Relato 96: Hesus A Kura Hende Enfermo
MIÉNTRAS ku Hesus a biaha dor di e pais, el a kura hende enfermo. Notisia di su milagernan a plama na tur parti den e pueblonan i statnan. P’esei hende tabata trese serka dje esnan koho i siegu i surdu, i hopi otronan enfermo. I Hesus a kura nan tur.
Mas ku tres aña a pasa desde ku Juan a batisá Hesus. I Hesus a bisa su apòstelnan ku pronto e tin ku bai Yerusalèm unda nan lo mat’é, pero ku Dios lo lant’é for di morto. Entre tantu Hesus a sigui kura hende enfermo.
Un dia Hesus tabata siña hende riba dia di sabat. Sabat ta e dia di deskanso di hudiunan. E señora ku bo ta mira ei tabata hopi malu. Pa 18 aña el a kana doblá sin por para règt. P’esei Hesus a pone su man riba dje i el a stret su kurpa. El a kura!
Esei a pone e lidernan religioso rabia. Un di nan a grita e multitut: ‘Tin seis dia pa nos traha. Bini pa kurashon durante e dianan ei i no riba sabat!’
Pero Hesus a kontestá: ‘Boso ta mal hende. Kualke un di boso lo lòs su buriku i hib’é pa bebe awa riba sabat. Pues, pakiko mi no por kura e pober señora aki riba sabat, despues ku el a keda enfermo 18 aña?’ E palabranan di Hesus a brongosá e mal hendenan.
Despues Hesus i su apòstelnan a sigui pa Yerusalèm. Ora nan a yega nèt pafó di e stat Jeriko, dos limosnero siegu a tende ku Hesus ta pasa. P’esei nan a grita: ‘Hesus, yuda nos!’
Hesus a yama e dos hòmbernan siegu serka dje i a puntra nan: ‘Kiko boso ke pa mi hasi pa boso?’ Nan di: ‘Señor, habri nos wowo.’ Hesus a mishi ku nan wowo i nan a mira umbes! Bo sa dikon Hesus a hasi tur e milagernan ei? Pasobra el a stima hende i e tabata ke pa nan pone fe den dje. P’esei nos por keda sigur ku ora e ta reina komo Rei, ningun hende riba tera lo bira malu atrobe.
Mateo 15:30, 31; Lukas 13:10-17; Mateo 20:29-34.
Pregunta
- Kiko Hesus a hasi miéntras e tabata biaha dor di e pais?
- Mas o ménos tres aña despues ku Hesus a batisá, kiko el a bisa su apòstelnan?
- Ken e hendenan riba e plachi ta, i kiko Hesus a hasi pa e señora?
- Pakiko e manera ku Hesus a kontestá e krítika di e lidernan religioso a pone nan sinti bèrgwensa?
- Ora Hesus i su apòstelnan a yega serka di Jeriko, kiko Hesus a hasi pa dos limosnero siegu?
- Pakiko Hesus a hasi milager?
Preguntanan adishonal
- Lesa Mateo 15:30 i 31.
Kon Yehova su poder a ser demostrá na un manera maravioso pa medio di Hesus, i kon esaki ta yuda nos komprondé loke Yehova a primintí tokante su mundu nobo? (Sal. 37:29; Isa. 33:24)
- Lesa Lukas 13:10-17.
Kiko e echo ku Hesus a hasi algun di su milagernan di mas grandi riba sabat ta mustra tokante e alivio ku humanidat lo risibí durante su Gobernashon di Mil Aña? (Luk. 13:10-13; Sal. 46:9; Mat. 12:8; Kol. 2:16, 17; Rev. 21:1-4)
- Lesa Mateo 20:29-34.
Kon e relato aki ta mustra ku nunka Hesus tabata muchu okupá pa yuda hende, i kiko nos por siña for di esaki? (Deu. 15:7; Sant. 2:15, 16; 1 Juan 3:17)