Relato 9: Noe Ta Traha un Arka
NOE tabatin un esposa i tres yu hòmber. Su tres yunan tabata Sèm, Kam i Jafet. I kada yu tabatin un esposa. Pues, tabatin ocho persona den e famia di Noe.
Awor Dios a manda Noe hasi un kos straño. El a bis’é traha un arka grandi. E arka tabata grandi manera un barku, pero el a parse mas manera un kaha grandi i largu. ‘Trah’é ku tres piso,’ Dios a bisa, ‘i traha kamber den dje.’ E kambernan tabata pa Noe i su famia, pa e animalnan i pa e kuminda ku nan tur tabatin mester.
Tambe Dios a bisa Noe traha e arka di tal manera ku awa no por drent’é. Dios a bisa: ‘Mi ta bai manda un diluvio grandi di awa i destruí henter mundu. Tur hende ku no ta den e arka lo muri.’
Noe i su yunan a obedesé Yehova i nan a kuminsá traha. Pero e otro hendenan tabata blo hari. Nan a sigui hasi malu. Ningun hende a kere Noe ora el a bisa nan kiko Dios tabata bai hasi.
A tuma hopi tempu pa nan traha e arka, pasobra e tabata masha grandi. Finalmente, despues di hopi aña, nan a kab’é. Awor Dios a bisa Noe pa e hiba e animalnan den e arka. Dios a bis’é hiba dos di algun sorto di animal, un machu i tambe un hembra. Pero Dios a bisa Noe hiba shete di otro sorto di animal. Tambe Dios a bisa Noe hiba tur e diferente sorto di paranan. Noe a hasi presis loke Dios a bis’é.
Despues, Noe i su famia tambe a drenta den e arka. Anto Dios a sera e porta. Paden, Noe i su famia a spera. Djis imaginá bo ku bo tabata ei huntu ku nan den e arka, sperando. E diluvio realmente lo bini manera Dios a bisa?
Génesis 6:9-22; 7:1-9.
Pregunta
- Kuantu hende tabatin den Noe su famia, i kon su tres yu hòmbernan tabata yama?
- Ki kos straño Dios a pidi Noe hasi, i dikon?
- Kon Noe su bisiñanan a reakshoná ora el a konta nan di e arka?
- Kiko Dios a bisa Noe pa e hasi ku e bestianan?
- Despues ku Dios a sera porta di e arka, kiko Noe i su famia mester a hasi?
Preguntanan adishonal
- Lesa Génesis 6:9-22.
Dikon Noe tabata un adoradó sobresaliente di e Dios berdadero? (Gén. 6:9, 22)
Kiko Yehova ta pensa tokante violensia, i kon esaki mester afektá e manera ku nos ta skohe nos entretenimentu? (Gén. 6:11, 12; Sal. 11:5)
Kon nos por imitá Noe ora nos risibí guia pa medio di Yehova su organisashon? (Gén. 6:22; 1 Juan 5:3)
- Lesa Génesis 7:1-9.
Dikon e echo ku Yehova a konsiderá Noe hustu apesar ku e tabata un hòmber imperfekto ta animá nos? (Gén. 7:1; Pro. 10:16; Isa. 26:7)