YEHOVA ta kompará su mes bes tras bes ku un wardadó asina. E ta sigurá nos den Beibel: “Ami mes lo puntra pa mi karnénan i buska nan. Manera un wardadó ta kuida su tou riba e dia ku e ta meimei di su karnénan plamá, asina lo mi kuida mi karnénan.”—Ezekiel 34:11, 12.

Ken ta e karnénan di Yehova? Eseinan ta hende ku ta stim’é i ador’é. Beibel ta bisa: “Laga nos ban adorá i bùig te na suela; laga nos hinka rudia dilanti di SEÑOR, Esun ku a traha nos. Pasobra e ta nos Dios, i nos ta e pueblo ku e ta pastoriá, i e karnénan di su man.” (Salmo 95:6, 7) E sirbidónan di Yehova ta ansioso pa sigui nan Wardador, meskos ku karné ta sigui nan wardadó. Pero no ta tur biaha nan ta logra esei perfektamente. Algun sirbidó di Dios a yega di ta manera ‘karné plamá,’ ‘karné pèrdí’ i “karné ku a dual.” (Ezekiel 34:12; Mateo 15:24; 1 Pedro 2:25) Pero asta ora un persona drif  bai for di e bèrdat, Yehova no ta bandon’é komo si fuera no tin speransa p’e. Un karné pèrdí no ta un kaso pèrdí.

Abo ta sinti ku ainda Yehova ta bo Wardador? Kon Yehova ta demostrá awe ku e ta kuida nos manera un wardadó? E ta hasi esei den tres manera:

Yehova ta alimentá nos den sentido spiritual. El a bisa: “Lo mi alimentá nan den un bon lugá di yerba bèrdè . . . Nan lo drumi den un bon lugá di yerba bèrdè, i nan lo kome yerba fresku.” (Ezekiel 34:14) Yehova ta duna nos un variedat refreskante di kuminda spiritual ku semper ta yega nèt na ora. Bo ta kòrda un artíkulo, un diskurso òf un vidio ku tabata un kontesta riba bo orashon? Esei no a laga bo sinti ku Yehova ke yuda bo i ta interesá den bo?

Yehova ta protehá nos i sostené nos. E ta primintí ku lo e “trese bèk esnan ku tabata dual, pone verbant pa esnan ku ta heridá, i fortifiká esnan ku ta malu.” (Ezekiel 34:16) Yehova ta fortalesé rumannan ku ta suak òf desanimá pa motibu di inkietut. Na moda di papia, e ta verbant su karnénan heridá, i asina e ta yuda nan kura den kaso ku un hende a hasi nan daño, inkluso si e hende ei ta un ruman den fe. Tambe e ta yuda esnan ku a dual—i ku kisas ta lucha ku sintimentunan negativo—bini bèk den e tou.

Yehova ta sinti ku e ta responsabel pa nos. E ta bisa: “Lo mi kuida mi karnénan, i lo mi libra nan for di tur e lugánan pa unda nan a wòrdu plamá. . . . Lo mi buska esnan ku ta pèrdí.” (Ezekiel 34:12, 16) Den bista di Yehova, niun karné pèrdí no ta un kaso pèrdí. E sa ki ora falta un karné; e ta buska e karné ei i ta bira masha kontentu ora e hañ’é. (Mateo 18:12-14) Esei no mester straña nos, ya ku e ta yama su sirbidónan berdadero “mi karnénan, e karnénan di mi komedera [òf, sabana].” (Ezekiel 34:31) Bo tambe ta un di e karnénan ei.

Bo sa dikon Yehova ta buska bo i ta invitá bo pa bolbe serka dje? Pasobra e ke pa bo ta felis. El a primintí ku lo e drama hopi bendishon riba su karnénan. (Ezekiel 34:26) Esei no ta un promesa sin base. Bo mes a mira prueba di esei kaba.

Por ehèmpel, kòrda tempu ku bo a siña konosé Yehova. Kon bo a sinti bo ora ku na prinsipio bo a siña e bèrdatnan emoshonante tokante e nòmber di Dios i su propósito pa humanidat? Bo ta kòrda kon e dushi ambiente di union ku tabata reina entre e rumannan na asamblea i na kongreso a fortalesé bo? Anto kon bo a sinti bo kada biaha ku bo a logra papia di e bon notisia ku un hende ku tabata realmente interesá? Bo no tabata bai kas bèk felis i ku un sintimentu profundo di satisfakshon?

Bo por haña e gosonan ei bèk. Sirbidónan di Dios di pasado a pidié den orashon: “SEÑOR, trese nos bèk serka Bo, pa nos bolbe di bèrdè. Laga nos bida bolbe bira manera ántes!” (Lamentashonnan 5:21, BPK) Yehova a kontestá e orashon ei, i su pueblo a bolbe sirbié ku goso. (Nehemías 8:17) Yehova lo hasi meskos pa bo.

Nos sa ku pa papia ta fásil, pero pa bolbe t’e kos. Pues, laga nos ban analisá algun kos ku por stroba bo di bo bolbe serka Yehova i kon bo por superá nan.