Relato 100: Hesus den e Hòfi
DESPUES di baha for di e sala djariba, Hesus i su apòstelnan a bai na e hòfi di Getsemané. Nan a yega di bai ei hopi biaha. Awor Hesus a bisa nan pa keda lantá i hasi orashon. Anto el a alehá un poko i a kai ku su kara te na suela pa hasi orashon.
Despues Hesus a bin bèk kaminda su apòstelnan a keda. Bo sa kiko nan tabata hasi? Drumi! Hesus a bisa nan tres bes pa keda lantá, pero kada bes ku el a bolbe el a haña nan drumí. E último bes ku Hesus a bin bèk el a puntra nan: ‘Kon boso por drumi na un okashon manera esaki? E ora a yega pa mi ser entregá na mi enemigunan.’
Nèt na e momentu ei nan a tende zonidu di un multitut grandi. Mira! Hende ta bini ku spada i klòp! I nan tin flambeu pa lusa e kaminda. Ora nan a yega mas serka, un hòmber a sali for di e multitut i a kana stret bai serka Hesus. El a dun’é un sunchi, manera bo ta mira ei. E hòmber ta Hudas Iskariot! Pakiko el a sunchi Hesus?
Hesus a puntr’é: ‘Hudas, bo ta traishoná mi ku un sunchi?’ Sí, e sunchi ta un señal. Esei lo a laga e hòmbernan huntu ku Hudas sa ku esei ta Hesus, e hòmber ku nan ta buska. P’esei e enemigunan di Hesus a bini i a gar’é. Pero Pedro no a laga nan kohe Hesus sin pelea. El a saka e spada ku el a bin kuné i a zuai e den direkshon di e hòmber banda di dje. E spada a hera kabes di e hòmber pero a kita su orea afó. Pero Hesus a mishi ku e hòmber su orea i a kur’é.
Hesus ta bisa Pedro: ‘Warda bo spada. Bo no ta kere ku mi por pidi mi Tata pa e manda míles di angel pa salba mi?’ Sí, Hesus por! Pero Hesus no ta pidi su Tata manda ningun angel, pasobra e sa ku e tempu a yega pa su enemigunan koh’é. P’esei e ta laga nan bai kuné. Laga nos mira kiko ta bai sosodé ku Hesus awor.
Mateo 26:36-56; Lukas 22:39-53; Juan 18:1-12.
Pregunta
- Unda Hesus i su apòstelnan a bai despues ku nan a baha for di e sala ariba, i kiko el a bisa nan pa hasi?
- Ki situashon Hesus a topa ora el a bolbe serka su apòstelnan, i kuantu biaha esei a sosodé?
- Ken a drenta den e hòfi i kiko Hudas Iskariot a hasi, manera bo por mira riba e plachi?
- Pakiko Hudas a sunchi Hesus, i kiko Pedro a hasi?
- Kiko Hesus a bisa Pedro, pero pakiko Hesus no a pidi Dios pa manda angel?
Preguntanan adishonal
- Lesa Mateo 26:36-56.
Kon e manera ku Hesus a konsehá su disipelnan ta sirbi komo un ekselente ehèmpel pa ansianonan kristian awe? (Mat. 20:25-28; 26:40, 41; Gal. 5:17; Efe. 4:29, 31, 32)
Ki punto di bista Hesus tabatin enkuanto di uso di arma karnal kontra nos próhimo? (Mat. 26:52; Luk. 6:27, 28; Juan 18:36)
- Lesa Lukas 22:39-53.
E echo ku un angel a aparesé na Hesus den e hòfi di Getsemané pa fortales’é a nifiká ku Hesus su fe a tambaleá? Splika. (Luk. 22:41-43; Isa. 49:8; Mat. 4:10, 11; Heb. 5:7)
- Lesa Juan 18:1-12.
Kon Hesus a protehá su disipelnan kontra su opositornan, i kiko nos por siña for di e ehèmpel aki? (Juan 10:11, 12; 18:1, 6-9; Heb. 13:6; Sant. 2:25)