BO TA mira ken Dina ta bai bishitá? E ta bai serka algun mucha muhé ku ta biba na e tera di Kánaan. Su tata Jakòb lo a keda kontentu ku esei? Pa yuda bo kontestá e pregunta, purba kòrda loke Abraham i Isaak a pensa di e muhénan di Kánaan.

Abraham tabata ke pa su yu Isaak kasa ku mucha muhé di Kánaan? Nò, e no tabata ke esei. Isaak i Rebeka tabata ke pa nan yu Jakòb kasa ku mucha muhé kananeo? Nò, nan no tabata ke. Bo sa pakiko?

Esei tabata pa motibu ku hende di Kánaan tabata adorá dios falsu. Nan no tabata bon hende pa kasa kuné komo esposo òf esposa, i nan no tabata bon hende pa nan tin komo amigu íntimo. P’esei nos por keda sigur ku Jakòb lo no a keda kontentu ku su yu a bira amiga ku mucha muhé kananeo.

I en bèrdat, Dina a hañ’é den difikultat. Bo ta mira e hòmber kananeo ku ta wak Dina riba e plachi? Su nòmber ta Sikem. Un dia ora Dina a bini pa un bishita, Sikem a kohe Dina i a fòrs’é pa drumi kuné. Esei tabata malu, pasobra hende hòmber i muhé kasá so por drumi ku otro. E kos malu ku Sikem a hasi ku Dina a resultá den hopi mas problema.

Ora e rumannan di Dina a tende loke a sosodé, nan a bira masha rabiá. Dos di nan, Simeon i Leví, a bira asina rabiá ku nan a tuma spada i a bai na e stat i a kohe nan di sorpresa. Simeon i Leví i nan rumannan a mata Sikem i tur e otro hòmbernan. Jakòb a rabia pa motibu ku su yunan a hasi e mal kos ei.

Kon bini tur e difikultatnan aki a kuminsá? Debí ku Dina a sera amistat ku hende ku no tabata obedesé e leinan di Dios. Nos no ke tin amigunan asina, no ta bèrdat?

Génesis 34:1-31.