BO SA ken e hòmbernan ei ta i kiko nan ta hasi? Nan ta bai guera, i esnan dilanti ta kanta. Kisas bo ta puntra: ‘Pakiko esnan ku ta kanta no tin lansa i spada pa nan bringa kuné? Ban mira.

Josafat ta rei di e reino di dos tribu di Israel. El a biba na e mesun tempu ku Rei Akab ku Jezabel di e reino di nort di 10 tribu. Pero Josafat ta un bon rei, i su tata Asa tambe tabata un masha bon rei. Pues, pa hopi aña e pueblo di e reino di dos tribu di zùit a gosa di un bon bida.

Pero awor algu a sosodé ku a pone e pueblo haña miedu. Mensaheronan a bin bisa Josafat: ‘Un ehérsito grandi di e paisnan di Moab, Amon i Seru Seir ta bini pa ataká bo.’ Hopi israelita a reuní na Yerusalèm pa buska yudansa di Yehova. Nan a bai na e tèmpel, i ei Josafat a pidi: ‘O Yehova nos Dios, nos no sa kiko pa hasi. Nos no por ku e ehérsito grandi aki. Nos ta akudí na abo pa yudansa.’

Yehova a skucha, i el a manda un sirbidó di dje bisa e pueblo: ‘E bataya no ta di boso, sino di Dios. Boso lo no tin ku bringa. Wak so, i mira kon Yehova ta salba boso.’

Pues, su manisé Josafat a bisa e pueblo: ‘Konfia den Yehova!’ Anto el a pone kantante kana dilanti di su sòldánan, i miéntras ku nan tabata marcha, nan tabata kanta alabansa na Yehova. Bo sa kiko a sosodé ora nan a yega serka di e bataya? Yehova a pone e sòldánan enemigu mes bringa kontra otro. I ora e israelitanan a yega, tur sòldá enemigu tabata morto!

No tabata sabí di Josafat su parti pa konfia den Yehova? Nos tambe lo ta sabí si nos konfia den dje.

1 Reinan 22:41-53; 2 Krónikanan 20:1-30.