Relato 58: David i Goliat
E FILISTEONAN a bini atrobe pa bringa kontra Israel. E tres rumannan mas grandi di David ta den ehérsito di Saul awor. P’esei un dia Isaí a bisa David: ‘Hiba grano i pan pa bo rumannan. Wak kon ta bai ku nan.’
Ora David a yega e kampamentu di e ehérsito, el a kore bai na e liña di bataya pa buska su rumannan. E gigante filisteo Goliat a sali pa tene mofa di e israelitanan. El a hasi esei tur mainta i tur atardi pa 40 dia kaba. E tabata grita: ‘Skohe un di boso hòmbernan pa bringa kontra mi. Si e gana i mata mi, nos ta bira boso esklabo. Pero si ami gana i mata e, boso ta bira nos esklabo. Mi ta reta boso pa skohe un hende pa bringa kontra mi.’
David a puntra algun sòldá: ‘Kiko e hende ku mata e filisteo i libra Israel di bèrgwensa ta gana?’
Un sòldá a bisa: ‘Saul lo dun’é hopi rikesa. I lo e dun’é su mes yu muhé komo esposa.’
Pero tur e israelitanan tabatin miedu di Goliat pasobra e tabata asina grandi. E tabata rònt di tres meter haltu, i un otro sòldá tabata karga su eskudo p’e.
Algun sòldá a bai i a bisa Rei Saul ku David ke bringa kontra Goliat. Pero Saul a bisa David: ‘Bo no por ku e filisteo aki. Bo ta djis un mucha, i e ta un sòldá henter su bida. David a kontestá: ‘Mi a mata un oso i un leon ku a bai ku karné di mi tata. I e filisteo aki lo bira meskos ku nan. Yehova lo yuda mi.’ P’esei Saul a bisé: ‘Bai, i Yehova sea ku bo.’
David a baha den un roi i a kohe sinku piedra lizu i a pone nan den su tas. Despues el a kohe su slengu i a sali bai pa kontra ku e gigante. Ora Goliat a mir’é, e no por a kere. El a pensa ku lo ta fásil pa mata David.
‘Hala mas serka,’ Goliat a bisa ‘i lo mi duna bo kurpa na e paranan i bestianan pa kome.’ Pero David a bisa: ‘Bo ta bini serka mi ku spada, sper i lansa, pero ami ta bini serka bo den nòmber di Yehova. Awe mes Yehova lo entregá bo den mi man i lo mi derotá bo.’
Ku esei David a kore bai den direkshon di Goliat. El a saka un piedra for di su saku, pon’é den su slengu, i a tir’é ku tur su forsa. E piedra a drenta den kabes di Goliat, i el a kai abou morto! Ora ku e filisteonan a mira ku nan kampion a kai, nan tur a hui. E israelitanan a kore tras di nan i a gana e bataya.
1 Samuel 17:1-54.
Pregunta
- Kon Goliat a reta e ehérsito israelita?
- Kon grandi Goliat tabata, i ki rekompensa Rei Saul a primintí di duna esun ku mata Goliat?
- Kiko David a bisa ora Saul a bis’é ku e no por bringa kontra Goliat pasobra e ta apénas un mucha?
- Kon e manera ku David a kontestá Goliat a mustra ku e tabata konfia den Yehova?
- Manera bo por mira riba e plachi, kiko David a usa pa mata Goliat, i kiko a sosodé ku e filisteonan despues di esei?
Preguntanan adishonal
- Lesa 1 Samuel 17:1-54.
Kiko tabata e sekreto di David su gran kurashi, i kon nos por imit’é den esaki? (1 Sam. 17:37, 45; Efe. 6:10, 11)
Pakiko kristiannan mester evitá di tin un spiritu di kompetensia manera Goliat ora nan ta partisipá den wega òf rekreo? (1 Sam. 17:8; Gal. 5:26; 1 Tim. 4:8)
Kon e palabranan di David ta indiká ku e tabatin fe ku Dios lo apoy’é? (1 Sam. 17:45-47; 2 Kró. 20:15)
En bes di simplemente deskribí un kompetensia entre dos ehérsito enemigu, kon e relato aki ta mustra ku en realidat ta diosnan falsu tabata den bataya kontra e Dios berdadero, Yehova? (1 Sam. 17:43, 46, 47)
Kon e restu ungi ta imitá e konfiansa ku David tabatin den Yehova? (1 Sam. 17:37; Jer. 1:17-19; Rev. 12:17)