MIRA e kos teribel ku ta sosodé! Nan ta mata Hesus. Nan a pon’é riba un staka. Nan a klaba su man- i su pianan. Pakiko nan lo hasi un kos asina ku Hesus?

Pasobra algun hende ta odia Hesus. Bo sa ken nan ta? Unu di nan ta e angel malbado Satanas e Diabel. El a logra pone Adam ku Eva desobedesé Yehova. I Satanas a pone e enemigunan di Hesus kometé e krímen teribel aki.

Asta promé ku nan a klaba Hesus na e staka, su enemigunan a trat’é malu. Bo ta kòrda kon nan a bini na e hòfi di Getsemané i a kohe Hesus bai kuné? Ken e enemigunan aki tabata? Sí, nan tabata e lidernan religioso. Wèl, laga nos mira kiko a sosodé despues.

Ora e lidernan religioso a bai ku Hesus, su apòstelnan a kore bai. Nan a bandoná Hesus den man di su enemigunan pasobra nan tabatin miedu. Pero apòstel Pedro i Juan no a bai muchu leu. Nan a sigui nan tras pa mira kiko ta sosodé ku Hesus.

E saserdotenan a hiba Hesus serka e ansiano yamá Anas, kende ántes tabata sumo saserdote. E multitut no a keda ei hopi tempu. Despues nan a hiba Hesus na kas di Kaifas, kende ta e sumo saserdote awor. Hopi lider religioso a reuní den su kas.

Nan a tene un huisio den kas di Kaifas. Nan a trese hende pa gaña riba Hesus. Tur e lidernan religioso a bisa: ‘Hesus tin ku muri.’ Anto nan a skupi den su kara i a dal e ku moketa.

Miéntras tantu, Pedro a keda den e kurá. Tabata hasi friu i e hendenan a sende un kandela. Miéntras nan tabata keinta nan kurpa rònt di e kandela, un sirbienta a mira Pedro i a bisa: ‘E hòmber ei tambe tabata huntu ku Hesus.’

Pedro a kontestá: ‘Nò, mi no tabata huntu kuné.’

Tres bes hende a bisa Pedro ku e tabata huntu ku Hesus. Pero kada bes Pedro a nenga. Ora Pedro a bisa esei pa e di tres bes, Hesus a drei wak e. A duel Pedro ku el a gaña asina, i el a bai i a yora.

Trempan su manisé djabièrnè, ora solo a kuminsá sali, e saserdotenan a hiba Hesus na nan lugá grandi di reuní, e sala di Sanedrin. Nan a papia ei tokante kiko nan lo hasi kuné. Nan a hib’é serka Ponsio Pilato, e gobernante di e distrito di Hudea.

E saserdotenan a bisa Pilato: ‘E hòmber aki ta un mal hende. E tin ku muri.’ Despues ku Pilato a hasi Hesus algun pregunta, el a bisa: ‘Mi no ta haña ku el a hasi nada malu.’ Anto Pilato a manda Hesus serka Herodes Antipas. E tabata gobernante di Galilea, pero e tabata kedando na Yerusalèm. E tampoko no a haña nada malu den Hesus i a mand’é bèk pa Pilato.

Pilato kier a laga Hesus bai. Pero e enemigunan di Hesus tabata ke pa e laga un otro prizonero bai, esta, e ladron Bárabas. Tabata rònt di mèrdia ora Pilato a trese Hesus pafó. El a bisa e pueblo: ‘Mira! Boso rei!’ Pero e saserdotenan prinsipal a grita: ‘Kaba kuné! Mat’é! Mat’é!’ P’esei Pilato a laga Bárabas sali liber i nan a bai ku Hesus pa mat’é.

Djabièrnè traimèrdia nan a klaba Hesus na e staka. Bo no por mira nan riba e plachi, pero na kada banda di Hesus tabatin un kriminal ku a ser kologá na staka pa muri. Djis promé ku Hesus a muri, un di e kriminalnan a pidié: ‘Kòrda mi ora bo ta den bo reino.’ I Hesus a kontestá: ‘Mi ta primintí bo ku lo bo ta ku mi den Paradeis.’

Bo no ta haña esei un promesa maravioso? Bo sa ta kua paradeis Hesus tabata kier men? Unda e paradeis ku Dios a traha na prinsipio tabata? Sí, riba tera. I ora Hesus ta reina komo rei den shelu, lo e resusitá e hòmber aki na bida pa e gosa di e Paradeis nobo riba tera. Esei no ta hasi nos felis?

Mateo 26:57-75; 27:1-50; Lukas 22:54-71; 23:1-49; Juan 18:12-40; 19:1-30.