Relato 2: Un Hòfi Bunita
MIRA e tera ei! Ki bunita tur kos ta! Wak e yerba, mata, flor i tur e bestianan. Bo por mustra kua ta olefante i kua ta leon?
![Bestia den e hòfi di Edén](https://assetsnffrgf-a.akamaihd.net/assets/l/my/my_PA/02.jpg)
Kon e hòfi bunita aki a yega na eksistí? Wèl, laga nos mira kon Dios a prepará tera pa nos.
Promé, Dios a traha yerba bèrdè pa tapa e suela. I el a traha tur sorto di mata chikitu i grandi, i palu. Mata ku ta krese asina ta yuda hasi e tera bunita. Pero nan ta hasi mas ku esei. Hopi di nan ta produsí kuminda pa nos ku ta smak masha bon.
Despues Dios a traha piská pa landa den awa i para pa bula den laira. El a traha kachó i pushi i kabai; bestia grandi i bestia chikitu. Kua bestia ta biba den bisindario di bo kas? Nos no tin ku keda kontentu ku Dios a traha tantu kos pa nos?
Finalmente, Dios a hasi un parti di tera un lugá mashá spesial. El a yama e lugá aki e hòfi di Edén. E tabata kompletamente perfekto. Tur kos den dje tabata bunita. I Dios tabata ke pa tur e tera bira meskos ku e hòfi bunita ku el a traha.
Pero wak e plachi di e hòfi aki atrobe. Bo sa kiko Dios a mira ku tabata falta? Laga nos mira.
Génesis 1:11-25; 2:8, 9.
Pregunta
- Kon Dios a prepará tera pa e bira nos kas?
- Konta algu di e gran variedat di bestia ku Dios a traha. (Wak e plachi.)
- Dikon e Hòfi di Edén tabata spesial?
- Kon Dios tabata ke pa henter mundu bira?
Preguntanan adishonal
- Lesa Génesis 1:11-25.
Kiko Dios a krea riba e di tres dia di kreashon? (Gén. 1:12)
Kiko a sosodé riba e di kuater dia di kreashon? (Gén. 1:16)
Ki sorto di bestia Dios a traha riba e di sinku i di seis dia? (Gén. 1:20, 21, 25)
- Lesa Génesis 2:8 i 9.
Kua ta e dos palunan spesial ku Dios a pone den e hòfi, i kiko nan a simbolisá?