1, 2. Menshoná algun ehèmpel di hendenan ku Yehova a konsiderá komo su amigunan íntimo.

KI KLASE di persona lo bo skohe komo amigu òf amiga? Muy probablemente lo bo ke kompania di un hende ku ta kompartí bo punto di bista, bo interesnan i norma- i balornan. Ademas, lo bo sinti bo atraí na un persona ku tin bon kualidatnan, manera onrades i bondat.

² Atraves di henter historia, Dios a skohe sierto hendenan komo su amigunan íntimo. Por ehèmpel, Yehova a yama Abraham su amigu. (Isaias 41:8; Santiago 2:23) Dios a referí na David komo “un hòmber konforme mi kurason” pasobra e tabata e klase di persona ku Yehova ta stima. (Echonan 13:22) I Yehova a konsiderá profeta Daniel komo un persona “masha stimá.”—Daniel 9:23.

3. Dikon Yehova a skohe sierto hendenan komo su amigu?

³ Dikon Yehova a konsiderá Abraham, David i Daniel komo su amigunan? Wèl, el a bisa Abraham: “Bo a obedesé mi bos.” (Génesis 22:18) Pues Yehova ta hala serka di e personanan ku humildemente ta hasi loke e ta pidi di nan. El a bisa e israelitanan: “Obedesé mi bos i lo mi ta boso Dios i boso lo ta mi pueblo.” (Jeremias 7:23) Si abo obedesé Yehova, bo tambe por bira su amigu!

4, 5. Kon Yehova ta sostené su pueblo fuertemente?

⁴ Pensa un ratu riba e benefisionan di un amistat ku Dios. Beibel ta bisa ku Yehova ta en buska di oportunidat “pa e por sostené fuertemente esnan ku nan kurason ta kompletamente di dje.” (2 Krónikanan 16:9) Kon Yehova por sostené bo fuertemente? Salmo 32:⁠8 ta indiká un manera. Ei Yehova ta bisa: “Lo mi instruí bo i siña bo e kaminda ku bo tin ku kana; lo mi konsehá bo; mi wowo ta riba bo.”

⁵ Ki un ekspreshon konmovedor di Yehova su kuido i interes! Lo e duna bo e guia nesesario i protehá bo segun ku bo ta aplik’é. Dios ke yuda bo pasa ku éksito dor di bo difikultatnan i tèstnan. (Salmo 55:22) Pues si bo ta sirbi Yehova ku un kurason kompletu, bo por tin e mesun konfiansa ku e salmista ku a bisa: “Mi a pone SEÑOR semper mi dilanti; pasobra e ta na mi man drechi, lo mi no wòrdu moví.” (Salmo 16:8; 63:8) Sí, Yehova por yuda bo biba na un manera ku ta agrad’é. Pero manera bo sa, Dios tin un enemigu ku lo ke stroba bo di hasi esei.

6. Ki akusashon Satanas tabatin relashoná ku hende?

⁶ Kapítulo 11 di e buki aki a splika kon Satanas e Diabel a kuestioná Dios su soberania. Satanas a akusá Dios di ta gaña i a bisa indirektamente ku no tabata hustu ku Yehova no a laga Adam ku Eva disidí pa nan mes loke ta bon i loke ta malu. Despues ku Adam ku Eva a peka i e tera a kuminsá yena ku nan desendientenan, Satanas a kuestioná tur hende su motibu pa aktua. Satanas su akusashon tabata: “Hende no ta sirbi Dios pasobra nan stim’é. Duna mi un chèns, i mi por bira kualke hende kontra Dios.” E relato di e hòmber Jòb ta mustra ku ta esaki ta loke Satanas a kere. Ken Jòb tabata, i kon e tabata enbolbí den Satanas su desafio?

7, 8. (a) Dikon Jòb a destaká entre e hendenan di e tempu ei? (b) Kon Satanas a kuestioná Jòb su motibu pa sirbi Dios?

 ⁷ Jòb a biba un 3.600 aña pasá. E tabata un bon hende, pasobra Yehova a bisa: “No tin ningun hende manera é riba tera, un hende perfekto i rekto, ku ta teme Dios i ku ta apartá su mes for di maldat.” (Jòb 1:8) Jòb a agradá Dios.

⁸ Satanas a kuestioná Jòb su motibu pa sirbi Dios. Diabel a bisa Yehova: “Bo no a traha un trankera rònt di [Jòb], rònt di su kas, i rònt di tur loke e tin na tur banda? Bo a bendishoná e trabou di su man, i su propiedatnan a oumentá den e tera. Ma saka bo man awor i mishi ku tur loke e tin; siguramente e lo maldishoná bo den bo kara.”—Jòb 1:10, 11.

9. Kon Yehova a reakshoná riba e desafio di Satanas, i dikon?

⁹ Pues, Satanas a argumentá ku Jòb a sirbi Dios djis pa loke e tabata haña a kambio. Tambe Diabel a bin ku e akusashon ku si pone Jòb na prueba, lo el a bira kontra Dios. Kon Yehova a reakshoná riba e akusashon òf desafio di Satanas? Siendo ku e kuestion tabatin keber ku Jòb su motibu pa sirbi Dios, Yehova a permití Satanas tèst Jòb. Di e manera aki, lo a keda demostrá bon kla si Jòb tabata stima Dios òf nò.

10. Ki pruebanan Jòb a konfrontá, i kon el a reakshoná?

¹⁰ Poko despues Satanas a tèst Jòb den vários manera. Un parti di Jòb su bestianan a ser hòrtá, i otronan a ser matá. Mayoria di su sirbidónan a ser matá. Esaki a trese problema ekonómiko. Un otro tragedia a tuma lugá ora ku Jòb su dies yunan a muri den un tormenta. Pero apesar di e susesonan teribel aki, “Jòb no a peka ni e no a kulpa Dios.”—Jòb 1:22.

11. (a) Ki di dos akusashon Satanas a hasi relashoná ku Jòb, i kon Yehova a reakshoná? (b) Kon Jòb a reakshoná riba su malesa doloroso?

¹¹ Satanas no a entregá. Lo e mester a pensa ku maske Jòb  por a soportá e pèrdida di su propiedatnan, sirbidónan i yunan, sigur lo e bai kontra Dios si e bira malu. Yehova a laga Satanas dal Jòb ku un malesa repugnante i doloroso. Pero ni esaki no a pone Jòb pèrdè su fe den Dios. Al kontrario, el a bisa ku firmesa: “Te na mi morto lo mi no bandoná mi integridat.”—Jòb 27:5.

12. Kon Jòb su kondukta a duna prueba ku e akusashon di Diabel tabata falsu?

¹² Jòb no tabata sa ku ta Satanas tabata e kousa di su problemanan. Komo ku e no tabata sa e detayenan di e desafio ku Diabel a lantá kontra Yehova su soberania, Jòb a teme ku ta Dios tabata e fuente di su problemanan. (Jòb 6:4; 16:11-14) Pero tòg el a mantené su integridat na Yehova. Anto dor di keda fiel Jòb a duna prueba ku Satanas su akusashon, di ku el a sirbi Dios pa motibunan egoista, tabata falsu.

13. Kiko a sosodé pasobra Jòb tabata fiel na Dios?

¹³ Jòb su fieldat a permití Yehova duna Satanas un bon kontesta kontra su akusashon ofensivo. Jòb di bèrdat tabata Yehova su amigu, i Dios a rekompens’é pa e manera fiel ku el a aktua.—Jòb 42:12-17.

14, 15. Dikon nos por bisa ku e akusashon di Satanas relashoná ku Jòb ta konta pa tur hende?

¹⁴ E kuestion di integridat na Dios ku Satanas a lanta no tabata dirigí kontra Jòb so. Abo tambe ta enbolbí. Proverbionan 27:11 ta mustra esaki bon kla. Einan e Palabra di Yehova ta bisa: “Sea sabí, mi yu, i hasi mi kurason kontentu, pa mi por kontestá esun ku reprochá mi.” E palabranan aki, skirbí sientos di aña despues di Jòb su morto ta indiká ku Satanas ta esun prinsipal ku ta reprochá Dios i akusá Su sirbidónan. Si nos ta biba na un manera ku ta agradá Yehova, eigenlijk nos ta yuda duna un kontesta na e akusashonnan falsu di Satanas, i asina nos ta hasi Dios  su kurason kontentu. Kon esei ta laga bo sinti? Lo no ta maravioso di por tin parti den kontestá e akusashonnan falsu di Diabel, asta si esei ta nifiká ku bo tin ku hasi sierto kambionan den bo bida?

¹⁵ Tuma nota di loke Satanas a bisa: “Tur loke un hende tin e lo duna pa su bida.” (Jòb 2:4) Dor di bisa “un hende,” Satanas a mustra bon kla ku su akusashon no tabata konta pa Jòb so sino pa tur hende. Esei ta un punto hopi importante. Satanas a kuestioná bo integridat na Dios. Diabel lo ke mira bo desobedesé Dios i bandoná e kaminda di hustisia ora ku difikultatnan surgi. Kon Satanas lo por purba logra esei?

16. (a) Ki métodonan Satanas ta usa pa purba apartá hende for di Dios? (b) Kon Diabel lo por usa e métodonan aki kontra bo?

¹⁶ Manera nos a konsiderá den Kapítulo 10, Satanas ta usa vários método pa apartá hende for di Dios. Na un banda, e ta ataká “manera un leon ku ta gruña, buskando ken e por devorá.” (1 Pedro 5:8) Pues lo bo por mira Satanas su influensia ora ku amigu, famia òf otro hende ta bai kontra di bo esfuerso pa studia Beibel i apliká loke bo ta siña. * (Juan 15:19, 20) Di otro banda, Satanas ta sigui “disfrasá su mes komo un angel di lus.” (2 Korintionan 11:⁠14) Diabel por usa medionan sutil pa gaña bo i kita bo di biba na un manera ku ta agradá Dios. E por usa desanimashon tambe, podisé dor di laga bo sinti ku bo no ta sufisiente bon pa agradá Dios. (Proverbionan 24:10) Sea ku Satanas ta aktua manera “un leon ku ta gruña” òf manera “un angel di lus,” su akusashon ta keda meskos: E ta bisa ku ora bo ta konfrontá difikultat òf tentashon, lo bo stòp di sirbi Dios. Kon  bo por kontestá su akusashon i demostrá bo integridat na Dios, manera Jòb a hasi?

17. Kiko ta e motibu prinsipal pa obedesé Yehova su mandamentunan?

¹⁷ Bo por kontestá e desafio di Satanas dor di biba na un manera ku ta agradá Dios. Kiko esaki ta enserá? Beibel ta kontestá: “Stima SEÑOR bo Dios ku henter bo kurason, ku henter bo alma i ku tur bo forsa.” (Deuteronomio 6:5) Segun ku bo amor pa Dios ta krese, mas grandi bo deseo ta bira pa hasi loke e ta rekerí di bo. Apòstel Juan a skirbi: “Esaki ta e amor di Dios, ku nos ta warda su mandamentunan.” Anto si bo ta stima Yehova di henter bo kurason, lo bo ripará ku “su mandamentunan no ta pisá.”—1 Juan 5:3.

18, 19. (a) Menshoná algun di Yehova su mandamentunan. (Wak e kuadro na página 122.) (b) Kon nos por sa ku Dios no ta pidiendo demasiado for di nos?

¹⁸ Kiko Yehova su mandamentunan ta? Algun di nan ta enserá kondukta ku nos tin ku evitá. Por ehèmpel, tuma nota di e kuadro titulá  “Evitá Loke Yehova Ta Odia.” Einan bo ta haña un lista di e tipo di kondukta ku Beibel klaramente ta kondená. Na promé bista, algun di e práktikanan riba e lista kisas no ta parse dje malu ei. Pero despues ku bo meditá riba e tekstonan bíbliko menshoná, lo bo mira probablemente e sabiduria di e leinan di Yehova. Hasi kambio den bo kondukta por ta e reto di mas grandi ku bo a yega di konfrontá. Sin embargo, biba na un manera ku ta agradá Dios ta duna gran satisfakshon i felisidat. (Isaias 48:17, 18) I e ta algu ku ta na bo alkanse. Kon nos por sa esei?

¹⁹ Yehova nunka no ta pidi di nos mas di loke nos por hasi. (Deuteronomio 30:11-14) E konosé nos potensial i  nos limitashonnan mas mihó ku nos mes. (Salmo 103:14) Es mas, Yehova por duna nos e fortalesa pa obedes’é. Apòstel Pablo a skirbi: “Dios ta fiel, kende lo no permití pa boso wòrdu tentá mas ku boso por soportá, ma huntu ku e tentashon e lo proveé salida tambe, pa boso por soportá.” (1 Korintionan 10:13) Pa yuda bo soportá, Yehova por asta duna bo “poder mas ayá di loke ta normal.” (2 Korintionan 4:7, NW) Despues ku Pablo a soportá hopi difikultat, e por a bisa: “Pa tur kos mi tin e forsa den birtut di esun ku ta duna mi poder.”​—Filipensenan 4:13, NW.

20. Ki kualidatnan ku ta agradá Dios bo mester desaroyá, i pakiko nan ta importante?

²⁰ Klaru ku agradá Yehova ta enserá mas ku djis evitá loke e ta odia. Tambe bo tin ku stima loke e ta stima. (Romanonan 12:9) Bo ta sinti bo atraí na hende ku ta kompartí bo punto di bista, bo interesnan i norma- i balornan, no ta asina? Yehova tambe. P’esei siña stima e kosnan ku Yehova ta stima. Salmo 15:1-5 ta deskribí algun di e kosnan aki, i einan nos ta lesa tokante e hendenan ku Dios ta  konsiderá su amigu. Amigunan di Yehova ta desplegá loke Beibel ta yama “fruta di e spiritu.” E ta inkluí kualidatnan manera “amor, goso, pas, pasenshi, kariño, bondat, fieldat, mansedumbre, dominio propio.”—Galationan 5:22, 23.

21. Kiko lo yuda bo desaroyá kualidatnan ku Yehova ta stima?

²¹ Lesa i studia Beibel regularmente lo yuda bo desaroyá kualidatnan ku Yehova ta stima. I siña loke Dios ta rekerí, lo yuda bo pone bo pensamentunan na armonia ku Dios su manera di pensa. (Isaias 30:20, 21) Mas bo fortalesé bo amor pa Yehova, mas grandi bo deseo pa biba na un manera ku ta agradá Dios lo ta.

22. Kiko lo bo logra si bo ta biba na un manera ku ta agradá Dios?

²² Pa biba na un manera ku ta agradá Yehova ta rekerí esfuerso. Beibel ta kompará e proseso di kambia bo bida ku kitamentu di bo personalidat bieu i bistimentu di un nobo. (Kolosensenan 3:9, 10) Pero relashoná ku e mandamentunan di Yehova, e salmista a skirbi: “Obedensia na nan ta trese gran rekompensa kuné.” (Salmo 19:11) Abo tambe lo ripará ku biba na un manera ku ta agradá Dios tin hopi rekompensa. Dor di hasi esei, lo bo duna un kontesta na e desafio di Satanas i hasi Yehova su kurason kontentu!