BO SA kiko e edifisio ei ta? Esei ta un tènt spesial pa adorashon di Yehova. E ta ser yamá tabernakel tambe. E pueblo a kaba di trah’é un aña despues ku nan a sali for di Egipto. Bo sa ta ken su idea esei tabata?

Tabata idea di Yehova. Ora Moisés tabata riba Seru Sinaí, Yehova a bis’é kon pa trah’é. Dios a bis’é traha e tènt di tal manera ku tabata fásil pa desarm’é. Asina nan por a hib’é desarmá na otro lugá i arm’é di nobo. P’esei ora e israelitanan tabata bai di un lugá pa otro den desierto, nan tabata hiba e tènt huntu ku nan.

Si bo wak den e kamber chikitu di e tènt na man robes, bo por mira un kaha, òf kashi. Esei ta ser yamá e arka di pakto. Tabatin dos angel òf kerubin trahá di oro riba dje, un na kada punta. Dios a skirbi e Dies Mandamentunan di nobo riba dos tabla di piedra, pasobra Moisés a kibra e proménan. E dos piedranan aki tabata wardá den e arka di pakto. Tambe, un butishi di mana tabata wardá den dje. Bo ta kòrda kiko ta mana?

Aaron, ruman di Moisés, ta esun ku Yehova a skohe pa ta sumo saserdote. El a guia e pueblo den adorashon di Yehova. I su yunan tambe tabata saserdote.

Awor wak e kamber mas grandi di e tènt. E ta dòbel e tamaño di e kamber chikitu. Bo ta mira e kaha, òf kashi chikitu, ku huma ta subi for di dje? Esei ta e altar kaminda e saserdotenan ta kima kos ku ta hole dushi, esta, sensia. Tambe tin un kandelá ku shete lampi. I e di tres kos den e kamber ta un mesa. Tin 12 pan riba dje.

Den kurá di e tabernakel tin un kònchi, òf ponchera grandi, ku ta yen di awa. E saserdotenan ta us’é pa laba man ku pia. Tambe tin un altar grandi. Ei nan ta kima bestianan morto komo ofrenda na Yehova. E tènt ta nèt den sentro di e kampamentu, i e israelitanan ta biba den nan tèntnan tur rònt di dje.

Eksodo 25:8-40; 26:1-37; 27:1-8; 28:1; 30:1-10, 17-21; 34:1, 2; Hebreonan 9:1-5.