E HÒMBERNAN ei ta den difikultat. Nan mester hui, sino nan lo ser matá. Nan ta spion israelita, i e señora ku ta yuda nan ta Rahab. Rahab tabata biba den un kas riba e muraya di e stat Jeriko. Laga nos mira pakiko e dos hòmbernan ei tabata den difikultat.

E israelitanan tabata kla pa krusa Riu Hordan i drenta e tera di Kánaan. Pero promé ku nan hasi esei, Josué a manda dos spion. El a bisa nan: ‘Bai tira un bista riba e tera i e stat Jeriko.’

Ora e dos spionnan a drenta Jeriko, nan a bai na e kas di Rahab. Pero un hende a bisa e rei di Jeriko: ‘Dos israelita a drenta aki den awe nochi pa spioná e tera.’ Ora e rei a tende esei, el a manda algun hòmber serka Rahab, i nan a orden’é: ‘E hòmbernan ku bo tin den bo kas, saka nan afó!’ Pero Rahab a skonde e spionnan riba dak di su kas. P’esei el a bisa: ‘Algun hòmber a bini na mi kas sí, pero mi no sa di unda nan a bini. Nan a bai nèt ora tabata birando skur, promé ku porta di e stat a sera. Si boso bai lihé, boso por alkansá nan!’ P’esei e hòmbernan a kore pa buska nan.

Despues ku nan a bai, Rahab a subi lihé riba dak. ‘Mi sa ku Yehova lo duna boso e tera aki,’ el a bisa e spionnan. ‘Nos a tende kon el a seka Laman Kòrá ora boso a sali for di Egipto, i kon boso a mata Rei Sehon i Og. Mi a trata boso ku bondat. P’esei, por fabor, primintí mi ku boso lo trata mi ku bondat. Salba mi tata ku mi mama i mi rumannan.’

E dos spionnan a primintí ku nan lo hasié, pero Rahab tabatin ku hasi algu. ‘Tuma e kabuya kòrá aki i mar’é den bo bentana,’ e spionnan a bisa, ‘i reuní henter bo famia den bo kas serka bo. I ora nos tur bolbe pa kohe Jeriko, nos lo mira e kabuya den bo bentana i nos lo no mata ningun hende den bo kas.’ Ora e dos spionnan a bolbe serka Josué, nan a bis’é tur loke a sosodé.

Josué 2:1-24; Hebreonan 11:31