HOSÉ kier a sa si ainda su 10 ruman hòmbernan mas grandi tabata mal hende i a falta bondat. P’esei el a bisa: ‘Boso ta spion. Boso a bini pa haña sa unda nos pais ta suak.’

‘Nò, nos no ta spion,’ nan a kontestá. ‘Nos ta hende onrado. Nos tur ta ruman. Nos tabata 12. Pero nos a pèrdè un ruman hòmber, i esun di mas chikí ta na kas serka nos tata.’

Hosé a pretendé di no kere nan. El a sera su ruman hòmber ku yama Simeon den prizon, i a laga e otronan tuma kuminda i bai kas. Pero el a bisa nan: ‘Ora boso bini bèk, boso mester trese boso ruman hòmber di mas chikí ku boso.’

Ora nan a regresá Kánaan, e rumannan a konta nan tata Jakòb tur loke a sosodé. Jakòb a keda masha tristu. ‘Nos a pèrdè Hosé,’ el a sklama, ‘i awor nos a pèrdè Simeon. Mi no ta laga boso hiba mi yu hòmber di mas chikí Benjamin.’ Pero ora ku nan kuminda a kuminsá kaba, Jakòb a keda obligá di laga nan hiba Benjamin Egipto pa nan por a haña mas kuminda.

Awor Hosé a mira su rumannan ta bini. El a keda masha kontentu pa mira su ruman di mas chikí, Benjamin. Naturalmente, ningun di nan no tabata sa ku e hòmber importante ei ta Hosé. Awor Hosé a hasi algu pa tèst su 10 mitar rumannan.

El a manda pa su kriánan yena tur nan sakunan ku kuminda. Pero, sin laga nan sa, el a manda pa pone su kopa spesial di plata den saku di Benjamin. Despues ku nan tur a bai i no tabata muchu leu riba kaminda, Hosé a manda su kriánan nan tras. Ora ku e kriánan a yega serka nan, e kriánan a puntra: ‘Pakiko boso a hòrta e kopa di plata di nos doño?’

Tur e rumannan a kontestá: ‘Nos no a hòrta su kopa. Si boso haña e kopa den poder di un di nos, laga e persona ei muri.’

P’esei e kriánan a listra tur e sakunan, i nan a haña e kopa den e saku di Benjamin, nèt manera bo ta mira riba e plachi ei. E kriánan a bisa: ‘Boso tur por bai, pero Benjamin tin ku bai bèk ku nos.’ Kiko e 10 mitar rumannan a hasi e ora ei?

Nan tur a bai bèk ku Benjamin na kas di Hosé. Hosé a bisa su rumannan: ‘Boso tur por bai kas, pero Benjamin mester keda aki komo mi esklabo.’

Awor Huda a papia, i a bisa: ‘Si mi bai kas sin e mucha, mi tata lo muri pasobra e ta stim’é masha hopi. P’esei, por fabor, tene ami aki komo bo esklabo, pero laga e mucha bai kas.’

Hosé por a mira ku su rumannan a kambia. Awor nan no ta mal hende sin bondat mas. Laga nos mira kiko Hosé a hasi e ora ei.

Génesis 42:9-38; 43:1-34; 44:1-34.