Relato 11: E Promé Regenbog
BO SA kiko ta e promé kos ku Noe a hasi ora e i su famia a sali for di e arka? El a hasi un sakrifisio òf ofrenda na Dios. Bo por mir’é ta hasi esei riba e plachi aki bou. Noe a hasi e ofrenda di animal pa gradisí Dios pa e salbashon di su famia for di e diluvio grandi.
Bo ta kere ku Yehova a gusta e ofrenda? Sí, el a gust’é. I p’esei Dios a primintí Noe ku nunka mas e lo destruí mundu atrobe ku un diluvio.
Pronto tera tabata kompletamente seku, i Noe ku su famia a kuminsá un bida nobo pafó di e arka. Dios a bendishoná nan i a bisa nan: ‘Boso mester haña hopi yu. Boso mester oumentá na kantidat te ora tin hende ta biba na tur parti di tera.’
Pero despues ora hende tende di e diluvio grandi, nan lo por haña miedu ku un diluvio manera esei lo sosodé atrobe. P’esei Dios a duna algu pa hasi hende kòrda su promesa di nunka mas inundá tur e tera. Bo sa kiko Dios a duna pa hasi nan kòrda? Esei tabata un regenbog.
Hopi biaha hende ta mira regenbog den shelu ora solo sali despues di áwaseru. Regenbog por tin hopi koló bunita. Bo a yega di mira un regenbog? Bo ta mira esun riba e plachi ei?
Esaki ta loke Dios a bisa: ‘Mi ta primintí ku nunka mas un diluvio lo destruí tur hende i bestia. Mi ta pone mi regenbog den nubia. I ora e regenbog presentá, lo mi mir’é i kòrda e promesa ku mi a hasi.’
P’esei, ora bo mira un regenbog, kiko esei mester hasi bo kòrda? Sí, kòrda e promesa di Dios ku nunka mas e lo usa un diluvio pa destruí mundu.
Génesis 8:18-22; 9:9-17.
Pregunta
- Manera bo por mira riba e plachi, kiko ta e promé kos ku Noe a hasi ora el a sali for di e arka?
- Ki mandamentu Dios a duna Noe i su famia despues di e diluvio?
- Ki promesa Dios a hasi?
- Ora nos mira un regenbog, kiko e mester hasi nos kòrda?
Preguntanan adishonal
- Lesa Génesis 8:18-22.
Awendia, kon nos por trese un “holó dushi” pa Yehova? (Gén. 8:21; Heb. 13:15, 16)
Ki opservashon Yehova a hasi tokante e kondishon di hende su kurason, i p’esei nos mester tene kuidou ku kiko? (Gén. 8:21; Mat. 15:18, 19)
- Lesa Génesis 9:9-17.
Ki promesa Yehova a hasi na tur kriatura riba tera? (Gén. 9:10, 11)
Pa kuantu tempu e promesa di regenbog lo keda na vigor? (Gén. 9:16)