PROMÉ ku David a muri, el a duna Salomon e mapa di Dios pa traha e tèmpel di Yehova. Durante e di kuater aña di su reinado, Salomon a kuminsá traha e tèmpel, i a dura shete aña i mei pa kab’é. Desénas di míles di hende a traha riba e tèmpel i el a kosta masha hopi plaka mes, dor ku masha hopi oro i plata a wòrdu usá den dje.

E tèmpel tabatin dos sala prinsipal, meskos ku e tabernakel. Pero e dos salanan tabata dos bes mas grandi ku esnan di e tabernakel. Salomon a laga pone e arka di pakto den e sala interior di e tèmpel, i e otro kosnan ku tabata wardá den e tabernakel nan a pone den e promé sala.

Ora nan a kaba e tèmpel, tabatin un selebrashon grandi. Salomon a hinka rudia dilanti di e tèmpel i a resa, manera bo por mira riba e plachi. Salomon a bisa Yehova: ‘Ni sikiera shelu mes no por kontené bo, pues, kon e tèmpel aki por? Pero, o mi Dios, por fabor, skucha bo pueblo ora nan hasi orashon ku kara pa e tèmpel.’

Ora Salomon a kaba su orashon, kandela a baha for di shelu. E kandela a kima e sakrifisio di animal ku nan a ofresé. I un lus briante di Yehova a yena e tèmpel. Esei a mustra ku Yehova tabata skucha i ku el a gusta e tèmpel i e orashon di Salomon. Awor e tèmpel, en bes di e tabernakel, a bira e lugá kaminda e pueblo tabata bini pa adorá.

Pa hopi tempu Salomon a reina ku sabiduria, i e pueblo tabata felis. Pero Salomon a kasa ku hopi hende muhé di otro tera ku no a adorá Yehova. Bo ta mira unu di nan ta adorá dilanti di e imágen? Finalmente nan a logra pone Salomon tambe adorá otro dios. Bo sa kiko a sosodé ora Salomon a hasi esei? E no a trata e pueblo ku bondat mas. El a bira kruel i e pueblo no tabata felis mas.

Esei a hasi Yehova rabia ku Salomon, i el a bis’é: ‘Lo mi kita e reino for di bo i dun’é na otro hende. Mi no ta bai hasi esei durante bo bida, ma durante e reinado di bo yu. Pero lo mi no kita tur e pueblo di bo reino for di bo yu.’ Laga nos mira kon esei a sosodé.

1 Krónikanan 28:9-21; 29:1-9; 1 Reinan 5:1-18; 2 Krónikanan 6:12-42; 7:1-5; 1 Reinan 11:9-13.