MIRA e kadena na Pablo su man, i tambe e sòldá romano ku ta vigil’é. Pablo ta un prizonero na Roma. E ta sperando pa Cesar disidí kiko pa hasi kuné. Nan ta permití Pablo risibí bishita maske e ta prizonero.

Tres dia despues ku Pablo a yega Roma, el a manda rospondi pa algun lider hudiu bin bishit’é. Komo resultado, hopi hudiu di Roma a bin. Pablo a prediká na nan tokante Hesus i e reino di Dios. Algun hudiu a kere i a bira kristian, pero otronan no a kere.

Tambe Pablo a prediká na diferente sòldá ku tabatin e trabou di vigil’é. Durante e dos añanan ku nan a tene Pablo prezu, el a prediká na mas tantu hende posibel. Komo resultado, asta e famia di Cesar a tende e bon nobo di e Reino, i algun di nan a bira kristian.

Pero ken ta e bishitante sintá na e mesa ta skirbi? Bo por rei ta ken? Sí, esei ta Timoteo. Nan a sera Timoteo tambe dor ku e ta prediká tokante e Reino, pero awor e ta liber atrobe. I el a bishitá Pablo pa yud’é. Bo sa kiko Timoteo ta skirbiendo? Laga nos mira.

Bo ta kòrda e dos statnan, Filipos i Efeso, den Relato 110? Pablo a yuda establesé kongregashon kristian den e dos statnan ei. Awor, será den prizon, Pablo ta skirbi karta na e kristiannan ei. E dos kartanan ta den Beibel, i nan yama Efesionan i Filipensenan. Awor Pablo ta bisando Timoteo kiko pa skirbi na nan amigunan kristian na Filipos.

E filipensenan a trata Pablo ku masha bondat. Nan a manda un regalo p’e den prizon, i p’esei Pablo ta manda yama nan danki. Epafrodito ta esun ku a trese e regalo. Pero el a bira hopi malu i kasi a muri. Awor e ta bon atrobe i kla pa bai kas. E lo hiba e karta di Pablo i Timoteo ora e bai Filipos bèk.

Den prizon Pablo a skirbi dos karta mas ku ta den Beibel. El a dirigí un di e kartanan na e kristiannan di e stat Kolosas. Bo sa kon yama e karta ei? Kolosensenan. E otro tabata un karta personal pa un amigu íntimo yamá Filemon ku tambe tabata biba na Kolosas. E karta ta tokante Onésimo, sirbidó di Filemon.

Onésimo a hui di Filemon i a bai Roma. Di un manera òf otro Onésimo a tende ku Pablo ta den prizon einan. El a bishitá Pablo i Pablo a dun’é testimonio. Pronto Onésimo tambe a bira un kristian. Awor ta duel Onésimo ku el a hui. Bo sa kiko Pablo a skirbi den e karta ei pa Filemon?

Pablo a pidi Filemon pordoná Onésimo. Pablo a skirbi: ‘Mi ta manda Onésimo bèk serka bo. Pero awor e no ta bo sirbidó so. Tambe e ta un bon ruman kristian.’ Ora Onésimo a bolbe pa Kolosas el a hiba e dos kartanan kuné, un pa e kristiannan kolosense i e otro pa Filemon. Imaginá bo kon kontentu Filemon a keda pa tende ku su sirbidó a bira kristian.

Ora Pablo a skirbi e filipensenan i Filemon, e tabatin notisia masha bon mes. Pablo a bisa e kristiannan filipense: ‘Mi ta manda Timoteo serka boso. Pero ami tambe lo bishitá boso pronto.’ I el a skirbi Filemon: ‘Prepará un lugá pa mi keda serka bo.’

Ora Pablo a haña su libertat el a bishitá rumannan kristian na vários lugá. Pero despues nan a hiba Pablo prezu na Roma atrobe. E tabata sa ku e biaha aki sí nan lo mat’é. P’esei el a skirbi Timoteo i pidié bin lihé. Pablo a skirbi: ‘Mi a keda fiel na Dios, i Dios lo rekompensa mi.’ Poko aña despues Pablo a ser matá anto Yerusalèm a ser destruí atrobe, pero e biaha aki dor di e romanonan.

Pero tin mas kos den Beibel. Yehova Dios a inspirá apòstel Juan pa skirbi e último bukinan, inkluso e buki Revelashon. E buki di Beibel aki ta konta nos tokante futuro. Laga nos siña awor kiko ta bin den futuro.

Echonan 28:16-31; Filipensenan 1:13; 2:19-30; 4:18-23; Hebreonan 13:23; Filemon 1-25; Kolosensenan 4:7-9; 2 Timoteo 4:7-9.