Notisia di Reino Num. 37

Un Mensahe pa Henter Mundu

Fin di Religion Falsu Ta Serka!

▪ Kiko ta religion falsu?

▪ Kon lo e yega na su fin?

▪ Kon esei lo afektá abo?

 Kiko Ta Religion Falsu?

E krímennan kometé den nòmber di religion ta hasi bo tristu? Guera, terorismo i korupshon ku personanan ku ta pretendé di sirbi Dios ta kometé, ta molestiá bo sentido di hustisia? Dikon ta manera kos ku religion ta e kousa di asina tantu problema?

No ta tur religion, sino religion falsu so, ta responsabel pa e tantísimo problemanan aki. Hesukristu, un personahe religioso hopi respetá, a indiká ku religion falsu ta pone hende hasi loke ta malu, meskos ku un “palu malu ta duna mal fruta.” (Mateo 7:15-17) Ki fruta religion falsu ta produsí?

Religion Falsu . . .

▪ TA METE DEN GUERA I POLÍTIKA: “Na Asia i tambe na otro lugánan, lidernan [religioso] hambrá pa poder ku un aire di despresio ta manipulá e sintimentunan religioso di hende pa satisfasé nan propio nesesidatnan,” segun e revista Asiaweek. P’esei, e revista ei a spièrta: “Mundu ta serka di bira loko.” Un lider religioso prominente na Merka a deklará: “Bo tin ku mata e teroristanan pa nan stòp di mata.” Ki solushon el a sugerí? “Tira nan tur mata den nòmber di Señor.” Na kontraste, Beibel ta bisa: “Si un hende bisa: ‘Mi ta stima Dios,’ i ta odia su ruman, e ta un gañadó.” (1 Juan 4:20) Asta Hesus a bisa: “Stima boso enemigunan.” (Mateo 5:44) Kuantu religion bo konosé ku nan miembronan ta partisipá den guera?

▪ TA SIÑA DOKTRINA FALSU: Mayoria religion ta siña ku hende tin un parti invisibel, un alma òf spiritu, ku ta sigui biba ora ku e kurpa físiko muri. Mediante e siñansa aki, hopi di e religionnan ei ta saka probecho di nan miembronan dor di kobra nan pa resa pa alma di e defuntunan. Sin embargo, Beibel ta siña un otro doktrina: “E alma ku peka lo muri.” (Ezekiel 18:4) “E bibunan sa ku nan lo muri, ma e mortonan no sa nada.” (Eklesiastés 9:5) Hesus a siña hende ku e mortonan lo ser resusitá. Pues, si hende tabatin un alma inmortal resurekshon lo no tabata nesesario. (Juan 11:11-25) Bo religion ta siña ku alma no ta muri?

▪ TA TOLERÁ RELASHON SEKSUAL INMORAL: Den hopi pais, gruponan religioso ta permití personanan homoseksual i lesbiana bira pastor i nan ta urgi gobièrnu pa rekonosé matrimonio di personanan di mesun sekso. Asta iglesianan ku ta kondená inmoralidat ta tolerá lidernan religioso ku a abusá seksualmente di mucha. Pero kiko Beibel ta siña? Beibel ta deklará bon kla: “No laga nan gaña boso; ni fornikadó, ni adoradó di dios falsu, ni adúltero, ni sodomita, ni homoseksual . . . lo no heredá e reino di Dios.” (1 Korintionan 6:9, 10) Bo konosé religionnan ku ta aseptá i permití relashon seksual inmoral?

 Kiko tin den futuro pa religionnan ku ta produsí mal fruta? Hesus a spièrta: “Tur palu ku no ta duna bon fruta ta wòrdu gekap i tirá den kandela.” (Mateo 7:19) Sí, religion falsu lo ser di kap i destruí! Pero kon i na ki tempu esaki lo sosodé? Un vishon profétiko ku ta pará skirbí den e buki bíbliko di Revelashon, kapítulo 17 i 18, ta duna e kontesta.

Kon Religion Falsu Lo Yega na Su Fin?

Imaginá bo e esena. Un prostituta sintá riba lomba di un bestia spantoso. E bestia tin shete kabes i dies kachu. (Revelashon 17:1-4) Ken e prostituta aki ta representá? E tin influensia “riba e reinan di tera.” E ta bisti na púrpura, ta usa sensia i ta masha riku mes. Ademas, pa medio di su práktikanan spiritista òf di bruheria, ‘tur e nashonnan ta wòrdu gañá.’ (Revelashon 17:18; 18:12, 13, 23) Beibel ta yuda nos komprondé ku e prostituta aki ta un organisashon mundial religioso. E no ta representá un solo religion, sino tur religion ku ta produsí mal fruta.

E bestia ku e prostituta ta sintá riba dje ta representá e podernan polítiko di mundu. * (Revelashon 17:10-13) Religion falsu ta kore riba lomba di e bestia polítiko aki, tratando di influensiá e bestia su desishonnan i di kontrolá e direkshon ku e ta bai.

Sin embargo, pronto un suseso asombroso lo tuma lugá. “E dies kachunan ku bo a mira, i e bestia, esakinan lo odia e prostituta i lo hasié desolá i sunú, i lo kome su karni i lo kim’é kompletamente ku kandela.” (Revelashon 17:16) Ku un akshon repentino i spantoso, e podernan polítiko di mundu lo ataká religion falsu i destruyé kompletamente! Kiko lo motivá e akshon aki? E buki bíbliko di Revelashon ta kontestá: “Dios a pone den nan kurason pa ehekutá su propósito.” (Revelashon 17:17) Sí, Dios lo eksigí kuenta for di religion falsu pa tur e aktonan sumamente baho ku el a kometé den nòmber di Dios. Aktuando ku hustisia perfekto, Dios lo usa e amantenan polítiko di religion falsu komo su instrumento pa kaba ku religion falsu.

Kiko abo tin ku hasi si bo no ke kompartí e mesun fin ku religion falsu? Dios su mensahero ta urgi nos: “Sali for di dje, mi pueblo.” (Revelashon 18:4) Sí, awor ta e tempu pa sali for di religion falsu! Pero akaso esei ke men ku bo mester stòp di kere den Dios? Nò, keda sin kere den Dios tampoko no tin futuro. (2 Tesalonisensenan 1:6-9) E úniko refugio ta religion berdadero. Kon bo por identifiká religion berdadero?

 Kon pa Identifiká Religion Berdadero

Ki bon fruta religion berdadero lo mester produsí?—Mateo 7:17.

Religion Berdadero . . .

▪ TA PRAKTIKÁ AMOR: Adoradónan berdadero ‘no ta parti di mundu,’ no tin desunion den nan pa motibu di rasa òf kultura, i nan ta mustra “amor un pa otro.” (Juan 13:35; 17:16; Echonan 10:34, 35) En bes di mata otro, nan ta stima otro asina tantu ku nan ta dispuesto pa muri pa otro si ta nesesario.—1 Juan 3:16.

▪ TA KONFIA E PALABRA DI DIOS: Religion berdadero no ta siña “tradishon” ni “preseptonan di hende komo doktrina,” sino mas bien su doktrina ta basá riba e Palabra di Dios, Beibel. (Mateo 15:6-9) Dikon? Pasobra “tur Skritura ta inspirá pa Dios i ta útil pa siñansa, pa reprendementu, pa korekshon.”—2 Timoteo 3:16.

▪ TA FORTALESÉ FAMIANAN I TA PRAKTIKÁ I ENKURASHÁ NORMANAN MORAL HALTU: Religion berdadero ta siña esposonan “stima nan esposa manera nan mes kurpa.” E ta yuda esposanan kultivá ‘rèspèt profundo pa nan esposo.’ I e ta siña yunan ‘obedesé nan mayornan.’ (Efesionan 5:28, 33; 6:1) Ademas, e personanan konfiá ku puesto di responsabilidat mester tin un moralidat ehemplar.—1 Timoteo 3:1-10.

Tin un religion ku ta kumpli ku e normanan aki? E buki Holocaust Politics (Polítika di Holokousto), publiká na 2001, ta bisa: “Si tabatin mas hende ku ta praktiká vershonnan di loke Testigunan di Yehova ta prediká i praktiká, hende lo por a prevení e Holokousto, i genosidio lo no a kousa sufrimentu mas na mundu.”

En bèrdat, den 235 pais, Testigunan di Yehova no ta djis prediká e normanan moral di Beibel, nan ta biba di akuerdo ku nan. Nos ta enkurashá bo pa pidi Testigunan di Yehova yuda bo siña loke Dios ta rekerí di bo, ya asina bo por ador’é aseptablemente. Awor ta e tempu pa aktua. No tarda. E fin di religion falsu ta serka!—Sofonias 2:2, 3.

Si bo ta deseá mas informashon tokante e mensahe bíbliko ku Testigunan di Yehova ta prediká, sinti bo liber pa tuma kontakto ku nan na e adrès aki bou.

□ Mi ta deseá di haña sin ningun obligashon un ehemplar di e foyeto Keda Vigilá!

□ Por fabor, tuma kontakto ku mi pa un estudio di Beibel grátis na kas.

[Nota]

[Komentario na página 3]

Religion falsu tin influensia “riba e reinan di tera”

[Komentario na página 3]

“Sali for di dje, mi pueblo”