Huan 14:1-31
14 “No laga boso kurason bira intrankil. Pone fe den Dios; pone fe den mi tambe.
2 Den kas di mi Tata tin masha hopi lugá.* Si no tabata asina, lo mi a bisa boso. Mi ta bai pa prepará un lugá pa boso.
3 I ora mi bai i prepará un lugá pa boso, lo mi bini bèk i risibí boso serka mi, pa kaminda mi ta, boso tambe por ta.
4 I kaminda mi ta bai, boso sa e kaminda.”
5 Tomas a bis’é: “Señor, nos no sa unda bo ta bai. Kon nos por sa e kaminda?”
6 Hesus a kontest’é: “Ami ta e kaminda, e bèrdat i e bida. Ningun hende no ta yega serka e Tata si no ta pa medio di mi.
7 Si di bèrdat boso konosé mi, boso lo konosé mi Tata tambe; di awor padilanti boso lo konos’é. De echo, boso a mir’é kaba.”
8 Felipe a bis’é: “Señor, mustra nos e Tata, i esei ta sufisiente pa nos.”
9 Hesus a bis’é: “Mi tin asina tantu tempu huntu ku boso, i ainda bo no konosé mi, Felipe? Esun ku a mira mi, a mira e Tata tambe. Kon bo por bisa anto: ‘Mustra nos e Tata’?
10 Bo no ta kere ku mi ta den union ku e Tata i ku e Tata ta den union ku mi? E kosnan ku mi ta bisa boso no ta di mi mes mi ta papia nan; ma ta e Tata ku ta keda den union ku mi ta hasi su obranan pa medio di mi.
11 Kere mi ora mi bisa boso ku mi ta den union ku e Tata i ku e Tata ta den union ku mi; òf a lo ménos kere pa motibu di e obranan ku mi a hasi.
12 Di bèrdat bèrdat mi ta bisa boso: Esun ku pone fe den mi lo hasi tambe e obranan ku mi ta hasi; i lo e hasi obranan mas grandi ku esakinan, pasobra mi ta bai serka mi Tata.
13 Ademas, kiko ku boso pidi den mi nòmber, lo mi hasi, pa asina e Yu por glorifiká e Tata.
14 Si boso pidi kualke kos den mi nòmber, lo mi hasié.
15 Si boso ta stima mi, boso lo kumpli ku mi mandamentunan;
16 i lo mi pidi e Tata, i lo e duna boso un otro ayudante* pa keda huntu ku boso pa semper,
17 esta, e spiritu ku ta revelá e bèrdat. Mundu sí no por risibié, pasobra mundu no ta mir’é ni konos’é. Ma boso sí konos’é, pasobra e ta keda huntu ku boso i ta den boso.
18 Lo mi no laga boso manera huérfano. Mi ta bini serka boso sigur.
19 Un poko tempu mas i mundu lo no mira mi mas, ma boso sí lo mira mi, pasobra mi ta biba i boso tambe lo biba.
20 Riba e dia ei boso lo sa ku mi ta den union ku mi Tata i ku boso ta den union ku mi i ku ami ta den union ku boso.
21 Esun ku aseptá mi mandamentunan i kumpli ku nan ta esun ku stima mi. I esun ku stima mi, mi Tata lo stim’é, i ami tambe lo stim’é i mustr’é bon kla ken mi ta.”
22 Hudas (no Hudas Iskariot) a puntr’é: “Señor, kon bini bo tin intenshon di mustra nos bon kla ken bo ta i bo no ta mustra mundu?”
23 Hesus a kontest’é: “Si un hende ta stima mi, lo e kumpli ku mi palabra, i mi Tata lo stim’é, i nos lo bini serka dje i keda biba serka dje.
24 Esun ku no stima mi no ta kumpli ku mi palabranan; i e palabra ku boso ta tende no ta di mi, sino di e Tata ku a manda mi.
25 Mi a papia e kosnan akí ku boso miéntras mi tabata huntu ku boso.
26 Ma e ayudante,* e spiritu santu, ku e Tata lo manda den mi nòmber, lo siña boso tur kos i laga boso kòrda tur loke mi a bisa boso.
27 Mi ta laga pas pa boso; mi ta duna boso mi pas. E pas ku mi ta duna boso no ta manera e pas ku mundu ta duna. No laga boso kurason bira intrankil ni lag’é kremp di miedu.
28 Boso a tende ku mi a bisa boso: Mi ta bai i lo mi bini bèk serka boso. Si di bèrdat boso ta stima mi, boso lo ta kontentu ku mi ta bai serka e Tata, pasobra e Tata ta mas ku mi.
29 Pues, awor mi a bisa boso esei promé ku e sosodé, pa ora e sosodé boso por kere mi palabranan.
30 Lo mi no papia muchu mas ku boso, pasobra e gobernante di mundu ta bini. E no tin poder riba mi,
31 pasobra mi ta hasi presis manera e Tata a manda mi hasi, pa mundu por sa ku mi ta stima e Tata. Lanta ariba, laga nos bai for di akinan.
