PAFÓ di e hòfi di Edén, Adam ku Eva tabatin hopi difikultat. Nan tabatin ku traha duru pa nan pan. En bes di bunita palu di fruta, nan a mira hopi mata di sumpiña i bringamosa krese na tur parti. Esei ta loke a sosodé ora Adam ku Eva a desobedesé Dios i no a keda amigu di Dje.

Pero pió ainda, Adam ku Eva a kuminsá muri. No lubidá ku Dios a spièrta nan ku nan lo muri si nan kome fruta di un sierto palu. Wèl, e mesun dia ku nan a kome, nan a kuminsá muri. Ki bobo nan tabata di no a skucha Dios!

Tur yu di Adam ku Eva a nase despues ku Dios a saka nan for di e hòfi di Edén. Esei kier men ku nan yunan tambe tabatin ku bira bieu i muri.

Mare Adam ku Eva a obedesé Yehova; e ora ei bida lo tabata felis pa nan i nan yunan. Nan tur lo por a biba pa semper den felisidat riba tera. Ningun hende lo tabatin ku bira bieu, bira malu i muri.

Dios ke pa hende biba pa semper den felisidat, i El a primintí ku un dia lo ta asina. No solamente tur e tera lo ta bunita, sino tur hende lo gosa di bon salú. I tur hende riba tera lo ta bon amigu ku tur otro hende i ku Dios.

Pero Eva no tabata amigu di Dios mas. P’esei, ora el a duna lus, esei no tabata fásil p’e. E tabatin doló. Desobedensia na Yehova siguramente a resultá den hopi tristesa p’e, bo no ta haña?

Adam ku Eva tabatin hopi yu hòmber i muhé. Ora nan promé yu hòmber a nase, nan a yam’é Kain. Nan a yama nan di dos yu Abel. Kiko a sosodé ku nan? Bo sa?

Génesis 3:16-23; 4:1, 2; Revelashon 21:3, 4.