skritura ta bisa: “Ningun hende ku pone su fe den dje lo no keda desapuntá.”
12 Pasobra no tin distinshon entre hudiu ni griego,* ya ku ta e mesun Señor tin riba nan tur, kende ta duna abundantemente na tur hende ku ta invok’é.
13 Pasobra “tur hende ku invoká e nòmber di Yehova* lo ser salbá.”
14 Ma kon nan lo invoká esun den ken nan no a pone fe? Anto kon nan lo pone fe den esun ku nan no a tende di dje? Kon nan lo tende sin ku un hende prediká?
15 Anto kon nan lo prediká a ménos ku a manda nan? Manera ta pará skirbí: “Ki bunita ta e pianan di esnan ku ta deklará bon notisia di algu mihó!”
16 Ma no ta nan tur a obedesé e bon notisia. Pasobra Isaías a puntra: “Yehova, ken a pone fe den loke el a tende di nos?”
17 Pues, fe ta bini despues ku un hende tende e palabra. Anto un hende ta tende e palabra ora un persona papia tokante Kristu.
18 Ma mi ta puntra: Akaso nan no a tende? Echo ta ku “nan zonido a plama den henter e tera, i nan mensahe a yega te na e partinan di mas leu di e tera habitá.”
19 Ma mi ta puntra: Akaso Israel no tabata sa? Promé, Moises a bisa: “Lo mi hasi boso yalurs mediante loke no ta un nashon; lo mi instigá boso na rabia violento mediante un nashon bobo.”
20 Anto Isaías a bisa yen di kurashi: “Hende ku no tabata buska mi, a haña mi; mi a revelá mi mes na esnan ku no tabata puntra pa mi.”
21 Ma el a bisa relashoná ku Israel: “Henter dia mi a habri mi brasa pa un pueblo desobediente ku ta pusta boka ku mi.”
