Relato 12: Hende A Traha un Toren Grandi
HOPI aña a pasa. E yunan di Noe a haña hopi yu. I nan yunan a krese i nan a haña mas yu. Pronto tabatin hopi hende riba tera.
Un di nan tabata un bisañetu di Noe, yamá Nimròd. E tabata un mal hende ku a yag i mata tantu bestia komo hende. Ademas, Nimròd a hasi su mes rei pa e manda riba otro hende. Dios no a gusta Nimròd.
Tur e hendenan di e tempu ei tabata papia un idioma so. Nimròd kier a tene nan tur huntu pa e por dominá nan. Pues, bo sa kiko el a hasi? El a manda e pueblo traha un stat i un toren grandi den dje. Wak nan traha blòki riba e plachi.
Yehova Dios no a gusta loke nan tabata traha. Dios tabata ke pa hende plama i biba tur kaminda riba tera. Pero e pueblo a bisa: ‘Ban! Laga nos traha un stat i un toren asina haltu ku su tòp ta yega te den shelu. Anto nos lo bira famoso!’ Nan a deseá onor pa nan mes i no pa Dios.
P’esei, Dios a hasi hende bandoná trahamentu di e toren. Bo sa kon Dios a hasi esei? El a pone e hendenan kuminsá papia otro idioma diripiente en bes di unu so. E trahadónan no a komprondé otro mas. P’esei nan stat a yega di ser yamá Babel, òf Babilonia, ku kier men “Konfushon.”
Awor hende a kuminsá bandoná Babel. Grupo di hende ku a papia e mesun idioma a bai biba huntu na otro parti di tera.
Génesis 10:1, 8-10; 11:1-9.
Pregunta
- Ken Nimròd tabata, i kiko Dios a pensa tokante dje?
- Dikon e hendenan riba e plachi ta traha blòki?
- Pakiko Yehova no a gusta loke nan tabata traha?
- Kon Dios a para trahamentu di e toren?
- Ki nòmber e stat a haña, i kiko e nòmber ei ta nifiká?
- Kiko a para di e hendenan despues ku Dios a konfundí nan idioma?
Preguntanan adishonal
- Lesa Génesis 10:1 i 8-10.
Ki karakter Nimròd tabatin, i ki spièrtamentu esei ta pa nos? (Pro. 3:31)
- Lesa Génesis 11:1-9.
Kiko a motivá e hendenan pa traha e toren, i dikon nan proyekto tabata kondená na frakaso? (Gén. 11:4; Pro. 16:18; Juan 5:44)