Romanonan 9:1-33
9 Mi ta papia e bèrdat en konekshon ku Kristu; mi no ta gaña, ya ku pa medio di spiritu santu mi konsenshi ta duna testimonio huntu ku mi,
2 ku mi tin un tristesa profundo i un doló kontinuo den mi kurason.
3 Pasobra mi ta dispuesto di ta separá for di Kristu komo esun maldishoná, si esei lo a yuda mi rumannan, mi famia segun karni,
4 esta, e israelitanan. Nan ta esnan ku Dios a adoptá komo yu, esnan ku el a duna gloria, pakto, e Lei, promesa i tambe e privilegio di rindi sirbishi sagrado.
5 Nan ta tambe desendiente di e antepasadonan for di ken Kristu a bini segun karni. Dios, ku ta riba tur, sea alabá pa semper. Amèn.
6 Ma no ta manera kos ku e palabra di Dios a faya. Ke men, no ta tur ku a nase di Israel ta israelita,
7 ni no ta pasobra nan ta desendiente di Abraham nan tur realmente ta su yu, ma ta pará skirbí: “Esnan ku lo ser yamá ‘bo desendientenan’ lo bini mediante Isak.”
8 Es desir, no ta e yunan ku a nase den karni ta realmente yu di Dios, pero ta e yunan di e promesa ta ser konsiderá komo desendiente.
9 Pasobra Dios a duna e siguiente promesa: “Otro aña na e tempu akí lo mi bini, i Sara lo haña un yu hòmber.”
10 Ma no ta e tempu ei so Dios a duna un promesa, sino tambe ora Rebeka a konsebí oochi pa medio di Isak, nos antepasado.
11 Ora nan no a nase ainda ni no a praktiká nada bon òf malu (pa e skohementu segun e propósito di Dios por sigui dependé, no riba obra, sino riba Esun ku ta yama),
12 Dios a bisa Rebeka: “Esun mayó lo ta esklabo di esun mas yòn.”
13 Manera ta pará skirbí: “Mi a stima Yakòb, pero mi a odia Esou.”
14 Kiko nos lo bisa anto? Ku Dios ta inhustu? Apsolutamente ku nò!
15 Pasobra el a bisa Moises: “Lo mi tene miserikòrdia di esun ku mi ke tene miserikòrdia, i lo mi mustra kompashon na esun ku mi ke mustra kompashon.”
16 Pues, e skohementu di Dios no ta dependé di esun ku ta deseá ni di esun ku ta hasi hopi esfuerso,* sino di Dios, kende ta tene miserikòrdia.
17 Pasobra den e Skritura Dios ta bisa Fárao: “Pa e motibu akí mes mi a laga bo keda na bida, pa mi por demostrá mi poder pa medio di bo, i pa mi nòmber ser deklará riba henter e tera.”
18 Pues, e ta tene miserikòrdia di esun ku e ke, ma e ta laga esun ku e ke bira tèrko.
19 P’esei lo bo bisa mi: “Pakiko Dios ta kulpa* hende ainda anto? Pues ken por resistí su boluntat?”
20 Pero ken abo ta, o hende, ku bo ta tribi di kontestá Dios? Akaso e kos formá di klei por bisa esun ku a form’é: “Pakiko bo a traha mi asin’akí?”
21 Bo no sa ku e trahadó di pòchi di klei tin outoridat riba e klei pa traha for di e mesun klòmpi un pòchi pa uso onorabel, i un otro pa uso ku no ta onorabel?
22 P’esei, kiko si Dios a soportá ku hopi pasenshi pòchinan di rabia prepará pa destrukshon, aunke e tabatin e boluntat pa demostrá su rabia i pa duna di konosé su poder?
23 I kiko si el a hasi esaki a fin di por duna di konosé e rikesa di su gloria riba pòchinan di miserikòrdia ku el a prepará di antemano pa gloria,
24 esta, nos, ku el a yama no solamente for di entre e hudiunan sino tambe for di entre e nashonnan?
25 Ta manera e ta bisa tambe den e buki di Oséas: “Esnan ku no ta mi pueblo, lo mi yama ‘mi pueblo,’ i e muhé ku mi no tabata stima, lo mi yama ‘stimá’;
26 i na e lugá kaminda mi a bisa nan: ‘Boso no ta mi pueblo,’ ei nan lo ser yamá ‘yu di e Dios bibu.’”
27 Ademas, Isaías a sklama relashoná ku Israel: “Aunke e kantidat di e yunan di Israel por ta manera santu di laman, ta un restu so lo haña salbashon.
28 Pasobra Yehova lo regla kuenta ku hende ku ta biba riba tera, i lo e hasi esaki kabalmente i sin tarda.”
29 Ademas, manera Isaías a bisa di antemano: “Si Yehova di ehérsitonan no a laga desendiente pa nos, nos lo a bira meskos ku Sódoma ku Gomora.”
30 Kiko nos lo bisa anto? Wèl, ku hende di e nashonnan, aunke nan no a hasi esfuerso pa sigui tras di hustisia, a bira hustu den bista di Dios pa motibu di fe;
31 ma Israel, aunke nan a hasi esfuerso pa sigui tras di hustisia ku ta basá riba lei, no a kumpli ku e lei.
32 Pakiko nò? Pasobra nan a hasi esfuerso pa sigui tras di hustisia, no mediante fe, ma supuestamente mediante obra. Nan a trompeká riba e “piedra di trompeká”;
33 manera ta pará skirbí: “Wak! Mi ta pone den Sion un piedra di trompeká i un baranka ku ta kousa kaida, pero esun ku pone su fe den dje lo no keda desapuntá.”
