Relato 72: Dios A Yuda Rei Ezekias
BO SA pakiko e hòmber aki ta hasi orashon na Yehova? Pakiko el a pone e kartanan ei dilanti di e altar di Yehova? E hòmber ta Ezekias. E ta rei di e dos tribunan di Israel di zùit. E tin problema grandi. Pakiko?
Pasobra e ehérsito di Asiria a destruí e 10 tribunan di nort kaba. Yehova a laga esei sosodé pasobra nan a bira hopi malbado. I awor e ehérsito di Asiria a bini pa bringa kontra e reino di dos tribu.
E rei di Asiria a kaba di manda karta pa Rei Ezekias. Ezekias a pone e kartanan dilanti di Dios. E kartanan ta tene mofa di Yehova, i ta bisa Ezekias pa entregá. P’esei Ezekias a pidi: ‘O Yehova, salba nos di e rei di Asiria. Anto tur nashon lo sa ku bo so ta Dios.’ Yehova a skucha Ezekias?
Ezekias tabata un bon rei. E no tabata manera e mal reinan di e reino di 10 tribu di Israel, ni e no tabata manera su mal tata Rei Akaz. Ezekias a obedesé ku kuidou tur lei di Yehova. P’esei, despues ku Ezekias a kaba ku su orashon, profeta Isaias a mand’é e mensahe aki di Yehova: ‘E rei di Asiria lo no drenta Yerusalèm. Ningun sòldá di dje ni sikiera lo yega serka. Nan lo no tira ni un flecha riba e stat.’
Wak e plachi riba e blachi aki. Bo sa ken tur e sòldánan morto ei ta? Nan ta di Asiria. Yehova a manda su angel, i den un solo anochi e angel a mata 185.000 sòldá di Asiria. P’esei e rei di Asiria a entregá i a bai kas bèk.
Esei a skapa e reino di dos tribu, i e pueblo a biba na pas pa un tempu. Pero despues di morto di Ezekias, su yu Manasés a bira rei. Tantu Manasés komo su yu hòmber Amon ku a siguié tabata masha mal rei. P’esei e tera a yena ku krímen i violensia atrobe. Despues ku Rei Amon su mes kriánan a mat’é, su yu Josias a bira rei di e reino di dos tribu.
2 Reinan 18:1-36; 19:1-37; 21:1-25.
Pregunta
- Ken e hòmber riba e plachi ta, i pakiko e ta den problema grandi?
- Kiko ta e kartanan ku Ezekias a pone dilanti di Dios, i kiko Ezekias a pidi den orashon?
- Ki tipo di rei Ezekias tabata, i ki mensahe Yehova a manda p’e via profeta Isaias?
- Kiko e angel di Yehova a hasi ku e asirionan, manera e plachi ta mustra?
- Apesar ku e reino di dos tribu tabatin pas pa un tempu, kiko a sosodé despues ku Ezekias a muri?
Preguntanan adishonal
- Lesa 2 Reinan 18:1-36.
Kon e bosero asirio, Rabsakes, a purba suak fe di e israelitanan? (2 Rei. 18:19, 21; Eks. 5:2; Sal. 64:3)
Ora Testigunan di Yehova ta trata ku opositornan, kon nan ta sigui ehèmpel di Ezekias? (2 Rei. 18:36; Sal. 39:1; Pro. 26:4; 2 Tim. 2:24)
- Lesa 2 Reinan 19:1-37.
Awe, kon Yehova su pueblo ta imitá Ezekias den tempu di angustia? (2 Rei. 19:1, 2; Pro. 3:5, 6; Heb. 10:24, 25; Sant. 5:14, 15)
Ki tripel derota Rei Senakerib a sufri, i ken e ta simbolisá profétikamente? (2 Rei. 19:32, 35, 37; Rev. 20:2, 3)
- Lesa 2 Reinan 21:1-6 i 16.
Pakiko por bisa ku Manasés tabata un di e reinan di mas malbado ku a yega di goberná na Yerusalèm? (2 Kró. 33:4-6, 9)
