Relato 93: Hesus Ta Alimentá Hopi Hende
ALGU teribel a sosodé. Nan a kaba di mata Juan Boutista. Herodías, esposa di e rei, no tabata gusta Juan. I el a pone e rei duna òrdu pa kap su kabes afó.
Ora Hesus a tende esei, el a bira masha tristu. El a bai su so na un lugá solitario. Pero hende a siguié. Ora Hesus a mira e multitut, el a sinti duele di nan. P’esei el a papia ku nan tokante e reino di Dios, i el a kura e hendenan enfermo.
E atardi ei su disipelnan a bini serka dje i a bisa: ‘Ta lat kaba, i esaki ta un lugá solitario. Manda e hendenan bai pa nan por kumpra kuminda pa nan mes den e pueblonan ei serka.’
Hesus a kontestá: ‘Nan no tin ku bai. Duna nan algu pa kome.’ Hesus a puntra Felipe: ‘Unda nos por kumpra sufisiente kuminda pa tur e hendenan aki?’
Felipe a kontestá: ‘Ta kosta muchu plaka pa kumpra sufisiente kuminda pa tur hende por haña djis un tiki so.’ Andres a bisa: ‘E mucha hòmber ku ta karga nos kuminda tin sinku pan i dos piská. Pero esei no ta basta pa tur e hendenan ei.’
Hesus a bisa: ‘Pidi tur hende pa sinta riba yerba,’ anto el a gradisí Dios pa e kuminda i a kuminsá kibr’é na pida-pida. Despues e disipelnan a parti e pan- i piskánan pa tur hende. Tabatin 5.000 hòmber, i hopi míles mas di hende muhé i mucha. Nan tur a kome te ku nan a keda barika yen. I ora e disipelnan a rekohé loke a sobra, tabatin 12 makutu yen!
Awor Hesus a bisa su disipelnan drenta den un boto pa nan krusa laman di Galilea. Durante anochi tabatin un tempestat i ola a tira e boto p’aki i p’aya. E disipelnan a haña masha miedu mes. Anto mei anochi nan a mira un hende ta kana riba awa biniendo serka nan. Nan a grita di miedu, pasobra nan no tabata sa kiko nan ta mira.
Hesus di: ‘No tene miedu, ta ami!’ Tòg nan no por a kere. P’esei Pedro a bisa: ‘Si ta abo, Señor, bisa mi kana riba awa i bin serka bo.’ Hesus a bisa: ‘Bin!’ I Pedro a sali for di e boto i a kana riba awa! Pero despues el a haña miedu i a kuminsá senk, ma Hesus a salb’é.
Un otro dia Hesus a alimentá míles di hende atrobe. El a hasi esei ku shete pan i un par di piská chikitu. I atrobe tabatin na abundansia pa tur hende. No ta maravioso kon Hesus por perkurá pa hende? Ora e ta reina komo rei di Dios, nos lo no tin ku preokupá nos mes ku nada nunka.
Mateo 14:1-32; 15:29-38; Juan 6:1-21.
Pregunta
- Ki kos teribel a sosodé ku Juan Boutista, i kon esei a pone Hesus sinti?
- Kon Hesus a alimentá e multitut ku a siguié, i kuantu kuminda a sobra?
- Pakiko e disipelnan a haña miedu durante anochi, i kiko a pasa ku Pedro?
- Kon Hesus a alimentá míles di hende pa di dos bes?
- Pakiko lo ta maravioso ora Hesus ta goberná tera komo e Rei di Dios?
Preguntanan adishonal
- Lesa Mateo 14:1-32.
Kiko e relato na Mateo 14:23-32 ta laga nos mira tokante e personalidat di Pedro?
Kon e registro bíbliko ta mustra ku Pedro a madurá i vense su komportashon impulsivo? (Mat. 14:27-30; Juan 18:10; 21:7; Echo. 2:14, 37-40; 1 Ped. 5:6, 10)
- Lesa Mateo 15:29-38.
Kon Hesus a mustra rèspèt pa loke su Tata a perkurá p’e den sentido material? (Mat. 15:37; Juan 6:12; Kol. 3:15)
- Lesa Juan 6:1-21.
Kon kristiannan awe por sigui e ehèmpel di Hesus relashoná ku gobièrnu? (Juan 6:15; Mat. 22:21; Rom. 12:2; 13:1-4)