Oséas 12:1-14
12 Efraím ta karga speransa bano.*
Henter dia, e ta kore tras di bientu di ost.
E ta gaña masha hopi mes i, dia pa dia, e ta bira mas i mas violento.
E ta sera un pakto ku Asiria, i e ta hiba zeta pa Egipto.
2 Yehova tin un kaso kontra Huda.Lo e kastigá Yákòb pa su kondukta;lo e pag’é bèk segun su echonan.
3 Yákòb a gara su ruman hòmber na su hilchi den barika di nan mamai, ku tur su forsa, el a lucha ku Dios.
4 El a keda lucha ku un angel, i el a vense e angel.
El a yora i roga e angel pa bendishon’é.
Dios a top’é na Bètel. I einan, Dios a papia ku nos,
5 sí, Yehova, Dios di e ehérsitonan.Hende lo kòrda ku Dios su nòmber ta Yehova.
6 Dios a bisa: “Bolbe serka boso Dios;mustra amor leal; hasi loke ta korekto,i semper konfia den boso Dios.
7 Boso komersiantenan* ta kònkel ku nan balansanan;nan gusta estafá hende.
8 Efraím ta keda bisa: ‘Bèrdat! Mi a bira riku;mi a optené un fortuna.
Mi a logra esei ku trabou duru. Hende lo no haña niun eror òf piká pa akusá mi di dje.’
9 Ami ta Yehova, boso Dios for di tempu ku boso tabata na Egipto.
Lo mi laga boso biba den tènt atrobe,manera tempu ku tabatin e fiesta na tempu stipulá.
10 Mi a papia ku e profetanan,i mi a laga nan mira hopi vishon.Pa medio di e profetanan, mi a konta vários ilustrashon.*
11 Na Gálad, tin mentira i falsedat.*
Na Guilgal, e pueblo ta sakrifiká toro,i nan altarnan ta manera monton di piedra den kunuku di plug.
12 Yákòb a hui bai* Áram.*Einan, Israel a sirbi pa el a haña un esposa;el a kuida karné pa el a haña un esposa.
13 Pa medio di un profeta, Yehova a saka Israel for di Egipto,i un profeta a kuida Israel.
14 Efraím ta ofendé Dios profundamente.Efraím ta kulpabel di dramamentu di sanger, i lo e keda kulpabel.Su Señor lo kastig’é pa e reproche ku e ta kousa.”
Nota
^ Lit.: “ta alimentá su mes ku bientu.”
^ Òf: “Boso negosiantenan.”
^ Òf: “parábola; komparashon.”
^ Òf: “Na Gálad, e hendenan ta hasi magia;” “Na Gálad, e hendenan ta enbolbé nan mes den kos místiko.”
^ Lit.: “a hui bai kunuku di.” Òf: “a hui bai teritorio di.”
^ Òf: “Siria.”
