1 Huan 5:1-21
5 Ken ku ta kere ku Hesus ta e Kristu a nase di Dios, i ken ku ta stima Dios, ta stima e yunan di Dios.
2 Pa medio di esaki nos sa ku nos ta stima e yunan di Dios: nos ta stima Dios i ta hasi loke e ta manda.
3 Pasobra amor pa Dios ta nifiká ku nos ta kumpli ku su mandamentunan; sinembargo, su mandamentunan no ta pisá,
4 pasobra tur ku a nase di Dios ta vense mundu. I esaki ta e viktoria ku a vense mundu: nos fe.
5 Ken por vense mundu? No ta esun ku tin fe ku Hesus ta e Yu di Dios?
6 Sí, Hesukristu ta esun ku a bini pa medio di awa i sanger; no ku awa so, sino ku awa i ku sanger. I e spiritu ta loke ta duna testimonio di esaki, pasobra e spiritu ta e bèrdat.
7 Pasobra tin tres ku ta duna testimonio:
8 e spiritu, e awa i e sanger, i e tresnan akí ta di akuerdo ku otro.
9 Nos ta aseptá e testimonio ku hende ta duna, pero e testimonio di Dios ta mas grandi, pasobra e testimonio ku Dios ta duna ta e testimonio tokante su Yu.
10 E persona ku ta pone su fe den e Yu di Dios tin e testimonio den su mes. E persona ku no tin fe den Dios ta hasi Dios un gañadó, pasobra e no a kere e testimonio ku Dios a duna tokante su Yu.
11 I esaki ta e testimonio: Dios a duna nos bida eterno, i e bida akí ta bini di su Yu.
12 Esun ku ta aseptá e Yu tin e bida akí; esun ku no ta aseptá e Yu di Dios no tin e bida akí.
13 Mi ta skirbi boso e kosnan akí pa boso por sa ku boso tin bida eterno, sí, boso ku a pone boso fe den e nòmber di e Yu di Dios.
14 I esaki ta e konfiansa ku nos tin den Dios: kiko ku nos pidié ku ta di akuerdo ku su boluntat, e ta tende nos.
15 Ademas, ya ku nos sa ku e ta tende kiko ku nos pidié, nos tin sigur ku nos lo haña e kosnan ku nos pidi, pasobra t’e nos a pidi.
16 Si un hende mira su ruman kometé un piká ku no ta hiba na morto, e mester resa p’e, i Dios lo dun’é bida. Esaki ta konta pa esnan ku no a kometé piká ku ta hiba na morto. Sinembargo, tin un piká ku sí ta hiba na morto. Mi no ta bisa ku e mester resa pa esun ku ta kometé e tipo di piká ei.
17 Tur inhustisia ta piká; i tòg tin piká ku no ta hiba na morto.
18 Nos sa ku ningun persona ku a nase di Dios no ta praktiká piká; mas bien, Esun* ku a nase di Dios ta vigilá nan, i e Malbado* no por haña nan den su gara.
19 Nos sa ku nos a bini di Dios, pero henter mundu ta den poder di e Malbado.
20 Ma nos sa ku e Yu di Dios a bini, i el a duna nos komprondementu penetrante* pa nos por siña konosé e Dios berdadero. I pa medio di su Yu Hesukristu, nos ta den union kuné. Sí, esaki ta e Dios berdadero i e fuente di bida eterno.
21 Yunan stimá, keda leu for di dios falsu.*
Nota
^ “Esun” ta referí na Hesukristu.
^ Esta, Satanas.
^ Lit.: “persepshon mental; kapasidat mental.”
^ Lit.: “imágen.” Òf: “ídolo.” Na griego: eídolon.
