Relato 75: Kuater Hóben na Babilonia
REI Nabukodonosor a hiba tur e israelitanan mihó eduká Babilonia. Despues e rei a skohé e hóbennan mas nèchi i mas sabí. Kuater di nan ta e mucha hòmbernan ku bo ta mira ei. Un di nan ta Daniel, i e otro tresnan e babilonionan a yama Sadrak, Mesak i Abed-nego.
Nabukodonosor ke eduká e hóbennan pa traha den su palasio. Despues di tres aña di edukashon, e lo skohe solamente esnan mas sabí pa yud’é solushoná problema. E rei ke pa e hóbennan ta fuerte i di bon salú durante nan edukashon. P’esei el a duna òrdu pa su kriánan duna tur e hóbennan e mesun kuminda riku i biña ku e i su famia ta haña.
Mira e hóben Daniel. Bo sa kiko e ta bisa Aspenaz, e kriá prinsipal di Nabukodonosor? Daniel ta bis’é ku e no ke kome e kuminda riku di mesa di e rei. Pero Aspenaz a keda preokupá. El a bisa: ‘E rei a disidí kiko boso mester kome i bebe. I si boso no parse mes salú ku e otro hóbennan, e por mata mi.’
P’esei Daniel a bai serka e bewaker ku Aspenaz a pone pa enkargá ku Daniel i su tres amigunan. Daniel a bis’é: ‘Por fabor, pone nos na prueba pa 10 dia. Duna nos bèrdura pa kome i awa pa bebe. Anto kompará nos ku e otro hóbennan ku ta kome kuminda di e rei, i mira ken ta parse mihó.’
E bewaker a kumbiní pa hasi esei. I despues di 10 dia, e aparensia di Daniel i su tres amigunan tabata mas salú ku di tur e otro hóbennan. P’esei e wardadó a laga nan sigui kome bèrdura en bes di kuminda di e rei.
Despues di tres aña tur e hóbennan a wòrdu hibá dilanti di Nabukodonosor. Despues di a papia ku nan tur, e rei a haña ku Daniel i su tres amigunan ta esnan di mas sabí. P’esei el a tene nan pa nan yud’é den e palasio. I ki ora ku e rei a hasi Daniel, Sadrak, Mesak i Abed-Nego un pregunta òf duna nan un problema difísil, nan tabata sa 10 bes mas tantu ku kualke saserdote òf sabio.
Daniel 1:1-21.
Pregunta
- Ken e kuater hóbennan riba e plachi ta, i pakiko nan ta na Babilonia?
- Ki plan Nabukodonosor tin pa e kuater hóbennan, i kiko e ta manda su sirbidónan hasi?
- Kiko Daniel ta pidi tokante e kuminda i bebida ku e i su tres amigunan mester risibí?
- Despues di kome bèrdura pa dies dia, kon Daniel i su tres amigunan tabata na komparashon ku e otro hóbennan?
- Dikon nan a hiba Daniel i su tres amigunan den palasio di e rei, i den ki sentido nan tabata mihó ku e saserdotenan i e hòmbernan sabí?
Preguntanan adishonal
- Lesa Daniel 1:1-21.
Kon nos mester hasi esfuerso pa por resistí tentashon i vense debilidat? (Dan. 1:8; Gén. 39:7, 10; Gal. 6:9)
Den ki maneranan hóbennan awe por ser tentá òf preshoná pa entregá na loke algun hende ta konsiderá delisia manera e “bon kuminda di e rei”? (Dan. 1:8; Pro. 20:1; 2 Kor. 6:17-7:1)
Kiko e relato bíbliko tokante e kuater hóbennan hebreo ta yuda nos komprondé tokante gana konosementu di mundu? (Dan. 1:20; Isa. 54:13; 1 Kor. 3:18-20)