ESAKI ta un plachi di un paradeis, kisas manera esun ku Dios a mustra su profeta Isaias. Isaias a biba poko tempu despues di Jonas.

Paradeis kier men “hòfi” òf “parke.” Esei ta hasi bo kòrda algu ku bo a yega di mira den e buki aki kaba? E ta parse e hòfi bunita ku Yehova a traha pa Adam ku Eva masha hopi, no ta bèrdat? Pero henter e tera por bira un paradeis?

Yehova a bisa su profeta Isaias pa skirbi tokante e binidero paradeis nobo pa e pueblo di Dios. El a bisa: ‘Lobo i karné lo biba huntu na pas. Yu di baka i yu di leon lo kome huntu, i mucha chikitu lo kuida nan. Ni kolebra venenoso lo no hasi daño na un beibi ku hunga banda di dje.’

Hopi hende ta bisa: ‘Esei no por sosodé nunka. Semper tabatin difikultat riba tera, i semper lo tin.’ Pero, pensa un ratu: Ki klase di lugá di biba Dios a duna Adam ku Eva?

Dios a pone Adam ku Eva den un paradeis. Ta debí ku nan a desobedesé Dios nan a pèrdè nan bunita lugá di biba, a bira bieu i a muri. Dios a primintí ku lo e duna hende ku ta stim’é nèt e kosnan ku Adam ku Eva a pèrdè.

Den e binidero paradeis nobo nada lo no kousa daño ni destrukshon. Lo tin pas perfekto. Tur hende lo tin bon salú i lo ta felis. Lo e ta manera Dios tabata ke na prinsipio. Pero nos lo siña despues kon Dios lo hasi esei.

Isaias 11:6-9; Revelashon 21:3, 4.