SAUL a purba atrobe pa kapturá David. El a bai ku 3.000 di su mihó sòldánan pa buska David. Ora David a tende di esei, el a manda spion pa sa na unda Saul i su trupa a pasa anochi. Anto David a puntra dos hòmber di dje: ‘Kua di boso ke bai na e kampamentu ku mi?’

Abisai a respondé: ‘Ami ta bai.’ Abisai ta yu di Seruya ruman muhé di David. Miéntras ku Saul i su trupa tabata drumi, David i Abisai a gatia drenta den e kampamentu. Nan a kohe e lansa i e poron di awa di Saul, lokual tabata nèt banda di kabes di Saul. Ningun hende no a mira ni no a tende nan pasobra nan tur tabata den un soño profundo.

Wak David i Abisai awor. Nan a logra slùip sali i ta safe riba punta di un seru. David a grita e hefe di ehérsito di Israel: ‘Abner, pakiko bo no ta protehá bo señor e rei? Mira! Unda su lansa i su poron di awa ta?’

Saul a lanta. El a rekonosé e bos di David i a puntra: ‘Esei ta abo, David?’ Bo ta mira Saul i Abner ei bou?

David a kontestá Saul: ‘Sí, mi señor rei.’ I David a puntra: ‘Pakiko Saul ta purba kapturá mi? Ki malu mi a hasi? Ata bo lansa aki, o rei. Laga un di bo hòmbernan bin koh’é.’

Saul a atmití: ‘Mi a hasi malu. Mi a hasi kos di bobo.’ E ora ei David a sigui su kaminda, i Saul a bai kas. Pero David a bisa den su mes: ‘Un dia Saul lo mata mi. Mi tin ku hui bai na tera di e filisteonan.’ I esei ta loke el a hasi. David por a nèk e filisteonan i hasi nan kere ku e ta apoyá nan awor.

Poko tempu despues e filisteonan a subi pa bringa kontra Israel. Tantu Saul komo Jonatan a muri den e bataya. Esei a hasi David masha tristu, i el a komponé un kantika bunita den kual el a kanta: ‘Mi ta sinti mi tristu pa bo, mi ruman Jonatan. Kuantu mi a stima bo!’

Despues di esei David a bolbe na Israel na e stat Hebròn. Tabatin guera entre e hòmbernan ku a skohe Is-boset yu di Saul komo rei, i e otro hòmbernan ku tabata ke David komo rei. Pero finalmente e hòmbernan di David a gana. David tabatin 30 aña di edat ora el a bira rei. El a reina na Hebròn pa shete aña i mei. Algun yu di dje ku a nase ei tabata Amnon, Absalon i Adonías.

Ku tempu David i su trupa a bai kapturá e stat bunita ku yama Yerusalèm. Joab, un otro yu di Seruya ruman muhé di David, a hiba delantera den e pelea. P’esei David a duna Joab e puesto di hefe di su ehérsito komo rekompensa. Awor David a kuminsá reina den e stat Yerusalèm.

1 Samuel 26:1-25; 27:1-7; 31:1-6; 2 Samuel 1:26; 3:1-21; 5:1-10; 1 Krónikanan 11:1-9.