2 Korintionan 2:1-17
2 Pues, mi a disidí di no hasi boso tristu atrobe ora mi bolbe bishitá boso.
2 Pasobra si mi hasi boso tristu, ta ken mas a keda pa hasi mi kontentu si no ta esnan ku mi a hasi tristu?
3 P’esei mes mi a skirbi e kosnan ei, pa ora mi bini, mi no bira tristu pa motibu di esnan ku, de echo, lo mester a hasi mi kontentu; pasobra mi tin konfiansa ku loke ta duna mi goso ta duna boso e mesun goso.
4 Pues, ta ku hopi lágrima mi a skirbi boso, den hopi tribulashon i angustia di kurason, no pa hasi boso tristu, ma pa boso por sa kon grandi mi amor pa boso ta.
5 Awor bon, si un hende a kousa tristesa, no ta ami el a hasi tristu, ma te na sierto grado, boso tur, aunke mi no ke ta muchu severo den loke mi ta bisa.
6 E kastigu akí, ku mayoria di boso a duna e persona akí, ta sufisiente p’e.
7 Pues awor, mas bien, boso mester pordon’é bondadosamente i konsol’é, pa di un manera òf otro demasiado tristesa no kaba kuné.
8 P’esei mi ta urgi boso pa konfirmá boso amor p’e.
9 Pasobra ta pa e motibu akí mi a skirbi boso: pa mi sa si boso ta obediente den tur kos.
10 Kiko ku boso pordoná un hende, mi tambe ta pordon’é. De echo, kiko ku mi a pordoná un hende (si akaso mi a pordoná algu) tabata pa boso bon—Kristu ta testigu di esaki—
11 pa Satanas no dominá nos, pasobra su trikinan no ta deskonosí pa nos.
12 Awor bon, ora mi a yega Troas pa deklará e bon notisia tokante Kristu, un porta a habri pa mi den e obra di Señor.
13 Pero mi no a sinti alivio, pasobra mi no a haña Tito, mi ruman. P’esei mi a yama e disipelnan einan ayó i a sigui pa Masedonia.
14 Ma danki na Dios, kende semper ta guia nos den un marcha di viktoria den kompania di Kristu! I pa medio di nos, Dios ta plama e holó dushi di Su konosementu tur kaminda.
15 Pasobra pa Dios nos ta un holó dushi segun ku nos ta anunsiá e notisia tokante Kristu; un holó ku tantu esnan riba kaminda pa haña salbashon komo esnan riba kaminda di pèrdishon ta sinti;
16 pa esnan ku ta bai pèrdí, e ta un holó di morto ku ta hiba na morto, i pa esnan ku ta haña salbashon, e ta un holó dushi di bida ku ta hiba na bida. I ken ta adekuadamente kapasitá pa un sirbishi asina?
17 Nos, pasobra nos no ta hasi negoshi ku e palabra di Dios manera hopi hende ta hasi; ma nos ta papia ku tur sinseridat, den kompania di Kristu, sí, komo personanan mandá pa Dios, den bista di Dios.
