PREOKUPASHON ta afektá tur hende—asta e sirbidónan di Dios. E salmista a skirbi ku e tabatin ‘multitut di preokupashon.’ (Salmo 94:19) I Hesus a bisa ku pa motibu di e “inkietutnan di bida,” den e tempu di fin lo no ta nada fásil pa sirbi Yehova. (Lukas 21:34) Kiko di abo? Bo ta sinti bo aplastá bou di problemanan ekonómiko, di famia òf di salú? Kon Yehova por yuda bo trata ku e situashonnan ei?

Nos tin mester di yudansa pa trata ku e inkietut- i preokupashonnan ku nos ta enfrentá. Segun apòstel Pablo: “Nos ta haña nos bou di hopi preshon, . . . nos no sa sigur kiko pa hasi [i] nos ta ser tumbá.” Ma na mes momento el a bisa ku “nos no ta asina den pèrtá ku nos no por move,” “nos no ta totalmente sin salida” i nos no ta ser “destruí.” Ta kiko ta yuda nos perseverá? “E poder ku ta surpasá esun di hende,” esta, e poder ku ta bini di nos Dios Todopoderoso, Yehova.—2 Korintionan 4:7-9.

Por ehèmpel, meditá un ratu riba okashonnan ku bo a yega di haña e “poder ku ta surpasá esun di hende.” Bo ta kòrda kon un diskurso animador a duna bo mas apresio pa Yehova su amor leal? I bo fe den e promesanan di Yehova no a bira mas fuerte ora bo tabata siña otro hende tokante e speransa di Paradeis? Pues, nos reunionnan i e trabou di prediká ta duna nos e forsa nesesario pa trata ku e inkietutnan di bida i tambe un pas mental ku ta yuda nos sirbi Yehova ku goso.

Tin biaha bo por sinti ku bo ta ser halá den diferente direkshon pareu. Por ehèmpel, Yehova ta pidi nos pa buska promé e Reino i pa mantené un bon rutina di aktividat spiritual. (Mateo 6:33; Lukas 13:24) Pero, kiko si oposishon di famia òf di kolega di trabou, problema ku salú òf problema di famia ta kaba ku tur bo energia? Òf kiko si bo trabou ta tuma asina tantu tempu i energia for di bo ku bo no por reuní ku e kongregashon? Ora bo haña bo ku asina tantu kos i tiki tempu i energia pa kumpli ku nan, kisas bo ta sinti ku bo no sa ki banda pa kue. Podisé asta bo a yega di puntra bo mes si Yehova no ta eksigí di mas di bo.

Yehova ta un Dios komprensivo. Nunka e no ta pidi nos mas di loke nos por duna. I Yehova sa ku ta tuma tempu pa nos rekuperá di tantu strès físiko komo emoshonal.—Salmo 103:13, 14.

Por ehèmpel, wak kon Yehova a sòru pa profeta Elías. Dado momento, Elías a bira asina desanimá i tabatin asina tantu miedu ku el a hui bai den desierto. Kon Yehova a reakshoná? Akaso el a skual e profeta i dun’é òrdu pa bai su asignashon bèk? Nò, al kontrario. Dos biaha Yehova  a manda un angel serka Elías pa lant’é suavemente for di soño i pa dun’é algu di kome. Asina mes, 40 dia despues, ainda Elías tabata tur preokupá i yen di miedu. Kiko mas Yehova a hasi pa yud’é? Promé, Yehova a demostrá e profeta ku e tin e poder pa proteh’é. Di dos, Yehova a konsolá Elías ku un stèm manera di “un brisa suave.” Finalmente, Yehova a revelá ku tabatin míles di israelita mas ku tabata adorá Dios fielmente. Komo resultado, Elías a rekuperá su entusiasmo pa sigui ku su trabou di profeta. (1 Reinan 19:1-19) Ki lès nos por saka for di e relato akí? Ora desanimashon a poderá di Elías, Yehova a trat’é ku pasenshi i kompashon. Yehova no a kambia. E ta sòru pa nos tambe na kasi e mesun manera.

Ora bo ta pensa riba kiko bo por duna Yehova, sea realista. No kompará loke bo por hasi awe ku loke bo tabata hasi na ántes. Un ehèmpel: Un koredó ku a stòp di train pa vários luna òf aña no por reanudá su rutina di ántes mesora. Mas bien, e tin ku kuminsá pone metanan chikitu ku ta yud’é bira fuerte i haña mas resistensia. Den e sentido ei, kristiannan ta manera koredó den un kareda. Nos tin ku train ku un meta bon kla na mente. (1 Korintionan 9:24-27) Dikon bo no ta purba di logra djis ún meta spiritual ku bo por alkansá aworakí? Kisas e meta di bai un reunion di kongregashon. Pidi Yehova yuda bo logra bo meta. Segun ku bo ta rekuperá bo forsa spiritual, lo bo ‘purba i mira ku Yehova ta bon.’ (Salmo 34:8) No lubidá, kiko ku bo ta hasi pa demostrá bo amor pa Yehova—pa chikitu ku esei por ta—tin gran balor den su bista.—Lukas 21:1-4.

Kon Yehova a duna June, e ruman muhé menshoná na kuminsamentu, e forsa pa bolbe serka dje? E ta konta nos: “M’a sigui hasi orashon i m’a pidi Yehova yuda mi. Un dia, e kasá di mi yu hòmber a bisa mi ku ta bai tin un asamblea den mi stat. M’a disidí di bai un di e dianan di e asamblea. Esta dushi m’a sinti mi meimei di e pueblo di Yehova! E asamblea ei tabata e ‘push’ ku mi tabatin mester. Awor mi ta sirbi Yehova atrobe, i mi ta hopi felis. M’a siña ku mi no por aislá mi mes; mi mester di e yudansa di mi rumannan. Mi ta masha gradisidu ku ainda tabatin tempu pa mi bolbe.”