1. Ki ora tabata sin duda e pió momento di Pedro su bida?

PEDRO hamas lo por lubidá e momento ei. Kiko el a wak den e mirada di Hesus ora nan bista a topa? Desepshon òf reproche? Nos no sa, pasobra e relato inspirá ta djis bisa ku “Señor a bira wak Pedro.” (Luk. 22:61) Pero e solo mirada ei tabata sufisiente pa Pedro realisá kon grave el a faya. El a kaba di hasi presis loke Hesus a profetisá ku lo e hasi pero ku e mes a hura ku hamas lo e hasi, esta, nenga ku e konosé su Maestro stimá. Esaki sin duda tabata e pió momento di Pedro su bida.

2. Kiko Pedro mester a siña, i kon nos por benefisiá di su eksperensia?

² Akaso tur kos a kaba pa Pedro? Nò. Komo ku Pedro tabata un hòmber di hopi fe, el a haña oportunidat di arepentí di su fayo i drecha su relashon ku Hesus. Tambe el a siña for di Hesus un lès importante tokante pordon. Esei ta algu ku nos tur mester siña. Pues, laga nos wak kon Pedro a siña e lès difísil akí.

3, 4. (a) Kiko Pedro a puntra Hesus, i probablemente dikon? (b) Kon Hesus a laga Pedro mira ku su manera di pensa a ser influensiá pa e hendenan rònt di dje?

³ Un seis luna promé, Pedro tabata na Kapernaum, su pueblo natal. El a bai serka Hesus i a puntr’é: “Señor, kuantu biaha mi ruman por peka kontra mi i mi mester pordon’é? Te ku shete biaha?” Pedro lo a kere ku e tabata masha generoso, pasobra segun e lidernan religioso di e tempu ei ta tres biaha so mester a pordoná un hende. Ma Hesus a kontest’é: “No te ku shete biaha, sino te ku 77 biaha.”—Mat. 18:21, 22.

⁴ Akaso Hesus tabata ke pa Pedro tene un registro di kuantu biaha un persona a peka kontra dje? Nò; mas bien, ora Hesus a kambia Pedro su 7 pa 77, e kier a indiká ku bo no ta mustra ku bo stima un persona si bo ta pone un límite na e kantidat di biaha ku bo ta pordon’é. (1 Kor. 13:​4, 5) Hesus a laga Pedro mira ku su manera di pensa a ser influensiá pa e mentalidat di e hendenan rònt di dje. Nan  tabatin un kurason duru i no tabata dispuesto pa pordoná otro. Asta si nan a pordoná mes, nan tabata tene registro di esei manera un akountent! Sinembargo, hende ku ke imitá Dios mester ta dispuesto pa pordoná otro libremente i bes tras bes.—Lesa 1 Huan 1:7-9.

5. Na ki momento nos ta realisá kon importante pordon ta?

⁵ Pedro no a para pusta boka ku Hesus. Pero e palabranan di su Maestro realmente a yega su kurason? Hopi biaha nos ta bin komprondé e importansia di pordon ora otro hende tin ku pordoná nos. Esei ta loke a pasa djis promé ku Hesus su morto. Durante e oranan difísil ei, Pedro a kometé vários fayo pa kua su Maestro mester a pordon’é.

6. Kon Pedro a reakshoná ora Hesus a purba di siña su apòstelnan un lès di humildat, i kon Hesus a trata kuné?

⁶ Tabata un anochi masha importante: e último anochi di Hesus su bida komo ser humano. Ainda e tabatin hopi kos di siña su apòstelnan. Por ehèmpel, el a siña nan un bunita lès di humildat. Kon? Wèl, el a laba nan pia; algu ku normalmente e kriá di mas abou tabata hasi. Na promé instante, Pedro a kuestioná loke Hesus kier a hasi. Despues el a nenga di laga Hesus laba su pia. Kaba el a insistí pa Hesus laba no su pia so, sino tambe su man i su kabes! Pero Hesus no a pèrdè pasenshi kuné. El a splika trankilamente dikon loke el a hasi tabata importante i kiko esei a nifiká.—Huan 13:1-17.

7, 8. (a) Menshoná algun manera mas ku Pedro a pone Hesus su pasenshi na prueba. (b) Kon Hesus a sigui demostrá un aktitut bondadoso i kla pa pordoná?

⁷ Djis despues di esei, Pedro a bolbe pone Hesus su pasenshi na prueba. E apòstelnan a kuminsá diskutí tokante kua di nan tabata esun di mas importante. Kasi sigur Pedro tambe a tuma parti den e diskushon bergonsoso akí ku a saka na kla nan sintimentunan di orguyo. Apesar di esei, Hesus a korigí nan bondadosamente i asta a elogiá nan pa algu bon ku nan a hasi: nan a keda fiel na nan Maestro. Pero Hesus a profetisá tambe ku mas lat nan tur lo a bandon’é. Mesora Pedro a kontestá ku e sí lo a keda fiel na Hesus, te na morto si tabata nesesario. Ma Hesus a bis’é ku nèt lo kontrario lo a bai pasa: E anochi ei mes, promé ku gai kanta dos biaha, Pedro lo a nenga tres biaha ku e konosé su Maestro. I Pedro e ora ei, no solamente a kontradisí Hesus, sino asta a broma ku lo e ta mas fiel ku tur e otro apòstelnan!—Mat. 26:31-35; Mar. 14:27-31; Luk. 22:24-28; Huan 13:36-38.

⁸ Akaso awor sí Hesus a pèrdè pasenshi ku Pedro? Nò. Asta den e momentonan difísil ei pa Hesus, el a sigui konsentrá riba e bon  kualidatnan di su apòstelnan imperfekto. Aunke e tabata sa ku Pedro lo a lag’é na kaya, tòg el a bis’é: “Mi a supliká Dios pa bo, pa bo fe no debilitá, i abo, unabes bo arepentí, fortalesé bo rumannan.” (Luk. 22:32) Pues, Hesus a demostrá ku e tabata konvensí ku Pedro lo arepentí di su fayo i sigui sirbi Dios fielmente. Ki un aktitut bondadoso i kla pa pordoná!

9, 10. (a) Dikon Hesus mester a korigí Pedro den Hòfi di Getsémani? (b) Kiko e kaso di Pedro ta laga nos kòrda?

⁹ Mas despues, den e Hòfi di Getsémani, Hesus mester a korigí Pedro vários biaha. Hesus tabata den un doló emoshonal intenso i tabatin mester di e sosten di su amigunan. Pues, el a pidi Pedro, Santiago ku Huan pa keda lantá miéntras ku e tabata hasi orashon. Pero Pedro i e otro dosnan tabata blo pega soño. Hesus a komprondé pa nan i a pordoná nan, p’esei el a bisa: “E spiritu tin e boluntat, ma e karni ta débil.”—Mar. 14:32-41.

¹⁰ Poko despues, a yega un multitut di hende ku antorcha i armá ku spada i klòp. Tabata un momento pa aktua ku prudensia i ku kuidou. Ma Pedro a hasi nèt lo kontrario. Sin pensa dos bes, el a bula saka su spada i a kap e orea di Malko, un esklabo di e sumo saserdote, kita afó. Den e situashon akí tambe Hesus a keda trankil. El a korigí Pedro i kura e orea di Malko. Ademas, el a splika su disipelnan pakiko nan no mester usa violensia, i te awe su siguidónan ta sigui e prinsipio ei. (Mat. 26:47-55; Luk. 22:47-51; Huan 18:10, 11) Ta bisto ku Pedro a kometé hopi fayo pa kua Hesus mester a pordon’é. Su situashon ta laga nos kòrda ku nos tur tambe ta peka hopi biaha, i tur dia nos mester di e pordon di Dios. (Lesa Santiago 3:2.) Pero pa Pedro, e anochi ei no a kaba. Lo peor mester a bini ainda.

11, 12. (a) Kon Pedro a demostrá sierto grado di kurashi despues ku nan a arestá Hesus? (b) Kiko Pedro a broma ku lo e hasi, i kon el a faya ku esei?

¹¹ Hesus a bisa e multitut ku si ta é nan tabata buska, nan mester a laga e apòstelnan bai. Pedro mester a para mira nan mara Hesus, sin ku e por a hasi nada. Despues el a hui bai, meskos ku e otro apòstelnan.

¹² Pedro ku Huan a stòp di hui na mitar di kaminda. Kisas nan tabata serka di kas di Anas, e eks sumo saserdote, kaminda nan a hiba Hesus na promé instante pa interog’é. Ora e hendenan tabata bai ku Hesus for di einan, Pedro ku Huan a sigui nan, pero “na un bon distansia.” (Mat. 26:58; Huan 18:12, 13) Nos no por bisa ku ­Pedro tabata un kobarde. E echo ku el a sigui un multitut di hende armá ta indiká ku e mester tabatin kurashi. Anto no lubidá ku el a heridá un di nan kaba. Pero tòg nos no a mira Pedro demostrá e tipo di lealtat  ku el a broma ku e tabatin, esta, ku e tabata dispuesto pa muri huntu ku su Maestro si tabata nesesario.—Mar. 14:31.

13. Kua ta e úniko manera korekto ku nos por sigui Kristu?

¹³ Awe tin hopi hende ku, meskos ku Pedro, ke sigui Kristu “na un bon distansia,” es desir, nan ke hasié sin ku otro hende ta ripará. Pero manera Pedro mes a skirbi despues, e úniko manera ku nos por sigui Kristu korektamente ta si nos keda mas serka di dje posibel i imitá su ehèmpel den tur kos, sea kual sea e konsekuensianan.—Lesa 1 Pedro 2:21.

14. Kiko Pedro a hasi durante e huisio di Hesus?

¹⁴ Pedro a sigui e multitut kuidadosamente, te na porta di kurá di un di e kasnan mas impreshonante di Herúsalèm. Esei tabata kas di Kaifas, e sumo saserdote riku i poderoso. Por lo general, nan tabata traha e kasnan ei ku un patio meimei i un porta di kurá dilanti. Pedro a yega na e porta di kurá, pero e pòrtir no kier a lag’é drenta. Huan tabata konosé e sumo saserdote i tabata paden kaba, ma el a bini na porta i a papia ku e pòrtir p’e laga Pedro drenta. Aparentemente Pedro no a keda huntu ku Huan, i e no a purba di bai den e kas p’e por a apoyá su Maestro tampoko. El a keda den e patio, kaminda algun sirbidó i esklabo tabata pasa e anochi friu rònt di un kandela, opservando e testigunan falsu ku tabata drenta sali pa deklará kontra Hesus.—Mar. 14:54-57; Huan 18:15, 16, 18.

15, 16. Kon e profesia di Hesus ku Pedro lo a nenga tres biaha ku e konos’é a kumpli?

¹⁵ Den klaridat di e kandela, e mucha muhé pòrtir ku a laga Pedro drenta por a mir’é mihó i a rekonos’é. El a akusá Pedro: “Abo tambe tabata huntu ku Hesus e galileo!” El a kue Pedro fo’i base, i Pedro a nenga mesora ku e konosé Hesus i asta a bisa ku e no tabata komprondé di kiko e mucha muhé tabata papia. Pedro a bai para e ora ei banda di e entrada pa e no hala atenshon di ningun hende. Pero un otro mucha muhé a mir’é i a bisa meskos: “E hòmber akí tabata huntu ku Hesus e nazareno!” Pedro a hura: “Mi no konosé e hòmber ei!” (Mat. 26:69-72; Mar. 14:66-68) Kisas Pedro a tende un gai kanta despues ku pa di dos biaha el a nenga ku e konosé Hesus; pero e tabata muchu nèrvioso pa kòrda riba loke Hesus a profetisá algun ora promé.

¹⁶ Un ratu despues, Pedro ketu bai tabata trata di no hala atenshon. Pero un grupo di hende ku tabata den e patio a bini serka dje. Un di nan tabata famia di Malko, e esklabo ku Pedro a heridá. El a puntra Pedro: “No ta abo mi a mira den hòfi huntu kuné?” Awor sí Pedro a sinti ku e mester a konvensé nan ku nan tabata robes. Pues, el a hura ku e no ta gaña, i aparentemente asta a pidi pa maldishon bini riba dje si ta gaña e tabata gaña. Esei tabata di tres biaha ku Pedro  a nenga ku e konosé Hesus. E no a ni kaba di papia ku un gai a kanta; tabata e di dos ku Pedro a tende kanta e anochi ei.—Huan 18:26, 27; Mar. 14:71, 72.

17, 18. (a) Kon Pedro a reakshoná ora el a realisá e gravedat di e fayo ku el a kometé? (b) Kiko Pedro lo a pensa?

¹⁷ Nèt na e momento ei Hesus a sali para den un balkon ku bista riba e patio. E ku Pedro su bista a topa, manera a ser deskribí na prinsipio di e kapítulo akí. Pedro a realisá mesora ku el a faya gravemente. Tur kibrá el a bai for di e patio. Sintimentunan di kulpa tabata kaba kuné. El a kana dual den Herúsalèm, bou di e lus di luna yen ku tabata iluminá e kayanan. Su wowo a yena ku awa, i e no por a ni mira bon unda e tabata bai. Anto e no por a kontené su mes mas i a grita yora.—Mar. 14:72; Luk. 22:61, 62.

¹⁸ Despues di kometé un fayo garafal asina, ta masha fásil pa un persona pensa ku su piká ta asina grave ku e no por haña pordon. Kisas Pedro tambe a pensa asina. Su Maestro lo por a pordon’é?

19. Kon Pedro lo mester a sintié despues ku el a nenga Hesus, i dikon nos por bisa ku e no a kai den desesperashon?

¹⁹ Ta difísil pa nos imaginá kon tristu Pedro tabata ora mainta a habri. Anto e susesonan di e dia ei lo a hasi su doló mas grandi ainda. Esta kulpabel lo e mester a sintié ora ku mas lat riba e dia ei Hesus a muri despues di sufri pa basta ora! Pedro lo mester a sintié hopi malu kada biaha ku el a pensa kon el a hasi bida di su Maestro mas difísil riba su último dia komo ser humano. No tin duda ku Pedro a keda tur kibrá, pero e no a kai den desesperashon. Segun e relato, no a tarda hopi ku e tabata den kompania atrobe di e otro disipelnan. (Luk. 24:33) Sin duda, a duel tur e apòstelnan e manera kobarde ku nan a komportá nan mes e anochi teribel ei, i nan por a konsolá otro un poko.

20. Kiko nos por siña for di un di e mihó desishonnan ku Pedro a tuma?

²⁰ Nos por bisa ku aki Pedro a tuma un di e mihó desishonnan di su bida. Ora un sirbidó di Dios kai, loke mas ta konta no ta kon grave su kaida ta, sino kon determiná e ta pa lanta ariba i korigí su fayo. (Lesa Proverbionan 24:16.) Pedro a demostrá ku e tabatin berdadero fe ora el a disidí di ta huntu ku su rumannan apesar ku e tabata sintié masha tristu. Ora nos ta sinti hopi duele pa un fayo ku  nos a kometé, kisas nos ta sinti gana di isolá nos mes, pero esei ta peligroso. (Pro. 18:1) E kos sabí ta pa buska asosiashon estrecho ku nos rumannan den fe pa asina rekuperá nos fortalesa spiritual pa por sigui sirbi Dios.—Heb. 10:24, 25.

21. Komo ku Pedro tabata huntu ku su rumannan spiritual, ki notisia el a tende?

²¹ Komo ku Pedro tabata huntu ku su rumannan spiritual, el a tende e notisia sorprendente ku e kurpa di Hesus a disparsé. Pedro ku Huan a kore bai na e graf kaminda nan a dera Hesus i ku nan a seya ku un piedra na e entrada. Huan, ku aparentemente tabata mas yòn, a yega promé. Pero ora ku el a mira e entrada di e graf habrí, el a vasilá. Ma Pedro nò. Aunke el a yega morto kansá, el a drenta paden sin pensa dos biaha. I bèrdat e graf tabata bashí!—Huan 20:3-9.

22. Kiko a pone tur duda i tristesa disparsé for di Pedro su kurason?

²² Na promé instante, Pedro no a kere ku Hesus a resusitá, ni ora muhénan fiel a informá e disipelnan ku algun angel a bisa nan ku Hesus a lanta for di morto. (Luk. 23:55–24:11) Pero na final di e dia ei, tur duda i tristesa ku tabatin den Pedro su kurason a disparsé. Hesus tabata bibu! Awor e tabata un spiritu poderoso, i pa demostrá esei el a aparesé na tur e apòstelnan. Pero promé ku esei, el a hasi algu spesial. Kiko esei tabata? E apòstelnan mes a bisa: “Señor di bèrdat a lanta for di morto i a aparesé na Simon!” (Luk. 24:34) Mas despues, apòstel Pablo tambe a skirbi tokante e dia remarkabel ei ku Hesus “a aparesé na Sefas i despues na e 12 apòstelnan.” (1 Kor. 15:5) Sefas i Simon ta otro nòmber pa Pedro. E relatonan akí ta indiká ku riba e dia ei Hesus a aparesé na Pedro ora ku e tabata su so.

23. Dikon kristiannan djawe ku kometé piká grave tin ku kòrda riba e kaso di Pedro?

²³ Beibel no ta duna e detayenan di e enkuentro konmovedor ei entre Pedro ku Hesus. Nos por imaginá sí kon emoshoná Pedro lo tabata di mira su Señor stimá bibu atrobe i di por a bis’é kuantu tabata duel e loke el a hasi. Mas ku tur kos, Pedro lo tabata ke pa ­Hesus pordon’é. I no tin duda ku Hesus a pordon’é gustosamente. Kristiannan djawe ku kometé piká grave mester kòrda riba e kaso di Pedro, i nunka pensa ku Dios no por pordoná nan. Hesus a imitá e personalidat di su Tata perfektamente, i Yehova ta “pordoná abundantemente.”—Isa. 55:7.

24, 25. (a) Deskribí kon Pedro a pasa su anochi piskando riba Laman di Galilea. (b) Kon Pedro a reakshoná riba e milager ku Hesus a hasi?

²⁴ Hesus a bisa su apòstelnan pa bai Galilea, kaminda lo el a topa nan atrobe. Ora nan a yega einan, Pedro a disidí di bai piska riba  Laman di Galilea, i vários disipel a kompañ’é. Un biaha mas Pedro tabata riba e lago kaminda el a pasa gran parti di su bida. Sin duda, e zonido di e boto ku tabata krak, e olanan ku tabata bati suavemente i e peso di e redanan den su man, a lag’é sinti su mes na kas. Pero henter anochi nan no a kue nada.—Mat. 26:32; Huan 21:1-3.

²⁵ Ma ora di dia a habri, un persona na kantu a bisa nan pa tira nan redanan na e otro banda di e boto. Nan a hasi esei i a kue 153 piská! Pedro tabata sa mesora ta ken e persona ei tabata. El a bula na awa i a landa bai kantu. Na kantu Hesus a sirbi su amigunan fiel piská  ku el a kushiná riba karbon. El a duna atenshon spesial na Pedro.—Huan 21:4-14.

26, 27. (a) Ki oportunidat Hesus a duna Pedro? (b) Ki prueba Hesus a duna ku el a pordoná Pedro kompletamente?

²⁶ Hesus a puntra Pedro si e tabata stim’é “mas ku esakinan,” mustrando aparentemente riba e kantidat grandi di piská ku nan a kue. Akaso e amor ku Pedro tabatin pa piskamentu tabata mas grandi ku su amor pa Hesus? Algun dia promé, Pedro a nenga tres biaha ku e konosé Hesus. Awor Hesus a dun’é e oportunidat di konfirmá tres biaha dilanti di su amigunan ku e ta stima Hesus. Segun ku Pedro a hasi esei, Hesus a bis’é kon e mester a demostrá e stimashon ei: dor di pone sirbishi sagrado na promé lugá den su bida i dor di alimentá, kuida i fortalesé e tou di Kristu, esta, su siguidónan fiel.—Huan 21:15-17.

²⁷ Asina Hesus a konfirmá ku Pedro ainda tabata un persona balioso p’e i pa su Tata. Bou di guia di Kristu, Pedro lo a hunga un papel masha útil den e kongregashon. Esei tabata un prueba sobresaliente di Hesus su pordon! Sin duda, Pedro a keda masha gradisidu ku Hesus a pordon’é kompletamente, i el a siña for di su fayo.

28. Den ki manera Pedro a bira un baranka, manera su nòmber ta nifiká?

²⁸ Pedro a kumpli fielmente ku su asignashon pa hopi aña. El a fortalesé su rumannan, manera Hesus a mand’é hasi bispu di su morto. (Luk. 22:32) Ku pasenshi i amor, el a alimentá i kuida e siguidónan di Kristu. E hòmber ku tabata yama Simon, i kende Hesus a duna e nòmber Pedro—ku ta nifiká Baranka—a biba di akuerdo ku e nòmber ei. El a bira un bon ehèmpel di un persona fuerte, stabil i konfiabel pa tur hende den kongregashon. Prueba di esei nos ta haña den e dos kartanan personal i kariñoso ku el a skirbi i ku a bira un parti balioso di Beibel. E kartanan ei ta mustra tambe ku Pedro hamas a lubidá e lès ku el a siña for di Hesus tokante e berdadero nifikashon di pordon.—Lesa 1 Pedro 3:8, 9; 4:8.

29. Kon nos por imitá e fe di Pedro i e miserikòrdia di Hesus?

²⁹ Laga nos tambe siña e lès ei. Nos ta pidi Dios pordon tur dia pa e tantísimo fayonan ku nos ta kometé? Nos ta aseptá su pordon i ta keda konvensí ku di bèrdat nos a bira limpi den su bista? I nos ta pordoná otro hende? Si nos ta hasi eseinan, nos ta imitando e fe di Pedro i e miserikòrdia di Hesus.