Relato 70: Jonas i e Piská Grandi
MIRA e hòmber den laman. E ta den hopi difikultat, no ta bèrdat? E piská ta kla pa gulié! Bo sa ta ken e hòmber ei ta? Su nòmber ta Jonas. Laga nos mira kon bin el a hañ’é den asina tantu difikultat.
Jonas tabata un profeta di Yehova. Poko tempu despues di morto di profeta Eliseo, Yehova a bisa Jonas: ‘Bai na e stat grandi Nínive. E maldat di e pueblo ei ta masha grandi, i mi ke pa bo papia ku nan tokante dje.’
Pero Jonas no kier a bai. P’esei el a subi un barku ku a bai den direkshon kontrali di Nínive. Yehova no a gusta ku Jonas a hui. P’esei el a manda un tormenta grandi. E tormenta tabata asina fuerte ku e barku tabata den peliger di senk. E matrosnan tabatin masha miedu, i nan a sklama na nan diosnan pa yudansa.
Finalmente Jonas a bisa nan: ‘Mi ta adorá Yehova, e Dios ku a traha shelu i tera. I mi ta hui pasobra mi no kier a hasi loke Yehova a manda mi.’ P’esei e matrosnan a puntra: ‘Kiko nos mester hasi pa e tormenta stòp?’
Jonas a bisa: ‘Tira mi den laman i e laman lo kalma atrobe.’ E matrosnan no kier a hasi esei, pero ora e tormenta a empeorá nan a disidí di tira Jonas den laman. Mesora e tormenta a stòp i e laman a kalma.
Segun ku Jonas a hundi den awa, e piská grandi a gulié. Pero e no a muri. El a keda den barika di e piská pa tres dia i tres anochi. Jonas a sinti masha duele ku e no a obedesé Yehova i bai Nínive. Pues, bo sa kiko el a hasi?
Jonas a pidi Yehova yud’é. Anto Yehova a laga e piská saka Jonas riba tera seku. Despues di esei Jonas a bai Nínive. Esei no ta siña nos e importansia di hasi tur loke Yehova bisa?
E buki bíbliko di Jonas.
Pregunta
- Ken Jonas tabata, i kiko Yehova a mand’é hasi?
- Kiko Jonas a hasi komo ku e no kier a bai kaminda Yehova a mand’é?
- Kiko Jonas a bisa e matrosnan ku nan mester hasi pa e tormenta stòp?
- Manera bo por mira riba e plachi, kiko a sosodé ora Jonas a hundi den awa?
- Kuantu tempu Jonas a keda den e piská grandi, i kiko el a hasi eiden?
- Unda Jonas a bai despues ku el a sali for di e piská grandi, i kiko esaki ta siña nos?
Preguntanan adishonal
- Lesa Jonas 1:1-17.
Aparentemente, kon Jonas a sinti enkuanto su asignashon pa prediká na e ninivitanan? (Jon. 1:2, 3; Pro. 3:7; Ekl. 8:12)
- Lesa Jonas 2:1, 2 i 10.
Kon e eksperensia di Jonas ta duna nos konfiansa ku Yehova lo kontestá nos orashonnan? (Sal. 22:24; 34:6; 1 Juan 5:14)
- Lesa Jonas 3:1-10.
Kon e echo ku Yehova a sigui usa Jonas apesar ku na promé instante el a keda sin kumpli ku su asignashon ta un animashon pa nos? (Sal. 103:14; 1 Ped. 5:10)
Kiko e eksperensia di Jonas ku e ninivitanan ta siña nos tokante prehuisio enkuanto e hendenan den nos teritorio? (Jon. 3:6-9; Ekl. 11:6; Echo. 13:48)