Relato 38: E 12 Spionnan
![Spionnan israelita ta karga fruta](https://assetsnffrgf-a.akamaihd.net/assets/l/my/my_PA/38.jpg)
WAK e frutanan ku e dos hòmbernan ta karga. Mira kon grandi e tròshi di drùif ei ta. Mester di dos hòmber pa karg’é riba un palu. I mira e figunan i e granatapelnan. Di unda e frutanan bunita ei a bini? Di e tera di Kánaan. No lubidá, Kánaan ta e tera unda Abraham, Isaak i Jakòb a biba promé. Pero debí na e hamber ku tabatin einan, Jakòb i su famia a bai biba na Egipto. Awor, rònt di 216 aña despues, Moisés ta hiba e israelitanan bèk na Kánaan. Nan a yega na un lugá den desierto yamá Kades.
Mal hende tabata biba den e tera di Kánaan. P’esei Moisés a manda 12 spion, i a bisa nan: ‘Buska pa sa kuantu hende ta biba einan, i kon fuerte nan ta. Buska pa sa si e tera ta bon pa planta. I hasi sigur di trese fruta ora boso bolbe.’
Ora e spionnan a bolbe na Kades, nan a bisa Moisés: ‘Esei realmente ta un bon tera.’ I pa duna prueba, nan a mustra Moisés algun di e frutanan. Pero 10 di e spionnan a bisa: ‘E hendenan ku ta biba ei ta grandi i fuerte. Nan lo mata nos si nos purba poderá di e tera.’
E israelitanan a spanta ora nan a tende esei. Nan a bisa: ‘Mihó nos a muri na Egipto òf asta aki den desierto. Nan lo mata nos tur den bataya, i nan lo kohe nos esposa- i yunan. Laga nos skohe un lider nobo na lugá di Moisés, i bolbe Egipto!’
Pero dos di e spionnan a konfia den Yehova, i a purba kalma e pueblo. Nan nòmber ta Josué i Kalèb. Nan a bisa: ‘No tene miedu. Yehova ta ku nos. Ta fásil pa nos poderá di e tera.’ Pero e pueblo no a skucha. Nan asta kier a mata Josué i Kalèb.
Esei a hasi Yehova masha rabiá, i el a bisa Moisés: ‘Ningun hende di 20 aña bai ariba lo drenta e tera di Kánaan. Nan a mira e milagernan ku mi a hasi na Egipto i den desierto, pero ainda nan no ta konfia mi. P’esei nan lo dual den desierto pa 40 aña te ora delaster un di nan muri. Josué i Kalèb so lo drenta e tera di Kánaan.’
Numbernan 13:1-33; 14:1-38.
Pregunta
- Kiko bo por ripará tokante e tròshi di drùif riba e plachi, i di unda nan a bini kuné?
- Pakiko Moisés a manda 12 spion na e tera di Kánaan?
- Kiko dies spion a bisa ora nan a bin duna Moisés nan informe?
- Kon dos spion a mustra ku nan ta konfia Yehova, i kon nan nòmber ta?
- Pakiko Yehova a rabia, i kiko el a bisa Moisés?
Preguntanan adishonal
- Lesa Numbernan 13:1-33.
Ken a ser skohé pa bai spioná e tera, i ki oportunidat presioso nan tabatin? (Num. 13:2, 3, 18-20)
Pakiko Josué i Kalèb tabatin un punto di bista diferente for di e otro spionnan, i kiko esaki ta siña nos? (Num. 13:28-30; Mat. 17:20; 2 Kor. 5:7)
- Lesa Numbernan 14:1-38.
Ki spièrtamentu nos mester obedesé tokante murmurá kontra Yehova su representantenan riba tera? (Num. 14:2, 3, 27; Mat. 25:40, 45; 1 Kor. 10:10)
Kon Numbernan 14:24 ta mustra ku Yehova tin interes personal den kada un di su sirbidónan? (1 Rei. 19:18; Pro. 15:3)