Relato 112: Barku A Kibra Riba un Isla
MIRA! E barku ta den problema! E ta kibra na pida-pida! Bo ta mira e hendenan ku a bula na awa? Algun a yega tera kaba. Ta Pablo esei? Laga nos mira kiko a pas’é.
Kòrda ku nan a tene Pablo den prizon na Cesarea pa dos aña. Despues nan a barka e i otro prizoneronan pa Roma. Ora nan a pasa banda di e isla di Kreta, un mal tempu fuerte a suta nan. Tabatin asina tantu bientu ku nan no por a stür e barku. I nan no por a mira solo den dia ni strea durante anochi. Finalmente, despues di hopi dia, esnan na bordo a pèrdè speransa di ser salbá.
Anto Pablo a lanta para i a bisa: ‘Ningun di boso lo no pèrdè boso bida; e barku so lo bai pèrdí. Pasobra ayera nochi un angel di Dios a bin serka mi i a bisa mi: “No tene miedu, Pablo! Bo tin ku para dilanti di Cesar e gobernante romano. I Dios lo salba tur hende ku ta nabegando huntu ku bo.”’
Rònt di meianochi, dieskuater dia despues ku e mal tempu a kuminsá, e matrosnan a tuma nota ku e awa no tabata hopi hundu mas! Teniendo miedu ku e barku lo kibra riba baranka den skuridat, nan a tira anker. Su manisé nan a mira un boka. Nan a disidí di nabegá e barku te na e playa.
Wèl, ora nan a yega mas serka di e kosta e barku a dal den un banki di santu i a keda pegá. Anto laman a kuminsá sut’é i e barku a kuminsá kibra. E ofisial militar a bisa: ‘Tur hende ku sa landa, bula promé den laman i landa bai tera. Tur otro hende por bula despues di nan, i tene duru na e pidanan di e barku.’ I esei ta loke nan a hasi. Asina tur 276 hende na bordo a yega tera sano i salvo manera e angel a primintí.
E isla yama Malta. E habitantenan di e isla tabata masha bondadoso, i nan a kuida e hendenan di e barku. Ora tempu a mehorá, nan a pone Pablo riba un otro barku i a hib’é Roma.
Echonan 27:1-44; 28:1-14.
Pregunta
- Kiko a sosodé ku e barku ku Pablo tabata riba dje, ora el a pasa banda di e isla di Kreta?
- Kiko Pablo a bisa e hendenan riba e barku?
- Kon bin e barku a kibra na pida-pida?
- Ki instrukshon e ofisial militar a duna, i kuantu hende a yega tera sano i salvo?
- Kon yama e isla ku nan a yega, i kiko nan a hasi ku Pablo ora tempu a mehorá?
Preguntanan adishonal
- Lesa Echonan 27:1-44.
Kon nos konfiansa den e eksaktitut di e registro bíbliko ta bira mas fuerte ora nos lesa e relato di Pablo su biahe pa Roma? (Echo. 27:16-19, 27-32; Luk. 1:3; 2 Tim. 3:16, 17)
- Lesa Echonan 28:1-14.
Si e habitantenan pagano di Malta a sinti nan motivá pa trata apòstel Pablo i e otro hendenan ku a noufragá huntu kuné ku “kariño eksepshonal,” kristiannan mester ser motivá pa desplegá kiko, i den ki manera prinsipalmente? (Echo. 28:1, 2; Heb. 13:1, 2; 1 Ped. 4:9)