Relato 105: Sperando den Yerusalèm
E HENDENAN ei ta siguidónan di Hesus. Nan a obedes’é i a keda den Yerusalèm. I miéntras ku nan tur tabata spera huntu, un zonidu duru a yena henter e kas. El a zona manera un bientu fuerte. Anto lenga di kandela a kuminsá aparesé riba kabes di kada un di e disipelnan. Bo ta mira e kandela riba kada un di nan? Kiko esei a nifiká?
Esei ta un milager! Hesus a yega bèk den shelu serka su Tata i el a drama spiritu santu di Dios riba su siguidónan. Bo sa kiko e spiritu ei a pone nan hasi? Nan tur a kuminsá papia den diferente idioma.
Hopi hende den Yerusalèm a tende un zonidu manera un bientu fuerte i nan a bin pa mira ta kiko a sosodé. Algun tabata hende di otro nashon ku a bin pa e fiesta israelita ku yama Pentekòste. Ki un sorpresa e bishitantenan ei a risibí! Nan a tende e disipelnan papia den nan mes idioma tokante e kosnan maravioso ku Dios a hasi.
E bishitantenan a bisa: ‘Tur e hendenan ei ta di Galilea. Anto kon por ta ku nan por papia den diferente idioma di e paisnan di unda nos a bin?’
Awor Pedro a lanta i a splika nan. El a hisa su bos i a bisa e pueblo kon Hesus a wòrdu matá, i ku Yehova a lant’é for di morto. Pedro a bisa: ‘Awor Hesus ta den shelu na man drechi di Dios i el a drama e spiritu santu primintí. P’esei boso a mira i tende e milagernan aki.’
Wèl, ora Pedro a bisa esei, hopi di e hendenan a sinti masha duele di loke nan a hasi ku Hesus. Nan a puntra: ‘Kiko nos mester hasi?’ Pedro a bisa nan: ‘Boso tin ku kambia boso bida i batisá.’ P’esei riba e mesun dia ei rònt di 3.000 hende a batisá i a bira siguidó di Hesus.
Echonan 2:1-47.
Pregunta
- Manera bo por mira riba e plachi, kiko a sosodé ku e siguidónan di Hesus ku a keda spera na Yerusalèm?
- Ki sorpresa e bishitantenan na Yerusalèm a risibí?
- Kiko Pedro a splika e hendenan?
- Kiko e hendenan a sinti despues ku nan a skucha Pedro, i kiko Pedro a bisa nan pa hasi?
- Kuantu hende a batisá riba e dia di Pentekòste di aña 33 di nos era?
Preguntanan adishonal
- Lesa Echonan 2:1-47.
Kon e palabranan di Pedro na Echonan 2:23 i 36 ta mustra ku henter e nashon hudiu a karga falta pa e morto di Hesus? (1 Tes. 2:14, 15)
Kon Pedro a pone un bon ehèmpel den e manera ku el a rasoná for di e Skritura? (Echo. 2:16, 17, 29, 31, 36, 39; Kol. 4:6)
Kon Pedro a usa e promé “yabi di e reino di shelu” ku Hesus a primintí di dun’é? (Echo. 2:14, 22-24, 37, 38; Mat. 16:19)