BO TA komprondé kiko Abraham ta hasi ei? E tin un kuchú, i ta parse ku e ta bai mata su yu. Pakiko? Promé, ban mira kon Abraham ku Sara a haña un yu.

No lubidá, Dios a primintí nan ku nan lo haña un yu. Pero, esei a parse imposibel, pasobra Abraham ku Sara tabata hopi bieu. Sin embargo, Abraham a kere ku Dios por hasi loke ta parse imposibel. Pues, kiko a sosodé?

Despues ku Dios a duna e promesa, henter un aña a pasa. Anto ora Abraham tabatin 100 aña di edat i Sara tabatin 90, nan a haña un yu hòmber ku nan a yama Isaak. Dios a kumpli ku su promesa!

Pero ora Isaak a bira mas grandi, Yehova a tèst e fe di Abraham. El a yama: ‘Abraham!’ I Abraham a kontestá: ‘At’ami aki!’ Anto Dios a bisa: ‘Tuma bo yu, bo úniko yu, Isaak, i bai n’e seru ku lo mi mustra bo. Mata bo yu ei i ofres’é komo sakrifisio.’

Ki tristu e palabranan ei a hasi Abraham, pasobra Abraham a stima su yu masha hopi. I no lubidá, Dios a primintí ku e yunan di Abraham lo biba na e tera di Kánaan. Pero, kon esei por sosodé si Isaak muri? Abraham no a komprondé, pero tòg el a obedesé Dios.

Ora el a yega n’e seru, Abraham a mara Isaak i a pon’é riba e altar ku el a traha. Anto el a saka e kuchú pa mata su yu. Pero nèt na e momentu ei e angel di Dios a yama: ‘Abraham, Abraham!’ I Abraham a kontestá: ‘At’ami aki!’

‘No hasi daño na e mucha ni no hasié nada,’ Dios a bisa. ‘Awor mi sa ku bo tin fe den mi, pasobra bo no a nenga mi bo yu, bo úniko yu.’

Ki un fe grandi Abraham tabatin den Dios! El a kere ku nada no ta imposibel pa Yehova, i ku Yehova asta por a lanta Isaak bèk for di morto. Pero realmente no tabata e boluntat di Dios pa Abraham mata Isaak. P’esei Dios a hasi un karné pega den mata serka ei banda, i el a bisa Abraham sakrifiká e karné en bes di su yu.

Génesis 21:1-7; 22:1-18.