SI UN hende yega serka bo i su kabes ta yega te na plafòn di bo kas, kiko lo bo pensa? E hende ei mester ta un gigante! Un tempu realmente tabatin gigante riba tera. Beibel ta mustra ku nan tata tabata angel for di shelu. Pero, kon esei por ta?

No lubidá, e mal angel Satanas a keda okupá kousando problema. Asta el a purba hiba e angelnan di Dios den mal kaminda. Ku tempu, algun angel a kuminsá skucha Satanas. Nan a bandoná e trabou ku Dios tabatin pa nan hasi den shelu. I nan a baha na tera i a forma kurpa humano pa nan mes. Bo sa pakiko?

Beibel ta bisa ku esei ta pa motibu ku e yunan di Dios ei a mira hende muhé bunita na tera i kier a biba ku nan. P’esei nan a baha na tera i a kasa ku e muhénan ei. Beibel ta bisa ku esei tabata inkorekto, pasobra Dios a traha angel pa biba den shelu.

Ora e angelnan ku nan esposanan a haña yu, nan yunan tabata distinto. Tal bes na prinsipio nan no a parse muchu distinto. Pero nan a sigui krese bira mas i mas grandi, i bira mas i mas fuerte te ku nan a bira gigante.

E gigantenan ei tabata mal hende. I dor ku nan tabata asina grandi i fuerte, nan por a hasi hende daño. Nan a purba fòrsa tur hende bira malbado meskos ku nan.

Enok a muri kaba, pero tabatin un hòmber riba tera awor ku tabata bon hende. E nòmber di e hòmber tabata Noe. E semper a hasi loke Dios tabata ke.

Un dia Dios a bisa Noe ku tempu a yega pa E destruí tur hende malbado. Pero Dios tabata bai salba Noe, su famia i hopi animal. Laga nos mira kon Dios a hasi esei.

Génesis 6:1-8; Hudas 6.