Relato 1: Dios Ta Kuminsá Kreashon
TUR e bon kosnan ku nos tin ta bini di Dios. Dios a traha solo pa e duna nos klaridat di dia, i el a traha luna i strea pa nos por tin un poko klaridat anochi. I Dios a traha tera pa nos biba riba dje.
Pero solo, luna, strea i tera no tabata e promé kosnan ku Dios a traha. Bo sa kiko el a traha promé? Promé Dios a traha personanan manera su mes. Nos no por mira e personanan ei, meskos ku nos no por mira Dios. Tal personanan ta ser yamá angel den Beibel. Dios a traha angel pa nan biba serka dje den shelu.
E promé angel ku Dios a traha tabata masha spesial. E tabata e promé yu di Dios i el a traha huntu ku su Tata. El a yuda Dios traha tur otro kos. El a yuda Dios traha solo, luna, strea i tambe nos tera.
Kon tera tabata na e tempu ei? Na prinsipio ningun hende por a biba riba tera. Tabatin solamente un laman grandi di awa tapando tur e tera. Pero Dios tabata ke pa hende biba riba tera. P’esei el a kuminsá prepará kosnan pa nos. Kiko el a hasi?
Wèl, promé e tera tabatin mester di klaridat. P’esei Dios a hasi splendor di solo lusa riba tera. El a hasi esei di tal manera ku tabatin anochi i tambe di dia. Despues Dios a pone tera subi mas haltu ku awa di laman.
Na prinsipio no tabatin nada riba tera. El a parse e plachi ku bo ta mira ei. No tabatin flor ni palu ni bestia. Ni sikiera tabatin piská den laman. Dios tabatin ku hasi hopi trabou mas pa e tera bira realmente bunita pa bestia i hende por biba riba dje.
Jeremias 10:12; Kolosensenan 1:15-17; Génesis 1:1-10.
![Tera bashí](https://assetsnffrgf-a.akamaihd.net/assets/l/my/my_PA/01.jpg)
Pregunta
- Di unda tur kos bon a bini? Bo por duna un ehèmpel?
- Kiko ta e promé kos ku Dios a krea?
- Dikon e promé angel tabata spesial?
- Splika kon tera tabata na prinsipio. (Wak e plachi.)
- Kon Dios a kuminsá prepará tera pa bestia i pa hende?
Preguntanan adishonal
- Lesa Jeremias 10:12.
Ki kualidatnan di Dios nos ta mira den su kreashon? (Isa. 40:26; Rom. 11:33)
- Lesa Kolosensenan 1:15-17.
Ki papel Hesus a hunga den kreashon, i ki efekto esei mester tin riba e manera ku nos ta pensa tokante dje? (Kol. 1:15-17)
- Lesa Génesis 1:1-10.
Kon tera a yega na eksistí? (Gén. 1:1)
Kiko a sosodé riba e promé dia di kreashon? (Gén. 1:3-5)
Splika kiko a sosodé riba e di dos dia di kreashon. (Gén. 1:7, 8)