1 Huan 4:1-21
4 Rumannan stimá, no kere tur mensahe inspirá,* ma tèst e mensahenan inspirá pa mira si nan ta bini di Dios, pasobra hopi profeta falsu a presentá den mundu.
2 Asin’akí boso ta sa ku e mensahe inspirá ta bini di Dios: tur mensahe inspirá ku ta deklará ku Hesukristu a bini komo hende ta di Dios.
3 Ma e mensahe inspirá ku no ta bisa esaki di Hesus no ta di Dios. Ademas, esei ta e mensahe inspirá ku boso a tende ku lo a bini di e antikristu; wèl, awor e mensahe ei ta na mundu kaba.
4 Yunan stimá, boso ta bini di Dios, i boso a vense e profetanan falsu ei, pasobra esun ku ta den union ku boso ta mas grandi ku esun ku ta den union ku mundu.
5 Nan ta bini di mundu; p’esei nan ta papia loke ta di mundu, i mundu ta skucha nan.
6 Nos ta bini di Dios. Esun ku siña konosé Dios ta skucha nos; esun ku no ta bini di Dios no ta skucha nos. Asin’akí nos por distinguí e mensahe inspirá ku ta bèrdat for di esun ku ta falsu.
7 Rumannan stimá, laga nos sigui stima otro, pasobra amor ta bini di Dios, i ken ku ta stima a nase di Dios i konosé Dios.
8 Ken ku no ta stima no a siña konosé Dios, pasobra Dios ta amor.
9 Pa medio di esaki Dios a revelá e amor ku e tin pa nos: Dios a manda su Yu unigénito* na mundu pa nos por haña bida pa medio di dje.
10 E amor ei ta nifiká esaki: no ta nos a stima Dios, sino ta é a stima nos i a manda su Yu komo un sakrifisio di rekonsiliashon* pa nos pikánan.
11 Rumannan stimá, si ta asina Dios a stima nos, e ora ei nos tambe ta obligá di stima otro.
12 Ningun hende no a mira Dios nunka. Si nos sigui stima otro, Dios ta ku nos ainda, i su amor ta keda demostrá na un manera perfekto den nos.
13 Nos sa ku nos ta keda den union kuné i e den union ku nos, pasobra el a duna nos su spiritu.
14 Ademas, nos mes a mira i ta duna testimonio ku e Tata a manda su Yu komo Salbador di mundu.
15 Ken ku ta deklará ku Hesukristu ta e Yu di Dios, Dios ta keda den union kuné i e den union ku Dios.
16 I nos a siña konosé e amor ku Dios tin pa nos i ta kere den esaki.
Dios ta amor, i esun ku konstantemente ta mustra amor ta keda den union ku Dios, i Dios ta keda den union kuné.
17 Di e manera akí, amor a keda demostrá na un manera perfekto den nos, pa asina nos por papia ku frankesa riba e dia di huisio, pasobra meskos ku Hesukristu ta, asina nos tambe ta den e mundu akí.
18 Den amor no tin miedu; ma amor perfekto ta kore ku miedu, pasobra miedu ta pone restrikshon riba nos. Sí, esun ku tin miedu no tin amor na un manera perfekto.
19 Pa loke ta nos, nos ta stima, pasobra Dios a stima nos promé.
20 Si un hende ta bisa: “Mi stima Dios,” i tòg e ta odia su ruman, e ta un gañadó. Pasobra esun ku no ta stima su ruman, ku e ta mira, no por stima Dios, ku e no ta mira.
21 I esaki ta e mandamentu ku nos a haña di dje: esun ku ta stima Dios mester stima su ruman tambe.
Nota
^ Lit.: “spiritu.”
^ Lit.: “e úniko yu ku Dios mes a traha.”
^ Es desir, un ofrenda pa hasi pas ku Dios.
