1, 2. Kiko ta motivá bo pa stima Yehova Dios?

BO STIMA Dios? Si bo a dediká bo mes kaba na dje, lo bo kontestá: “Klaru ku sí!” Stima Yehova Dios ta e kos di mas natural pa nos hasi, ya ku nos amor p’e ta debí na e amor ku e tin pa nos. Beibel ta ekspres’é asin’akí: “Pa loke ta nos, nos ta stima, pasobra Dios a stima nos promé.”—1 Huan 4:19.

² Yehova a tuma e inisiativa pa ekspresá su amor pa nos: El a duna nos un bunita kas terenal. E ta perkurá pa nos nesesidatnan material. (Mateo 5:43-48) Es mas, e ta sòru pa nos nesesidatnan spiritual. El a duna nos su Palabra, Beibel. Ademas, e ta invitá nos pa resa na dje, ku e garantia ku lo e tende nos i duna nos su spiritu santu pa yuda nos. (Salmo 65:2; Lukas 11:13) Mas ku tur kos, el a manda su Yu mas stimá komo nos Reskatador pa libra nos for di piká i morto. Ki un gran amor Yehova a demostrá na nos!—Huan 3:16; Romanonan 5:8.

3. (a) Kiko nos mester hasi pa keda den e amor di Dios? (b) Ki pregunta importante nos tin ku analisá, i unda nos ta haña e kontesta?

³ Yehova ke pa nos benefisiá di su amor pa semper. Sinembargo, ta dependé di nos si nos realmente lo  benefisiá òf nò. E Palabra di Dios ta urgi nos: “Keda den e amor di Dios . . . ku bida eterno na bista.” (Hudas 20, 21) Esaki ta rekerí akshon di nos parti. Nos tin ku reakshoná riba su amor ku obranan spesífiko. Pues, un pregunta importante pa nos pensa ariba ta: ‘Kon mi por demostrá mi amor pa Dios?’ Nos ta haña e kontesta den e palabranan inspirá di apòstel Huan: “Amor pa Dios ta nifiká ku nos ta kumpli ku su mandamentunan; sinembargo, su mandamentunan no ta pisá.” (1 Huan 5:3) Pues, ta bon pa nos analisá kuidadosamente kiko e palabranan akí ta nifiká, pasobra nos ke demostrá nos Dios kuantu nos stim’é.

4, 5. Deskribí kon amor pa Yehova a kuminsá krese den bo kurason.

⁴ “Amor pa Dios.” Kiko apòstel Huan tabatin na mente ora el a skirbi e palabranan ei? El a referí na e sintimentunan profundo ku nos kada un tin pa Dios. Abo ta kòrda ora ku amor pa Yehova a kuminsá krese den bo kurason?

⁵ Pensa un ratu riba e tempu ei. Segun ku bo a siña e bèrdat tokante Yehova i su propósito, bo fe a kuminsá krese. Bo a bin komprondé ku bo a nase pekadó, i ku ta p’esei bo no tabatin un relashon ku Dios. Pero asina mes, Yehova a habri kaminda pa bo haña bida eterno i alkansá e perfekshon ku Adam a pèrdè. El a hasi esei pa medio di Kristu. (Mateo 20:28; Romanonan 5:12, 18) Bo a bin realisá ku ta un gran sakrifisio Yehova a hasi ora el a manda su Yu mas stimá pa muri pa bo. E gran amor ei ku Dios a demostrá a konmové bo kurason asina tantu ku bo a kuminsá sinti un amor p’e.—1 Huan 4:9, 10.

6. Kon nos ta demostrá berdadero amor, i kiko amor pa Dios a motivá bo pa hasi?

⁶ Sinembargo, e sintimentu ei tabata apénas e kuminsamentu di berdadero amor pa Yehova. Amor no ta djis un sintimentu; tampoko e no ta palabra so. Berdadero amor pa Dios ta enserá mas ku djis bisa: “Mi stima Yehova.” Meskos ku fe, berdadero amor ta keda demostrá pa medio di obra. (Santiago 2:26) Ora nos ta stima un persona, nos ta demostrá esei hasiendo kosnan ku ta agradá e persona ku nos ta stima. Pues, ora amor pa Yehova a saka rais den bo kurason, bo a sinti bo motivá pa biba na un manera ku ta agradá bo Tata selestial. Bo ta un Testigu di Yehova batisá? Wèl, ta bo kariño profundo i deboshon pa Dios a motivá bo pa tuma e desishon di mas  importante den bo bida: Bo a dediká bo mes na Yehova pa hasi su boluntat, i bo a simbolisá bo dedikashon pa medio di boutismo. (Romanonan 14:7, 8) Pa kumpli ku e promesa solèm akí, nos tin ku hasi loke apòstel Huan a sigui bisa.

7. (a) Menshoná algun mandamentu spesífiko di Dios. (b) Kon bo por demostrá ku bo ta kumpli ku e mandamentunan akí?

⁷ Huan a splika kiko amor pa Dios ta nifiká: “Nos ta kumpli ku su mandamentunan.” Kua ta e mandamentunan di Dios? Den Beibel, Yehova a duna nos vários mandamentu spesífiko. Por ehèmpel, e ta prohibí buracheria, fornikashon, idolatria, hòrtamentu i gañamentu. (1 Korintionan 5:11; 6:18; 10:14; Efesionan 4:28; Kolosensenan 3:9) ‘Kumpli ku e mandamentunan di Dios’ ta enserá biba na armonia ku e normanan moral ku Beibel ta splika klaramente.

8, 9. Kon nos por sa kiko ta agradá Yehova asta den situashonnan kaminda no tin un lei bíbliko spesífiko? Duna un ehèmpel.

⁸ Kiko nos tin ku hasi pa nos agradá Yehova? Wèl, nos tin ku hasi mas ku djis obedesé su leinan; nos mester siña konosé Yehova su manera di pensa. Yehova no a pone lei ku ta dirigí delaster un stap ku nos ta dal. Lo tin biaha ku Beibel no ta bisa nada direktamente tokante un asuntu. Den kasonan asina, kon nos por sa si Yehova lo keda kontentu ku loke nos tin pensá di hasi? Wèl, Beibel ta siña nos bon kla kon Yehova ta pensa. Anto segun ku nos ta studia Beibel, nos lo haña sa kiko Yehova ta gusta i kiko e ta odia. (Salmo 97:10; Proverbionan 6:16-19) Asina nos ta siña distinguí aktitut i akshon ku ta agrad’é. Mas nos siña tokante e personalidat i manera di aktua di Yehova, mas su manera di pensa lo por guia nos ora  di tuma desishon i influensiá loke nos ta hasi. Pues, asta den situashonnan kaminda no tin un lei di Beibel spesífiko, nos por saka afó “kiko ta e boluntat di Yehova.”—Efesionan 5:17.

⁹ Por ehèmpel, den Beibel no tin un mandamentu spesífiko ku ta taha nos di wak pelíkula òf programa di televishon violento òf inmoral. Akaso nos tin mester di un lei spesífiko ku ta prohibí nos di wak e kosnan ei? Nos sa kaba kiko ta e punto di bista di Yehova di e kosnan ei. Su Palabra ta bisa nos bon kla: “Esun ku ta gusta violensia [Yehova] su alma ta odia.” (Salmo 11:5) Beibel ta bisa tambe: “Dios lo husga esnan ku ta kometé fornikashon i adulterio.” (Hebreonan 13:4) Ora nos reflekshoná riba e palabranan inspirá ei, nos ta komprondé bon kla kiko ta e boluntat di Yehova. P’esei nos ta disidí pa no dibertí nos mes ku programanan ku ta presentá ku luho di detaye e sorto di práktikanan ei ku nos Dios ta odia. Nos sa ku Yehova ta keda kontentu ora nos ta evitá e sushedat moral ku e mundu akí ke laga nos kere ta dibertishon inofensivo. *

10, 11. Dikon nos ta skohe pa obedesé Yehova, i ku ki aktitut nos ta obedes’é?

¹⁰ Kua ta e motibu prinsipal ku nos ta kumpli ku e mandamentunan di Dios? Pakiko nos ke biba tur dia manera Dios ke? Nos no ta biba asina djis pa skapa kastigu òf pa evitá e mal konsekuensianan ku esnan ku ta ignorá e boluntat di Dios ta eksperensiá. (Galationan 6:7) Mas bien, nos ta konsiderá nos obedensia na Yehova komo un bon oportunidat pa demostrá ku nos ta stim’é. Meskos ku un mucha ta ansioso pa haña e aprobashon  di su tata, asina nos ta deseá di haña e aprobashon di Yehova. (Salmo 5:12) E ta nos Tata, i nos stim’é. No tin nada ku ta duna nos mayor goso i satisfakshon ku sa ku e manera ku nos ta biba tin e aprobashon di Yehova.—Proverbionan 12:2.

¹¹ Pues, nos no ta obedesé Dios di mala gana, ni na un manera selektivo ni ku kondishon. * Nos no ta obedes’é solamente ora ta kumbiní nos òf ora ta fásil pa obedesé. Al kontrario, nos ta “obediente di kurason.” (Romanonan 6:17) Nos ta bisa meskos ku e eskritor di salmo: “Lo mi tin delisia den bo mandamentunan ku mi ta stima.” (Salmo 119:47) Sí, ta un plaser pa obedesé Yehova. Nos ta rekonosé ku e meresé—i di echo ta rekerí—pa nos obedes’é sin ningun kondishon. (Deuteronomio 12:32) Patriarka Noe a obedesé Dios fielmente pa hopi dékada i asina a demostrá kuantu e ta stim’é. Nos ke pa Yehova bisa di nos loke su Palabra ta bisa di Noe. Beibel ta bisa: “Asina Noe a hasi; konforme tur loke Dios a orden’é, el a hasi.”—Génesis 6:22.

12. Ki ora nos obedensia ta hasi Yehova su kurason kontentu?

¹² Kon Yehova ta sintié ora e mira nos obedes’é di buena gana? Su Palabra ta bisa ku nos ta ‘hasi su kurason kontentu.’ (Proverbionan 27:11) Pero, di bèrdat nos obedensia por alegrá e kurason di e Señor Soberano di universo? Klaru ku sí! Laga nos wak dikon. Yehova a krea nos ku boluntat liber. Esei ta nifiká ku nos tin e libertat di skohe; nos por skohe pa obedesé Dios, òf nos por skohe pa desobedes’é. (Deuteronomio 30:15, 16,  19, 20) Kada bes ku nos skohe boluntariamente pa obedesé Yehova pasobra nos ta stim’é di henter nos kurason, nos ta duna nos Tata selestial gran goso i satisfakshon. (Proverbionan 11:20) A la bes nos ta skohiendo e mihó manera di biba.

13, 14. Dikon nos por bisa ku Dios “su mandamentunan no ta pisá,” i kon nos por ilustrá esei?

¹³ Apòstel Huan ta agregá algun palabra trankilisante tokante e rekisitonan di Yehova: “Su mandamentunan no ta pisá.” * Un otro tradukshon di Beibel ta bisa na 1 Huan 5:3: “Su mandamentunan no ta un peso pa nos.” (Beibel na papiamentu koriente) E rekisitonan di Yehova no ta irasonabel ni opresivo. Apesar ku hende ta imperfekto, no ta imposibel pa nan obedesé su leinan.

¹⁴ Nos lo por ilustrá esei asin’akí. Un bon amigu ta pidi bo yud’é muda pa un otro kas. E tin hopi kaha pa bai kuné. Algun di nan, un hende so por karga, pero tin otro ku ta pisá i mester di dos hende pa hisa nan. Bo amigu ta skohe e kahanan ku e ke pa bo yud’é kuné. Lo e pidi bo hisa e kahanan ku e sa ta muchu pisá pa bo? Nò. Lo e no ke pa bo sinti bo lomba ora bo purba karga nan bo so. Asina tambe, nos Dios amoroso i bondadoso no ta pidi nos kumpli ku mandamentunan ku ta muchu difísil pa nos. (Deuteronomio 30:11-14)  Nunka lo e no pidi nos karga un peso asina pisá. Yehova ta komprondé nos limitashonnan, pasobra “e sa di kiko nos ta trahá; e ta kòrda ku ta stòf nos ta.”—Salmo 103:14.

15. Dikon nos por ta sigur ku e mandamentunan di Yehova ta pa nos mes bon?

¹⁵ Yehova su mandamentunan definitivamente no ta pisá; al kontrario, nan ta pa nos mes bon. (Isaías 48:17) P’esei Moises por a bisa Israel di antigwedat: “SEÑOR a ordená nos pa kumpli ku tur e statutonan akí, pa semper teme SEÑOR nos Dios pa nos mes bon, i pa nos sobrebibí, manera ta awe.” (Deuteronomio 6:24) Nos tambe por ta sigur ku e echo ku Yehova a duna nos su leinan ta pasobra e tin nos bienestar na pechu, sí, nos bienestar eterno. En realidat, esei no por ta otro; Yehova ta un Dios di sabiduria infinito. (Romanonan 11:33) Pues, e sa kiko ta mihó pa nos. Ademas, Yehova ta amor en persona. (1 Huan 4:8) Amor, e parti esensial di Dios, ta motiv’é den tur loke e ta hasi i bisa. Amor ta e base di tur mandamentu ku e ta duna su sirbidónan.

16. Kon bini nos por sigui obedesé Dios apesar di e influensia di e mundu degradá akí i di nos karni imperfekto?

¹⁶ Esaki no ke men ku ta fásil pa obedesé Dios. Nos tin ku lucha kontra e influensianan di e mundu degradá akí ku “ta den poder di e Malbado.” (1 Huan 5:19) Tambe nos tin ku lucha kontra nos karni imperfekto ku ta inkliná pa bai kontra e leinan di Dios. (Romanonan 7:21-25) Pero nos amor pa Dios por triunfá den e lucha akí. Yehova ta bendishoná hende ku ke obedes’é pasobra nan stim’é. E ta duna su spiritu santu “na esnan ku ta obedes’é.” (Echonan 5:32) E spiritu ei ta produsí bon fruta den nos, esta, kualidatnan ekselente ku por yuda nos sigui obedesé Dios.—Galationan 5:22, 23.

17, 18. (a) Kiko nos lo analisá den e buki akí, i kiko nos tin ku kòrda segun ku nos ta hasi esaki? (b) Kiko nos lo konsiderá den e siguiente kapítulo?

 ¹⁷ Den e buki akí nos lo bai analisá Yehova su prinsipionan * i normanan moral i tambe hopi otro indikashon di kiko ta su boluntat. Segun ku nos ta hasi esei, nos tin ku kòrda algun punto importante. Di promé, Yehova no ta obligá nos obedesé su lei- i prinsipionan; e ke pa nos obedes’é di kurason. Di dos, e manera ku Yehova ke pa nos biba ta trese hopi benefisio awor i lo hiba na bida eterno den futuro. Por último, no lubidá ku obedesé Yehova di kurason ta un oportunidat magnífiko pa demostr’é kuantu nos ta stim’é.

¹⁸ Pa yuda nos distinguí bon for di malu, Yehova, komo muestra di su amor, a duna nos un regalo: nos konsenshi. Pero pa nos konsenshi por ta un guia konfiabel, nos tin ku eduk’é. Nos lo bai konsiderá kon ta hasi esaki den e siguiente kapítulo.